மைக்ரோசொஃப்ட் சேவைகளில் உலகளாவிய முடக்கம் – Outlook, Teams, Copilot பயன்பாடுகளை மீளமைப்பதில் சிக்கல்!

மைக்ரோசொஃப்ட் நிறுவனத்தின் Outlook, Microsoft Teams, Copilot உள்ளிட்ட பல்வேறு சேவைகளில் ஏற்பட்டுள்ள உலகளாவிய தொழில்நுட்பக் கோளாறைச் சீரமைப்பதில் அந்நிறுவனம் தொடர்ந்து சிக்கல்களை எதிர்கொண்டு வருகிறது.

பாதிக்கப்பட்ட சேவைகளை வழமைக்குக் கொண்டுவருவதற்காக முன்னெடுக்கப்பட்ட ஆரம்பகட்ட நடவடிக்கைகள் எதிர்பார்த்த பலனைத் தரவில்லை என மைக்ரோசொஃப்ட் நிறுவனம் தெரிவித்துள்ளது.

பாதிக்கப்பட்ட கணினி அமைப்புகளின் செயல்திறனை மேம்படுத்துவதற்காக மேற்கொள்ளப்பட்ட மாற்றங்கள் எதிர்பார்த்தபடி செயல்படவில்லை எனவும், இதனால் சேவைகளை மீளமைப்பதற்கான மாற்று வழிகளைப் பொறியியலாளர்கள் ஆராய்ந்து வருவதாகவும் நிறுவனம் தனது சமீபத்திய சேவை அறிவிப்பில் குறிப்பிட்டுள்ளது.

மேலும், இணைய வலையமைப்பில் தொடரும் போக்குவரத்து ஏற்றத்தாழ்வுகளைக் கட்டுப்படுத்தி, சேவைகளின் கொள்ளளவை அதிகரிப்பதற்கான மாற்று நடவடிக்கைகள் குறித்தும் ஆராயப்படுவதாகத் தெரிவிக்கப்பட்டுள்ளது.

நவம்பர் 12ஆம் திகதி வியாழக்கிழமை ஆரம்பமான இந்தத் தொழில்நுட்பக் கோளாறு, உலகின் பல்வேறு பிராந்தியங்களுக்கும் பரவியுள்ளது.

இதனால் மைக்ரோசொஃப்ட் நிறுவனத்தின் கிளவுட் அடிப்படையிலான சேவைகளைப் பயன்படுத்தும் வர்த்தக நிறுவனங்கள், அரச நிறுவனங்கள் உள்ளிட்ட பல்வேறு அமைப்புகளின் பயனர்கள் பாதிக்கப்பட்டுள்ளனர்.

குறிப்பாக Outlook மின்னஞ்சல் சேவையைப் பயன்படுத்துவோர் தங்களது மின்னஞ்சல் கணக்குகளை அணுகுதல், மின்னஞ்சல்களை அனுப்புதல் மற்றும் பெறுதல் உள்ளிட்ட செயற்பாடுகளில் சிக்கல்களை எதிர்கொண்டுள்ளனர்.

அதேவேளை, பணியிடத் தொடர்பாடலுக்கான Microsoft Teams மற்றும் செயற்கை நுண்ணறிவு உதவியாளரான Copilot ஆகியவற்றிலும் இணைப்புச் சிக்கல்கள் ஏற்பட்டுள்ளன.

சேவை முடக்கங்களைக் கண்காணிக்கும் Downdetector இணையத்தளத்தின் தகவலின்படி, அமெரிக்காவில் Outlook தொடர்பான முறைப்பாடுகள் சுமார் 130,000 ஆக உச்சமடைந்துள்ளன.

சுமார் ஒரு மணி நேரத்திற்குள் 74 நாடுகள் மற்றும் பிராந்தியங்களில் இந்தப் பாதிப்பு பதிவாகியுள்ளதாகவும், அமெரிக்கா, ஐரோப்பா, ஆசியா மற்றும் ஆபிரிக்கா உள்ளிட்ட பல பிராந்தியங்களைச் சேர்ந்த பயனர்கள் பாதிக்கப்பட்டுள்ளதாகவும் தெரிவிக்கப்பட்டுள்ளது.

