ஐக்கிய அரபு இராச்சியத்திற்குப் பயணிக்கிறீர்களா? இந்த மருந்துகள் உங்களைச் சிக்கலில் ஆழ்த்தலாம்!

ஐக்கிய அரபு இராச்சியத்திற்கு (UAE) பயணிக்கும் சுற்றுலாப் பயணிகள் மற்றும் வெளிநாட்டுப் பயணிகள், தங்களுடன் எடுத்துச் செல்லும் மருந்துகள் தொடர்பில் மிகுந்த கவனம் செலுத்த வேண்டும் என அறிவுறுத்தப்படுகின்றனர். குறிப்பாக, சில மருந்துகளை எடுத்துச் செல்வதற்கு முன் மருத்துவ அனுமதி அல்லது உரிய ஆவணங்கள் அவசியமாக இருக்கலாம்.

செல்லப்பிராணிகள் மற்றும் பண்ணை விலங்குகளுக்கு பொதுவாகப் பயன்படுத்தப்படும் சிப்ரோஃப்ளோக்சசின் (Ciprofloxacin) என்ற நுண்ணுயிர் எதிர்ப்பு மருந்தின் கால்நடை மருத்துவப் பயன்பாட்டுக்கு நவம்பர் 1ஆம் திகதி முதல் தடை விதிக்கப்படுவதாக ஐக்கிய அரபு இராச்சியத்தின் எமிரேட்ஸ் மருந்து நிறுவனம் (Emirates Drug Establishment – EDE) அறிவித்துள்ளது.

இந்தத் தடை, குறித்த மருந்தைக் கொண்ட கால்நடை மருத்துவ மருந்துகள் மற்றும் அவற்றின் மூலப்பொருட்களுக்கும் பொருந்தும். இதனால் எட்டு இறக்குமதி செய்யப்பட்ட தயாரிப்புகள் உட்பட மொத்தம் ஒன்பது தயாரிப்புகள் பாதிக்கப்படவுள்ளன.

குறித்த மருந்தை உற்பத்தி செய்தல், இறக்குமதி செய்தல் மற்றும் விநியோகித்தல் ஆகியவற்றை நிறுத்துமாறு சம்பந்தப்பட்ட நிறுவனங்களுக்கு அறிவுறுத்தப்பட்டுள்ளது. மேலும், ஏற்கெனவே கையிருப்பில் உள்ள மருந்துகளை நிர்ணயிக்கப்பட்ட காலக்கெடுவுக்குள் அகற்ற வேண்டும் என்றும், எஞ்சிய கையிருப்புகளை மீள ஏற்றுமதி செய்யவோ அல்லது அங்கீகரிக்கப்பட்ட நடைமுறைகளுக்கு அமைய அழிக்கவோ வேண்டும் என்றும் தெரிவிக்கப்பட்டுள்ளது.

எனினும், இந்தத் தடை தனிப்பட்ட பயணிகள் தங்களது பயணப் பொதிகளில் எடுத்துச் செல்லும் கால்நடை மருந்துகளுக்கும் பொருந்துமா என்பது தொடர்பில் தெளிவான விளக்கம் வெளியிடப்படவில்லை. அதேவேளை, மனிதர்களுக்குப் பரிந்துரைக்கப்படும் சிப்ரோஃப்ளோக்சசின் மருந்து, EDE வெளியிட்டுள்ள கட்டுப்படுத்தப்பட்ட மருந்துகளின் பட்டியலில் இடம்பெறவில்லை எனத் தெரிவிக்கப்படுகிறது.

எந்த மருந்துகளை எடுத்துச் செல்லலாம்?

எமிரேட்ஸ், எதிஹாட் மற்றும் ஏர் அரேபியா போன்ற விமான நிறுவனங்கள், தடைசெய்யப்பட்ட மற்றும் ஆபத்தான பொருட்கள் தொடர்பான விதிமுறைகளைக் கொண்டுள்ளன. இருப்பினும், மருந்துகளைப் பயணிகள் எடுத்துச் செல்வது தொடர்பான கட்டுப்பாடுகள், சம்பந்தப்பட்ட மருந்து ஒழுங்குபடுத்தும் அதிகாரிகளின் விதிமுறைகளையும் பொறுத்துள்ளது.

