பதுளையில் 'டிட்வா' புயலால் பாதிக்கப்பட்ட 124 குடும்பங்களுக்குப் புதிய வீடுகள்: பணிகளை ஆரம்பித்தார் அமைச்சர்!
'டிட்வா' (Ditwah) சூறாவளி அனர்த்தத்தினால் தமது வீடுகளை முழுமையாக இழந்த குடும்பங்களுக்காக, பதுளை மாவட்டத்தில் 124 புதிய வீடுகளை அமைக்கும் கட்டுமானப் பணிகள் உத்தியோகபூர்வமாக ஆரம்பித்து வைக்கப்பட்டுள்ளன.
அரச வீட்டுத்திட்டத்தின் கீழ், பதுளை மாவட்டத்தின் மூன்று பிரதேச செயலகப் பிரிவுகளில் இந்நடவடிக்கை முன்னெடுக்கப்பட்டு வருகின்றது. இதற்கான அடிக்கல் நட்டும் நிகழ்வுகள் நேற்றுமுன்தினம் (அக்டோபர் 08) தோட்ட மற்றும் சமூக உட்கட்டமைப்பு வசதிகள் அமைச்சர் சமந்த வித்யாரத்ன தலைமையில் வெகுவிமர்சையாக நடைபெற்ன.
இத்திட்டத்தின் கீழ் ஹாலிஎல பிரதேச செயலகப் பிரிவில் 62 வீடுகளும், பதுளையில் 27 வீடுகளும், பசறையில் 35 வீடுகளும் கட்டப்படவுள்ளன. இதற்கமைய ஹாலிஎல - கொத்மல்லந்த, பதுளை - தெல்பத்த மற்றும் பசறை பல்லேகொல்ல கிராம உத்தியோகத்தர் பிரிவிற்குட்பட்ட பிளேன்வத்தை ஆகிய இடங்களில் இப்புதிய வீடமைப்புத் திட்டங்களுக்கான இடங்கள் தெரிவு செய்யப்பட்டுள்ளன.
இயற்கை அனர்த்தத்தினால் பாதிக்கப்பட்ட குடும்பங்களுக்குப் பாதுகாப்பான, நிரந்தர உறைவிட வசதியை ஏற்படுத்திக் கொடுப்பதை நோக்கமாகக் கொண்டு இத்திட்டம் செயற்படுத்தப்படுகின்றது. இதற்கான காணிகளை அரசாங்கமே முழுமையாக வழங்கியுள்ளது.
இந்நிகழ்வில் பதுளை மாவட்டச் செயலாளர் சுனில் கலாம, பிரதேச செயலாளர்கள், உள்ளூராட்சி மன்றங்களின் தவிசாளர்கள், அரச உயர் அதிகாரிகள் மற்றும் பிரதேச பொதுமக்கள் எனப் பலரும் கலந்துகொண்டனர்.
