வெளிநாட்டுப் பல்கலைக்கழகப் போலி விளம்பரங்கள்: கணினி அவசர கால பதிலளிப்பு மையம் எச்சரிக்கை!

சமூக ஊடகங்கள் வாயிலாக வெளியிடப்படும் போலி வெளிநாட்டுப் பல்கலைக்கழக அனுமதி மற்றும் விசா விளம்பரங்கள் குறித்து பொதுமக்கள் விழிப்புடன் இருக்குமாறு இலங்கை கணினி அவசர கால பதிலளிப்பு மையம் அவசர எச்சரிக்கை விடுத்துள்ளது.

வெளிநாட்டுக் கல்வி வாய்ப்புகளைப் பெற்றுத்தருவதாகக் கூறி சமூக வலைத்தளங்களில் பரப்பப்படும் விளம்பரங்களை நம்பி, பல பெற்றோர்களும் மாணவர்களும் பல லட்சம் ரூபாய்களை இழந்துள்ளமை தொடர்பில் கிடைக்கப்பெற்ற பல முறைப்பாடுகளைத் தொடர்ந்தே இந்த எச்சரிக்கை விடுக்கப்பட்டுள்ளது.   

மோசடி நடைபெறும் விதம்:

முன்னணி வெளிநாட்டுப் பல்கலைக்கழகங்களின் உத்தியோகபூர்வ பிரதிநிதிகள் எனத் தங்களை அடையாளப்படுத்தும் நபர் அல்லது குழுக்கள், பதிவுக் கட்டணம் மற்றும் முதற்கட்டக் கல்விக் கட்டணங்களைச் செலுத்தும் பட்சத்தில் பல்கலைக்கழக அனுமதி, மாணவர் விசா , பகுதிநேர அல்லது முழுநேரப் பணி அனுமதிப் பத்திரம் மற்றும் இறுதியில் குடியுரிமை போன்றவற்றை எளிதாகப் பெற்றுத் தருவதாக வாக்குறுதி அளிக்கின்றனர்.   

இதற்காக மிகவும் நம்பத்தகுந்த வகையில் தயாரிக்கப்பட்ட காணொளிகள் (Videos), புகைப்படங்கள் மற்றும் போலி ஆவணங்களை மின்னஞ்சல் (Email) மற்றும் வாட்ஸ்அப் (WhatsApp) செயலிகள் மூலம் அனுப்பிப் பெற்றோர்களையும் மாணவர்களையும் நம்ப வைக்கின்றனர். பின்னர், கட்டணங்களை வெளிநாட்டு வங்கிக் கணக்குகளுக்கு வைப்புச் செய்யுமாறு கோருகின்றனர். நிதியை ஏற்றுக்கொண்டவுடன், குறித்த மோசடிக்காரர்கள் அனைத்துத் தொடர்புகளையும் துண்டித்துவிட்டுத் தலைமறைவாகிவிடுவதாக கணினி அவசர கால பதிலளிப்பு மையம் சுட்டிக்காட்டியுள்ளது.

பொதுமக்களுக்கான அறிவுறுத்தல்:

எனவே, வெளிநாட்டுக் கல்விக்காகப் பண பரிமாற்றங்களை மேற்கொள்வதற்கு முன்னர், சம்பந்தப்பட்ட பல்கலைக்கழகப் பிரதிநிதிகள், அவசியமான ஆவணங்கள் மற்றும் வங்கிக் கணக்கு விபரங்களின் உண்மைத்தன்மையைச் சரியாகச் சரிபார்க்குமாறு கணினி அவசர கால பதிலளிப்பு மையம் கேட்டுக்கொண்டுள்ளது.

மேலும், வெளிநாட்டு உயர் கல்வி வாய்ப்புகளைத் தேடும் போது சட்டப்பூர்வமான மற்றும் அரசாங்கத்தால் அங்கீகரிக்கப்பட்ட உத்தியோகபூர்வ வழிமுறைகளை மட்டுமே பயன்படுத்துமாறும் பொதுமக்கள் வலியுறுத்தப்பட்டுள்ளனர்.