2022 செப்டெம்பர் 15ஆம் திகதியிட்ட EDE கட்டுப்படுத்தப்பட்ட மருந்துகளின் பட்டியலில், சுமார் 268 மருந்துகள் இடம்பெற்றுள்ளன. அவற்றில் சில முற்றாகத் தடை செய்யப்பட்டுள்ளதுடன், ஏனைய சில மருந்துகளை மருத்துவப் பரிந்துரை அல்லது உரிய மருத்துவ ஆவணங்களுடன் எடுத்துச் செல்ல அனுமதி வழங்கப்படுகிறது.

முற்றாகத் தடை செய்யப்பட்ட மருந்துகள்

ஹெரோயின், கொக்கெய்ன், கஞ்சா செடி மற்றும் அதன் பிசின், THC, செயற்கைக் கன்னாபினாய்டுகள், LSD, MDMA, மெஸ்கலின், காத் (Khat), சைலோசைபின் காளான்கள், பியோட்டி மற்றும் அபின் செடி போன்றவை தடைசெய்யப்பட்ட பொருட்களின் பட்டியலில் இடம்பெறுகின்றன.

யோஹிம்பே மரப்பட்டை மற்றும் 3-மெத்தில் ஃபெண்டானில் உள்ளிட்ட சில ஃபெண்டானில் வகைகளும் இந்தப் பட்டியலில் அடங்குகின்றன.

மருத்துவ அனுமதியுடன் எடுத்துச் செல்லக்கூடிய மருந்துகள்

சில கட்டுப்படுத்தப்பட்ட மருந்துகளை உரிய மருத்துவப் பரிந்துரை அல்லது அங்கீகரிக்கப்பட்ட மருத்துவ அறிக்கையுடன் எடுத்துச் செல்ல முடியும். பொதுவாக, பயணத்தின் காலப்பகுதிக்குத் தேவையான அளவு அல்லது மூன்று மாதங்களுக்கான மருந்தளவு ஆகியவற்றில் குறைவான அளவே அனுமதிக்கப்படும் எனத் தெரிவிக்கப்படுகிறது.

இவ்வகையில் இடம்பெறக்கூடிய மருந்துகள்:

- வலி நிவாரணிகள்: கோடீன், டிராமடோல், மார்பின், ஆக்ஸிகோடோன், ஹைட்ரோகோடோன், மெத்தடோன், ஃபெண்டானில் மற்றும் பெத்திடின்.
- பதற்றத்தைக் குறைக்கும் மருந்துகள்: டயஸெபாம் (Valium), அல்பிரசோலாம் (Xanax), குளோனாசெபாம் மற்றும் லோராசெபாம்.
- தூக்கத்திற்கான மருந்துகள்: சோல்பிடெம், சோபிக்ளோன் மற்றும் சலெப்ளோன்.
- நரம்பு வலி மற்றும் வலிப்பு நோய்களுக்கான மருந்துகள்: பிரெகாபலின், காபாபென்டின் மற்றும் ஃபெனோபார்பிட்டல்.
- கவனக்குறைவு மற்றும் அதீத செயல்பாட்டுக் குறைபாட்டுக்கான மருந்துகள்: மெத்தில்ஃபெனிடேட், ஆம்பெட்டமைன் மற்றும் லிஸ்டெக்ஸாம்ஃபெட்டமைன்.
- ஏனைய மருந்துகள்: சூடோஎஃபெட்ரின், எஃபெட்ரின், ஃபென்டர்மின், புப்ரெனோர்ஃபின் மற்றும் கெட்டமின்.

எமிரேட்ஸ் விமான நிறுவனத்தின் தகவலின்படி, கட்டுப்படுத்தப்பட்ட மருந்துகளை எடுத்துச் செல்லும் பயணிகள், பயணத்திற்கு முன்னர் ஐக்கிய அரபு இராச்சியத்தின் சுகாதார அமைச்சின் இணையத்தளம் ஊடாகத் தேவையான அனுமதியைப் பெற வேண்டியிருக்கலாம்.

முன் அனுமதியின்றி எடுத்துச் செல்லக்கூடிய மருந்துகள்

பொதுவாக, மருந்தகங்களில் பரிந்துரையின்றி வாங்கக்கூடிய மருந்துகள் மற்றும் கட்டுப்பாடுகளுக்கு உட்படாத மருத்துவப் பரிந்துரை மருந்துகளுக்கு முன் அனுமதி தேவையில்லை என எமிரேட்ஸ் தெரிவிக்கிறது.

