ஞானசார தேரர் எனது நண்பர், ஆனால் சட்டத்தின் முன் அனைவரும் சமம்: அமைச்சர் லால் காந்த திட்டவட்டம்
கலகொடஅத்தே ஞானசார தேரர் தனது தனிப்பட்ட நண்பர் என்ற போதிலும், அந்த நட்பு அவரை நாட்டின் சட்டத்திற்கு அப்பால் கொண்டு சென்றுவிடாது என்று விவசாய, நீர்ப்பாசன மற்றும் கிராமிய அபிவிருத்தி அமைச்சர் கே.டி. லால் காந்த தெரிவித்துள்ளார்.
அரசாங்கம் திட்டமிட்டு பௌத்த மதகுருமார்களை இலக்கு வைப்பதாகவோ அல்லது பௌத்த மதத்தை சீர்குலைக்க முயல்வதாகவோ சுமத்தப்படும் குற்றச்சாட்டுகளை ஊடகங்களுக்கு கருத்து தெரிவிக்கும் போது அமைச்சர் லால் காந்த திட்டவட்டமாக மறுத்துள்ளார்.
இது குறித்து மேலும் கருத்து வெளியிட்ட அவர், “ஞானசார தேரர் எனது நண்பர்தான். ஆனால் இந்த நாட்டில் ஒரு சட்ட கட்டமைப்பு உள்ளது. அந்தச் சட்டங்களை நாங்கள் உருவாக்கவில்லை. அதேபோன்று அவர் இன்று சந்தித்துள்ள இந்த நிலைமைக்கு நாங்களும் காரணம் அல்ல,” எனச் சுட்டிக்காட்டினார்.
முந்தைய அரசாங்கங்களின் ஆட்சிக் காலத்திலும் ஞானசார தேரர் சிறைவாசம் அனுபவித்துள்ளார் என்பதை நினைவூட்டிய அமைச்சர், அவர் மீது சட்ட நடவடிக்கை எடுக்கப்படுவது இது ஒன்றும் முதன்முறையல்ல என்றும் குறிப்பிட்டார்.
சில எதிர்கட்சி குழுக்கள் தமது அரசியல் சுயலாபங்களுக்காக ஞானசார தேரரின் இந்த நிலைமையைப் பயன்படுத்திக் கொள்ள முயல்வதாகச் சாடிய அமைச்சர், குறித்த தேரர் தொடர்ச்சியாக அரசியல் நிகழ்ச்சிநிரல்களுக்காகப் பயன்படுத்தப்பட்டு வந்துள்ளதாகவும் குற்றம் சாட்டினார். மேலும், தற்போது சிறையிலுள்ள ஏனைய பௌத்த மதகுருமார்கள் குறித்து இவ்வாறான கவலைகள் ஏன் எழுப்பப்படவில்லை என்றும் அவர் கேள்வி எழுப்பினார்.
அத்துடன், ஜனாதிபதி அனுர குமார திசாநாயக்க இது தொடர்பாக சிரேஷ்ட பௌத்த மதத் தலைவர்களுடன் ஏற்கெனவே கலந்துரையாடியுள்ளதாகவும், தேவையான சட்ட சீர்திருத்தங்களை மேற்கொள்வதற்கு அரசாங்கம் தயாராக உள்ளது என்றும் அமைச்சர் தெரிவித்தார்.
எனினும், பௌத்த துறவற ஆடைக்கு (காவி உடை) களங்கம் ஏற்படும் வகையில் பௌத்த துறவிகள் தண்டி்க்கப்படுவதை தாம் தனிப்பட்ட ரீதியில் எதிர்ப்பதாகத் தெரிவித்த அமைச்சர் லால் காந்த, சட்டத்தை மீறுபவர்கள் அதற்குரிய தண்டனையை அனுபவிக்க வேண்டும் என்பதில் மாற்றுக் கருத்து இல்லை என்றும், ஆனால் புனிதமான துறவற ஆடை தண்டனைக்கு உட்படுத்தப்படக் கூடாது என்றும் வலியுறுத்தினார்.
தற்போதுள்ள சட்டக் கட்டமைப்பில் மாற்றங்களை ஏற்படுத்துவதாக இருந்தால், அதனைத் தனிப்பட்ட வழக்குகளுக்கு ஏற்ப மாற்றாமல், உரிய கலந்தாலோசனைகள் மற்றும் வழிமுறைகள் மூலமே மேற்கொள்ள வேண்டும் என்றும் அவர் மேலும் சுட்டிக்காட்டினார்.
