நினைவகச் சிப் விலை உயர்வு; ஆப்பிள் பங்குகள் 4% சரிவு – லாப வரம்பு குறையும் என புதிய தலைமை நிர்வாக அதிகாரி எச்சரிக்கை!

உலகளாவிய சந்தையில் நினைவகச் (Memory Chip) சிப்களின் விலை தொடர்ந்து அதிகரித்து வருவதால், ஆப்பிள் நிறுவனத்தின் லாப வரம்பு பாதிக்கப்படுவதாக அந்நிறுவனத்தின் புதிய தலைமை நிர்வாக அதிகாரி ஜோன் டெர்னஸ் எச்சரிக்கை விடுத்துள்ளார். இதன் எதிரொலியாக, செவ்வாய்க்கிழமை நடைபெற்ற பங்குச் சந்தை வர்த்தகத்தில் ஆப்பிள் நிறுவனத்தின் பங்குகள் சுமார் 4 சதவீதம் சரிவடைந்தன.

செயற்கை நுண்ணறிவுத் (AI) தொழில்நுட்பத்தின் வளர்ச்சி காரணமாக, உலகம் முழுவதும் தரவு மையங்களை (Data Centers) அமைப்பதில் தொழில்நுட்ப நிறுவனங்கள் அதிக முதலீடுகளைச் செய்து வருகின்றன. இதனால் நினைவகச் சிப்களுக்கான தேவை அதிகரித்து, சந்தையில் அவற்றுக்கான தட்டுப்பாடும் விலை உயர்வும் ஏற்பட்டுள்ளன.

இதன் தாக்கமாக ஸ்மார்ட்போன்கள், கணினிகள் உள்ளிட்ட மின்னணு சாதனங்களின் விலைகள் இந்த ஆண்டில் அதிகரித்துள்ளன. விநியோகச் சங்கிலி நிர்வாகத்தில் சிறந்து விளங்கும் ஆப்பிள் நிறுவனமும் இந்த விலை உயர்வால் பாதிக்கப்பட்டுள்ளமை தொழில்நுட்பத் துறையில் பெரும் கவனத்தை ஈர்த்துள்ளது.

ஆப்பிள் நிறுவனத்தின் புதிய தலைமை நிர்வாக அதிகாரியாகப் பொறுப்பேற்ற பின்னர் நடைபெற்ற முதலாவது வருமான அறிவிப்பு மாநாட்டில் உரையாற்றிய ஜோன் டெர்னஸ், நினைவகச் சிப்களின் விலை உயர்வு இதுவரை இல்லாத அளவுக்கு இருப்பதாகக் குறிப்பிட்டார்.

மேலும், எதிர்வரும் டிசம்பர் காலாண்டில் நினைவகச் சிப்களின் விலை மேலும் அதிகரிக்கும் எனவும், அதற்குப் பின்னரும் கொள்வனவு விலைகள் தொடர்ந்து உயரக்கூடும் எனவும் அவர் தெரிவித்தார்.

இதற்கிடையில், ஆப்பிள் நிறுவனத்தின் மொத்த இலாப விகிதம் (Gross Margin) ஜூன் காலாண்டில் இருந்ததைவிடக் குறைந்து, செப்டம்பர் காலாண்டில் 47.9 சதவீதமாகப் பதிவாகியுள்ளது. இறக்குமதி வரி மீளளிப்புகளால் கிடைத்த நன்மைகள் இருந்தபோதிலும் இந்தச் சரிவு ஏற்பட்டுள்ளது.

எதிர்வரும் டிசம்பர் காலாண்டில் மொத்த இலாப விகிதம் மேலும் குறைந்து 45 முதல் 46 சதவீதம் வரையிலான நிலையை அடையக்கூடும் என நிறுவனம் கணித்துள்ளது. செயற்கை நுண்ணறிவுத் தொழில்நுட்பத்துடன் கூடிய 'சிரி' (Siri) சேவையை அறிமுகப்படுத்துவதற்கான செலவுகளும் நிறுவனத்துக்குச் சவாலாக அமைந்துள்ளன.