பாரசிட்டமோல், ஐபுபுரூஃபன், ஒவ்வாமைக்கான சில மருந்துகள், இன்சுலின், இரத்த அழுத்தத்தைக் கட்டுப்படுத்தும் மருந்துகள் மற்றும் சிப்ரோஃப்ளோக்சசின் போன்ற நுண்ணுயிர் எதிர்ப்பு மருந்துகள் EDE கட்டுப்படுத்தப்பட்ட மருந்துகளின் பட்டியலில் இடம்பெறவில்லை எனக் குறிப்பிடப்பட்டுள்ளது.

இருப்பினும், மருந்துகளை அவற்றின் அசல் பொதிகளில் எடுத்துச் செல்வதுடன், மருத்துவப் பரிந்துரையையும் வைத்திருப்பது பாதுகாப்பானது.

விமான நிறுவனங்களின் விதிமுறைகள் என்ன?

எதிஹாட் விமான நிறுவனமும் மருத்துவப் பயன்பாட்டிற்கான பரிந்துரை மற்றும் பரிந்துரையற்ற மருந்துகளுக்கு விலக்குகளை வழங்குகிறது. அதேவேளை, அவுஸ்திரேலியாவிலிருந்து புறப்படும் விமானங்களில் தூள் வடிவிலான பொருட்களுக்குச் சில வரம்புகள் விதிக்கப்பட்டுள்ளன. அமெரிக்காவிலிருந்து பயணிக்கும்போது, மருத்துவப் பரிந்துரையுடன் சீல் செய்யப்பட்ட தூள் வடிவிலான மருந்துகளுக்கு சில விலக்குகள் வழங்கப்படுகின்றன.

ஏர் அரேபியா விமானத்தில், தனிப்பட்ட மருத்துவப் பயன்பாட்டிற்கான பாதரச மருத்துவ வெப்பமானியைப் பாதுகாப்புப் பெட்டியில் வைத்து, பயணப்பொதியில் எடுத்துச் செல்ல அனுமதி வழங்கப்படுகிறது. ஒட்சிசன் சிலிண்டர்களைப் பொறுத்தவரை, விமான நிறுவனத்தின் நிபந்தனைகளைப் பூர்த்தி செய்யும் அங்கீகரிக்கப்பட்ட மருத்துவச் சிலிண்டர்கள் மட்டுமே ஏற்றுக்கொள்ளப்படும்.

பயணிகள் கவனிக்க வேண்டிய முக்கிய விடயங்கள்

மருந்துகளை எடுத்துச் செல்வதற்கு முன்னர், அவற்றின் வணிகப் பெயரை மட்டும் நம்பாமல், மருந்தில் உள்ள செயற்படும் மூலப்பொருளின் பெயரை (Generic Name) அடிப்படையாகக் கொண்டு கட்டுப்பாடுகளைச் சரிபார்க்க வேண்டும். ஏனெனில், EDE பட்டியலில் மருந்துகளின் செயற்படும் மூலப்பொருட்களின் பெயர்களே பயன்படுத்தப்படுகின்றன.

ஒரு மருந்து தொடர்பில் சந்தேகம் இருந்தால், பயணத்திற்கு முன்னர் அருகிலுள்ள ஐக்கிய அரபு இராச்சியத் தூதரகம் அல்லது துணைத் தூதரகத்தைத் தொடர்புகொண்டு தெளிவுபடுத்திக்கொள்ளுமாறு அறிவுறுத்தப்படுகிறது. விமான நிறுவனத்திடம் தொடர்புகொண்டு, குறிப்பிட்ட மருந்தை விமானத்தின் பயணிகள் அறையிலோ அல்லது பொதிகளிலோ எடுத்துச் செல்ல முடியுமா என்பதையும் உறுதிப்படுத்திக்கொள்ளலாம்.

மருத்துவப் பரிந்துரைகள் மற்றும் மருந்துகளின் அசல் பொதிகளை உடன் வைத்திருப்பதுடன், முன் அனுமதி தேவைப்படும் மருந்துகளுக்கான அனுமதியைப் பெறுவதற்குப் போதிய கால அவகாசத்தையும் ஒதுக்கிக்கொள்ள வேண்டும்.

முக்கிய குறிப்பு: மருந்துகள் தொடர்பான விதிமுறைகள் காலப்போக்கில் மாறக்கூடும். எனவே, பயணத்திற்கு முன்னர் தற்போதைய அதிகாரபூர்வ விதிமுறைகளைச் சரிபார்ப்பது அவசியமாகும்.