275 மில்லியன் இழப்பீடு செலுத்தாத கெஹெலியவுக்கு எதிராக நீதிமன்ற அவமதிப்பு வழக்கு!

தரமற்ற மருந்துகள் கொள்முதல் செய்யப்பட்ட வழக்கில், உச்ச நீதிமன்றத்தால் விதிக்கப்பட்ட 275 மில்லியன் ரூபாய் நஷ்டஈட்டுத் தொகையை அரசுக்குச் செலுத்தத் தவறியமைக்காக, முன்னாள் சுகாதார அமைச்சர் கெஹெலிய ரம்புக்வெல்ல உள்ளிட்ட ஐந்து முன்னாள் உயர் அதிகாரிகளுக்கு எதிராக உச்ச நீதிமன்றத்தில் நீதிமன்ற அவமதிப்பு வழக்குத் தாக்கல் செய்யப்பட்டுள்ளது.

சுப்பரதன்மைக்கான சர்வதேச இலங்கை அமைப்பு (TISL) இந்த மனுவை தாக்கல் செய்துள்ளது.

கடந்த 2026 ஆம் ஆண்டு மார்ச் மாதம் 27 ஆம் திகதி, உரிய நடைமுறைகளை மீறி அவசர கால கொள்முதல் என்ற போர்வையில் முறைகேடாக மருந்துகளைக் கொள்முதல் செய்தமை தொடர்பில் வரலாற்றுச் சிறப்புமிக்க தீர்ப்பு ஒன்றை உச்ச நீதிமன்றம் வழங்கியிருந்தது. அதன்படி, அரச நிதிக்கு ஏற்படுத்தப்பட்ட இழப்பை ஈடுசெய்யும் வகையில், ஐந்து பிரதிவாதிகளும் சேர்ந்து மொத்தம் 275 மில்லியன் ரூபாயை அரசுக்குச் செலுத்த வேண்டும் என உத்தரவிடப்பட்டிருந்தது.

குறித்த தீர்ப்பின் பிரகாரம்:

முன்னாள் சுகாதார அமைச்சர் கெஹெலிய ரம்புக்கவெல்ல – 75 மில்லியன் ரூபாய்

முன்னாள் சுகாதார அமைச்சின் செயலாளர் – 50 மில்லியன் ரூபாய்

தேசிய மருந்துகள் ஒழுங்குபடுத்தல் அதிகாரசபையின் (NMRA) முன்னாள் தலைவர் – 50 மில்லியன் ரூபாய்

தேசிய மருந்துகள் ஒழுங்குபடுத்தல் அதிகாரசபையின் முன்னாள் முதன்மை நிர்வாக அதிகாரி (CEO) – 50 மில்லியன் ரூபாய்

மருத்துவ விநியோகப் பிரிவின் முன்னாள் பணிப்பாளர் – 50 மில்லியன் ரூபாய்

என தனித்தனியாக தொகைகளைச் செலுத்த வேண்டும் என உத்தரவிடப்பட்டது.

தரமற்ற மருந்துகளைத் தனியார் நிறுவனத்திடம் இருந்து கொள்முதல் செய்வதற்காக, முறையான நடைமுறைகளைத் தவிர்த்து அவசரகாலக் கொள்முதலை நியாயப்படுத்த பிரதிவாதிகள் முனைந்த போதிலும், அதற்கான எவ்வித அவசியமும் அங்கு இருக்கவில்லை என்பதை நீதிமன்றம் தெளிவுபடுத்தியது. இதன்மூலம், அரசியல் அமைப்பின் 12(1) உறுப்புரையின் கீழ் உறுதிப்படுத்தப்பட்டுள்ள சட்டத்தின் முன் அனைவரும் சமம் என்ற அடிப்படை உரிமையை பிரதிவாதிகள் தெரிந்தே மீறியுள்ளனர் என்றும் உச்ச நீதிமன்றம் சுட்டிக்காட்டியிருந்தது.

எனினும், நீதிமன்ற உத்தரவு பிறப்பிக்கப்பட்டு நீண்ட நாட்களாகியும் குறித்த நஷ்டஈட்டுத் தொகை செலுத்தப்படவில்லை என்பதை உச்ச நீதிமன்றம் மற்றும் சுகாதார அமைச்சிடம் இருந்து உறுதிப்படுத்திய பின்னரே TISL இந்த சட்ட நடவடிக்கையை முன்னெடுத்துள்ளது.

நீதிமன்றத் தீர்ப்பில் பணம் செலுத்துவதற்கான குறிப்பிட்ட காலக்கெடு எதுவும் விதிக்கப்படாத போதிலும், அத்தகைய உத்தரவுகள் உடனடியாக நிறைவேற்றப்பட்டிருக்க வேண்டும் என TISL சுட்டிக்காட்டியுள்ளது. நீதிமன்றத் தீர்ப்பை தொடர்ந்து புறக்கணித்து வருவது உச்ச நீதிமன்ற உத்தரவை வேண்டுமென்றே மீறும் செயலாகும் என்றும், இது கடுமையான நீதிமன்ற அவமதிப்பாகும் என்றும் அமைப்பு குற்றம் சாட்டியுள்ளது.

அரசியலமைப்பின் 105(3) உறுப்புரை மற்றும் 2024 ஆம் ஆண்டின் 8 ஆம் இலக்க நீதிமன்ற அவமதிப்பு சட்டத்தின் கீழ் SC/Contempt/09/2026 என்ற வழக்கு இலக்கத்தில் இந்த மனு தாக்கல் செய்யப்பட்டுள்ளது. சட்டத்தின் ஆட்சியையும் (Rule of Law) அரசியலமைப்பு ரீதியான பொறுப்புக்கூறலையும் உறுதிப்படுத்துவதற்கு உச்ச நீதிமன்றத்தின் தீர்ப்புகளை மதித்து நடப்பது இன்றியமையாதது எனத் தெரிவித்துள்ள TISL, இந்த சட்டமீறல் குறித்து ஆராய்ந்து உரிய சட்ட நடவடிக்கை எடுக்குமாறு உச்ச நீதிமன்றத்தைக் கேட்டுக்கொண்டுள்ளது.