கிரேக்கத் தலைநகர் ஏதென்ஸில் சக்திவாய்ந்த வெடிப்புச் சம்பவம்: கட்டிடம் தரைமட்டம்; இருவர் காயம்
கிரேக்கத் தலைநகர் ஏதென்ஸில் அமைந்துள்ள புகழ்பெற்ற அக்ரோபோலிஸ் வரலாற்றுச் சிறப்புமிக்க பகுதிக்கு அருகே வெள்ளிக்கிழமை காலை இடம்பெற்ற சக்திவாய்ந்த வெடிப்புச் சம்பவத்தில், இரண்டு மாடி கட்டிடம் ஒன்று முற்றாக இடிந்து விழுந்து தரைமட்டமாகியுள்ளது. இச்சம்பவத்தில் குறைந்தது இருவர் காயமடைந்துள்ளதுடன், கட்டிடக் இடிபாடுகளுக்குள் எவரேனும் சிக்கியுள்ளனரா என மீட்புக் குழுவினர் தீவிர தேடுதல் வேட்டையில் ஈடுபட்டு வருகின்றனர்.
அக்ரோபோலிஸ் குன்றின் அடிவாரத்தில் அமைந்துள்ள பிளாக்கா எனும் வரலாற்றுச் சிறப்புமிக்க சுற்றுலாப் பகுதியிலேயே இப் பயங்கர வெடிப்புச் சம்பவம் நிகழ்ந்துள்ளது. சமையல் எரிவாயு கசிவு காரணமாகவே இந்த வெடிப்பு ஏற்பட்டிருக்கலாம் என உள்ளூர் ஊடகங்கள் சந்தேகிக்கின்றன. இருப்பினும், வெடிப்புக்கான துல்லியமான காரணம் குறித்து அதிகாரிகள் உடனடியாக அதிகாரப்பூர்வ அறிவிப்பு எதையும் வெளியிடவில்லை.
வெடிப்பு நிகழ்ந்த கட்டிடம் முழுமையாக இடிந்து வீழ்ந்ததில், அதற்கு அருகிலிருந்த பல கட்டிடங்களும், வீதியில் நிறுத்தப்பட்டிருந்த வாகனங்களும் கடுமையாக சேதமடைந்தன. சம்பவ இடத்திற்கு விரைந்த தீயணைப்புப் படையினர், அருகிலிருந்த கட்டிடத்தில் சிக்கியிருந்த இரண்டு பெண்களை மீட்டு வைத்தியசாலையில் அனுமதித்துள்ளனர். மேலும், வீதியால் செல்பவர் ஒருவரும் லேசான காயங்களுக்கு உள்ளாகியுள்ளதாகத் தெரிவிக்கப்படுகிறது.
இடிபாடுகளுக்குள் மனிதர்கள் யாரேனும் சிக்கியிருக்கலாம் என்ற சந்தேகத்தின் பேரில், மோப்ப நாய்களின் உதவியுடன் மீட்புப் படையினர் சீரமைப்பு மற்றும் தேடுதல் பணிகளைத் தொடர்ந்து முன்னெடுத்து வருகின்றனர்.
சம்பவம் குறித்து அப்பகுதிவாசி ஒருவர் தெரிவிக்கையில், இடிந்து விழுந்த கட்டிடத்தின் மேல் மாடியில் வயதான தம்பதியினர் வசித்து வந்ததாகவும், மேலும் ஒரு பகுதியில் சுற்றுலாப் பயணிகளுக்கான தற்காலிக தங்குமிடங்கள் இயங்கி வந்ததாகவும் குறிப்பிட்டார். அருகில் உள்ள தேவாலயம் ஒன்றின் ஜன்னல்கள் அனைத்தும் வெடிப்பின் அதிர்வால் நொறுங்கியுள்ளதால், வரவிருக்கும் ஞாயிற்றுக்கிழமை வழிபாடுகள் திறந்தவெளியில் நடைபெறும் என அத்தேவாலயத்தின் போதகர் தெரிவித்துள்ளார்.
சம்பவப் பகுதியை பொலிஸார் தமது கட்டுப்பாட்டிற்குள் கொண்டுவந்துள்ளடன், மேலதிக விசாரணைகளையும் மீட்பு நடவடிக்கைகளையும் தீவிரப்படுத்தியுள்ளனர்.