கோளாறுக்கான காரணம் என்ன?

மைக்ரோசொஃப்ட் நிறுவனத்தின் சேவையகக் கட்டமைப்பில் ஏற்பட்ட பிரச்சினையே இந்தத் தடங்கலுக்குக் காரணம் என நிறுவனம் தெரிவித்துள்ளது.

சில சேவையகங்கள் எதிர்பாராத விதமாகச் செயலிழந்ததால், தொடர்ந்து இயங்கிய ஏனைய சேவையகங்கள் மீது அதிக சுமை ஏற்பட்டுள்ளது.

இதனையடுத்து, பாதிக்கப்பட்ட சேவையகங்களில் முக்கியமான செயற்பாட்டு நடைமுறை ஒன்று அதிக சுமைக்கு உள்ளானமை, சேவைகளின் கொள்ளளவு குறைவதற்குக் காரணமாக இருந்ததாகக் கண்டறியப்பட்டுள்ளது.

இதனைச் சீரமைப்பதற்காக சேவையகங்களின் அமைப்புகளில் மாற்றங்கள் மேற்கொள்ளப்பட்டதுடன், பாதிக்கப்பட்ட சேவையகங்கள் மீளத் தொடங்கப்பட்டு, இணையப் போக்குவரத்து மாற்று உட்கட்டமைப்புகளுக்கு வழிமாற்றம் செய்யப்பட்டுள்ளது.

எனினும், மீண்டும் செயற்பாட்டுக்குக் கொண்டுவரப்பட்ட சில சேவையகங்கள் அதிகளவிலான இணையப் போக்குவரத்தை எதிர்கொண்டபோது மீண்டும் செயலிழந்துள்ளன. இதனால் சேவைகளை வழமைக்குக் கொண்டுவரும் நடவடிக்கைகள் மேலும் சிக்கலடைந்துள்ளன.

இதேவேளை, பிரச்சினைக்கான காரணத்தைக் கண்டறியும் நோக்கில் புதிய சேவை மேம்படுத்தல்களை முன்னெடுப்பதையும் நிறுவனம் தற்காலிகமாக இடைநிறுத்தியுள்ளது.

இந்தச் சம்பவம் சைபர் தாக்குதல் அல்லது ஊடுருவல் காரணமாக இடம்பெறவில்லை என மைக்ரோசொஃப்ட் நிறுவனத்தின் நிறைவேற்றுத் துணைத் தலைவர் சார்ல்ஸ் லமானா தெரிவித்துள்ளார்.

இதுவரை பாதிக்கப்பட்ட அனைத்து சேவைகளும் முழுமையாக வழமைக்குத் திரும்புவதற்கான உறுதியான காலக்கெடுவை நிறுவனம் அறிவிக்கவில்லை.

சேவையகங்களின் செயற்பாட்டுத் திறன் மீளமைக்கப்படுவதற்கும், பயன்பாடுகள் மீண்டும் இணைக்கப்படுவதற்கும் ஏற்ப சேவைகள் படிப்படியாக வழமைக்குத் திரும்பலாம் என முன்னதாக நிறுவனம் தெரிவித்திருந்தது.

மின்னஞ்சல் பரிமாற்றம், அலுவலகத் தொடர்பாடல் மற்றும் அத்தியாவசிய டிஜிட்டல் செயற்பாடுகளுக்காக மைக்ரோசொஃப்ட் நிறுவனத்தின் கிளவுட் சேவைகளை உலகளாவிய ரீதியில் வர்த்தக மற்றும் அரச நிறுவனங்கள் பெருமளவில் நம்பியுள்ள நிலையில், இந்தச் சேவை முடக்கம் அதன் முக்கியத்துவத்தையும், இத்தகைய தொழில்நுட்பக் கட்டமைப்புகளில் ஏற்படும் கோளாறுகளால் உருவாகக்கூடிய பாதிப்புகளையும் வெளிப்படுத்தியுள்ளது.