விலை உயர்வின் தாக்கத்தைக் குறைப்பதற்காக, முன்கூட்டியே குறைந்த விலையில் கொள்வனவு செய்யப்பட்ட நினைவகச் சிப்களை ஆப்பிள் பயன்படுத்தி வருவதுடன், எதிர்காலத் தேவைக்கான விநியோகத்தையும் உறுதிப்படுத்தி வருகிறது.

செப்டம்பர் 26ஆம் திகதி நிலவரப்படி, உற்பத்தி நிறுவனங்கள் மற்றும் விநியோகஸ்தர்களிடம் ஆப்பிள் வழங்கிய கொள்வனவு உத்தரவுகளின் பெறுமதி 33 பில்லியன் டொலர்களால் அதிகரித்து 89.7 பில்லியன் டொலர்களாக உயர்ந்துள்ளதாகத் தெரிவிக்கப்பட்டுள்ளது.

புதிய தயாரிப்புகளை அறிமுகப்படுத்தும் ஆப்பிள்

இதற்கிடையில், புதிய தலைமை நிர்வாக அதிகாரியான ஜோன் டெர்னஸ் தலைமையில் ஆப்பிள் நிறுவனம் பல புதிய தயாரிப்புகளை அறிமுகப்படுத்தத் திட்டமிட்டுள்ளது.

அதன் ஒரு பகுதியாக, நிறுவனத்தின் முதலாவது மடிக்கக்கூடிய ஸ்மார்ட்போனான 'iPhone Duo' மற்றும் தொடுதிரை வசதியுடன் கூடிய முதலாவது MacBook கணினிகள் உள்ளிட்ட புதிய தயாரிப்புகள் அறிமுகப்படுத்தப்படவுள்ளன.

உற்பத்திச் செலவுகள் அதிகரித்து வருவதால், தனது தயாரிப்புகளின் விலைகளையும் ஆப்பிள் நிறுவனம் உயர்த்தி வருகிறது. குறிப்பாக, iPhone 18 Pro வரிசை ஸ்மார்ட்போன்களுக்கு நிலவும் அதிக கேள்வியும், விலை உயர்வும் நிறுவனத்தின் நான்காவது காலாண்டு விற்பனை எதிர்பார்ப்புகளைத் தாண்ட உதவியுள்ளன.

எனினும், வாழ்க்கைச் செலவு அதிகரிப்பால் ஏற்கனவே நுகர்வோர் பாதிக்கப்பட்டுள்ள நிலையில், மேலும் விலைகளை உயர்த்துவது வாடிக்கையாளர்களின் கொள்வனவு ஆர்வத்தைக் குறைக்கக்கூடும் எனப் பொருளாதார ஆய்வாளர்கள் எச்சரிக்கின்றனர்.

ஆப்பிள் தயாரிப்புகள் மேலும் விலை உயரக்கூடும் என்ற ஜோன் டெர்னஸின் கருத்து, வாழ்க்கைச் செலவு அதிகரிப்பால் சிரமங்களை எதிர்கொள்ளும் நுகர்வோருக்கு சாதகமான செய்தியல்ல என AJ Bell நிறுவனத்தின் சந்தைகள் பிரிவுத் தலைவர் டான் கோட்ஸ்வொர்த் தெரிவித்துள்ளார்.

இந்தப் பங்குச் சரிவு தொடர்ந்தால், 4.94 டிரில்லியன் டொலர் சந்தை மதிப்பைக் கொண்ட ஆப்பிள் நிறுவனம் 170 பில்லியன் டொலர்களுக்கும் அதிகமான சந்தை மதிப்பை இழக்கக்கூடும் எனக் கணிக்கப்பட்டுள்ளது.

தற்போது ஆப்பிள் நிறுவனத்தின் பங்குகள், அடுத்த 12 மாதங்களுக்கான எதிர்பார்க்கப்படும் வருமானத்தின் அடிப்படையில் சுமார் 35 மடங்கு மதிப்பில் வர்த்தகமாகின்றன. இதேவேளை, அல்பபெட் நிறுவனத்தின் பங்குகள் 18.23 மடங்கிலும், மைக்ரோசொப்ட் நிறுவனத்தின் பங்குகள் 23.43 மடங்கிலும் வர்த்தகமாகி வருகின்றமை குறிப்பிடத்தக்கது.