பொதுச் சொத்துக்களுக்குச் சேதம் விளைவித்தால் கடும் சட்ட நடவடிக்கை: போக்குவரத்து அமைச்சர் எச்சரிக்கை

மெட்ரோ பேருந்துகளுக்குச் சேதம் விளைவிக்கும் நபர்களுக்கு எதிராகப் பொதுச் சொத்துக்களைச் சேதப்படுத்திய குற்றச்சாட்டின் கீழ் கடுமையான சட்ட நடவடிக்கை எடுக்கப்படும் என்று போக்குவரத்து அமைச்சர் பிமல் ரத்நாயக்க எச்சரித்துள்ளார்.

ஊடகங்களுக்குக் கருத்துத் தெரிவிக்கும்போதே அமைச்சர் இதனைக் குறிப்பிட்டுள்ளார். இதன்போது அவர் மேலும் தெரிவிக்கையில்:

"சாரதிகளாக இருந்தாலும் சரி அல்லது பேருந்து உரிமையாளர்களாக இருந்தாலும் சரி, இலங்கை மக்களுக்குச் சொந்தமான பொதுச் சொத்துக்களுக்குச் சேதம் விளைவிக்கும் எவராக இருந்தாலும், அவர்கள் கடுமையான சட்ட நடவடிக்கைகளை எதிர்கொள்ள நேரிடும்.

தற்போது சுமார் 100 மெட்ரோ பேருந்துகள் சேவையில் ஈடுபட்டுள்ளன. பெரும்பாலான தனியார் பேருந்துகள் இந்தச் சேவைக்கு எந்தவித இடையூறையும் ஏற்படுத்தவில்லை. ஒரு சிலரே இத்தகைய சம்பவங்களில் ஈடுபட்டுள்ளனர். எனவே, இதனைப் ஒட்டுமொத்தத் தனியார் பேருந்து உரிமையாளர்களால் ஏற்படுத்தப்பட்ட ஒரு பிரச்சினையாக நான் கருதவில்லை" என்று அவர் கூறினார்.

அத்துடன், இத்தகைய சம்பவங்களில் ஈடுபடுபவர்கள் பேருந்துகளுக்குச் சேதம் விளைவிப்பதைத் தவிர்த்து, பொதுமக்கள் மத்தியில் பெரும் வரவேற்பைப் பெற்றுள்ள இந்த புதிய போக்குவரத்துத் திட்டத்திற்குத் தங்களை அமைவுபடுத்திக் கொள்ள (adapt) வேண்டும் என்றும் அமைச்சர் கேட்டுக்கொண்டார்.

மேலும், இன்னும் ஒரு வருடத்திற்குள் மெட்ரோ பேருந்து சேவையில் தனியார் துறையினரும் பங்கெடுப்பதற்கான வாய்ப்புகள் வழங்கப்படும் என்றும் அமைச்சர் பிமல் ரத்நாயக்க சுட்டிக்காட்டினார்.