ஞானசார தேரரின் காவி ஆடை கழற்றப்பட்ட விவகாரம்: கம்மன்பிலவின் குற்றச்சாட்டுகள் குறித்து பொலிஸ் விசாரணை!
வெலிக்கடைச் சிறைச்சாலையில் பூஜ்ய கலகொடஅத்தே ஞானசார தேரரின் காவி ஆடை பலவந்தமாகக் கழற்றப்பட்டதாகக் கூறப்படும் விவகாரம் தொடர்பாக முன்வைக்கப்பட்டுள்ள குற்றச்சாட்டுகள் குறித்து பொலிஸ் விசாரணை நடத்தப்படும் என்று அமைச்சரவைப் பேச்சாளர் அமைச்சர் நளிந்த ஜயதிஸ்ஸ தெரிவித்துள்ளார்.
PHU கட்சியின் தலைவர் உதய கம்மன்பில அண்மையில் நடத்திய ஊடகவியலாளர் சந்திப்பொன்றில், சிறைச்சாலை அதிகாரிகள் தனது எதிர்ப்பையும் மீறி பலவந்தமாகக் காவி ஆடையைக் கழற்றியதாக ஞானசார தேரர் தம்மிடம் கூறியதாகத் தெரிவித்திருந்தார். மேலும், தேரருக்குச் சிறைச்சாலை ஆடையைப் பலவந்தமாக அணிவிப்பதை, செல்வாக்குமிக்க நபர் ஒருவருக்குக் காட்டுவதற்காக அதிகாரி ஒருவர் காணொளி அழைப்பு (Video call) எடுத்ததாகவும் கம்மன்பில குற்றம் சாட்டியிருந்தார்.
வாராந்த அமைச்சரவை முடிவுகளை அறிவிக்கும் ஊடகவியலாளர் சந்திப்பில், கம்மன்பிலவின் இக்குற்றச்சாட்டுகள் குறித்துக் கருத்துத் தெரிவித்த அமைச்சர் நளிந்த ஜயதிஸ்ஸ, சிறைச்சாலை அதிகாரிகளால் உத்தியோகபூர்வ முறைப்பாடு செய்யப்பட்டவுடன் இது தொடர்பான விசாரணைகள் ஆரம்பிக்கப்படும் எனக் குறிப்பிட்டுள்ளார்.
முன்வைக்கப்பட்டுள்ள குற்றச்சாட்டுகள் மிகவும் பாரதூரமானவை என்பதால், இச்சம்பவம் உண்மையில் நடந்ததா மற்றும் எந்தச் சூழ்நிலையில் நடந்தது என்பதை உறுதிப்படுத்த முறைப்படியான விசாரணை அவசியம் என அமைச்சர் சுட்டிக்காட்டினார்.
"தான் கூறியவை, பார்த்தவை மற்றும் கேட்டவை குறித்து கம்மன்பில இப்போது விசாரணையின் போது வெளிப்படுத்த முடியும்" என்று அமைச்சர் ஜயதிஸ்ஸ தெரிவித்தார்.
கம்மன்பிலவின் இந்த வெளிப்படுத்துதல் சம்பவத்தின் உண்மைத் தன்மையைத் தெளிவுபடுத்த உதவும் என்றும், உண்மைகளைக் கண்டறிவதற்காக அவரிடம் வாக்குமூலம் பதிவு செய்யப்படலாம் என்றும் அவர் மேலும் கூறினார்.
