ஷிராந்தி ராஜபக்ஷவின் மருத்துவ நிலை குறித்து அரசாங்கம் தெளிவுபடுத்தல்
முன்னாள் முதன்மைப் பெண்மணி ஷிராந்தி ராஜபக்ஷவின் இதய நிலைமை தொடர்பாகப் பரிசோதிப்பதற்காக, இன்று காலை அவருக்கு இரத்த நாளப் பரிசோதனை சிகிச்சை மேற்கொள்ளப்பட்டதாக அமைச்சரவை பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.
அமைச்சரவை முடிவுகளை அறிவிக்கும் செய்தியாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் இதனைக் குறிப்பிட்டார்.
இரத்த நாளப் பரிசோதனை முடிவுகளை மருத்துவக் குழுவினர் விரிவாக ஆராய்ந்த பின்னரே, அவருக்கு அறுவை சிகிச்சை தேவையா அல்லது வேறு வகையான சிகிச்சைகள் அளிக்கப்பட வேண்டுமா என்பது குறித்து முடிவு செய்யப்படும் என அமைச்சர் மேலும் தெரிவித்தார்.
"குறிப்பிட்ட அந்த நேரத்தில் அவருக்கு எந்தவித அறுவை சிகிச்சையும் செய்யப்படவில்லை. இரத்த நாளப் பரிசோதனை மட்டுமே மேற்கொள்ளப்பட்டது" என்று அமைச்சர் நளிந்த ஜயதிஸ்ஸ தெளிவுபடுத்தினார்.
தொடர்ந்து கருத்துத் தெரிவித்த அவர், மருத்துவக் குழுவின் பரிந்துரைக்கு அமைவாக ஷிராந்தி ராஜபக்ஷவிற்கு இதயத் தமனி மாற்று அறுவை சிகிச்சை (சி.ஏ.பி.ஜி.) தேவையா, இரத்த நாள விரிவாக்கி பொருத்தப்பட வேண்டுமா அல்லது வேறு பொருத்தமான சிகிச்சைகள் வழங்கப்பட வேண்டுமா என்பது தீர்மானிக்கப்படும் என்றார்.
கொழும்பு தேசிய மருத்துவமனையில் திறந்த இதய அறுவை சிகிச்சைகள் மற்றும் இரத்த நாள விரிவாக்கி பொருத்துவதற்கான சிகிச்சைகளுக்கு நீண்ட காத்திருப்புப் பட்டியல்கள் இருந்தபோதிலும், நிலைமையின் தன்மையைக் கருத்திற் கொண்டு, மருத்துவக் குழுவின் பரிந்துரைகளின் அடிப்படையில் தேவையான சிகிச்சைகள் விரைவாக வழங்கப்படும் என்றும் அமைச்சர் குறிப்பிட்டார்.
முன்னதாக, அக்டோபர் 12 அன்று சிறைச்சாலையில் இருந்தபோது ஷிராந்தி ராஜபக்ஷவிற்கு திடீரென இதயப் பாதிப்பு ஏற்பட்டு, அவர் கொழும்பு தேசிய மருத்துவமனையின் இதய அறுவை சிகிச்சைப் பிரிவில் அனுமதிக்கப்பட்டதாகவும், அங்கு அவருக்குத் திறந்த இதய அறுவை சிகிச்சை நடைபெறுவதாகவும் அவரது சட்டத்தரணிகள் நீதிமன்றத்தில் முறையிட்டனர். இதனைத் தொடர்ந்து, இத்தகவலின் உண்மைத் தன்மையை உடனடியாக உறுதிப்படுத்துமாறு கொழும்பு முதன்மை நீதவான் நீதிமன்றம் சிறைச்சாலை அதிகாரிகளுக்கு உத்தரவிட்டிருந்தமை குறிப்பிடத்தக்கது.
