குழந்தைகள் மீதான பாலியல் துஷ்பிரயோகப் பதிவுகளை நீக்கும் வரை TikTok சேவையை நிறுத்த ஸ்பெயின் கோரிக்கை

ஸ்பெயினில் குழந்தைகள் மீதான பாலியல் துஷ்பிரயோகம் தொடர்பான காணொளிகள் மற்றும் பதிவுகள் முழுமையாக நீக்கப்படும் வரை, TikTok சமூக வலைத்தளத்தின் செயல்பாடுகளை அந்நாட்டில் இடைநிறுத்துமாறு ஸ்பெயின் அரசாங்கம் கோரிக்கை விடுத்துள்ளது.

கடந்த திங்கட்கிழமை வெளியான ஊடக விசாரணை அறிக்கையில், TikTok தளத்தில் குழந்தைகள் மீதான பாலியல் துஷ்பிரயோகத்தைச் சித்தரிக்கும் 1,183 வெளிப்படையான பதிவுகள் கண்டறியப்பட்டதாகவும், அவை மில்லியன் கணக்கான பார்வைகளைப் பெற்றுள்ளதாகவும் தெரிவிக்கப்பட்டதைத் தொடர்ந்து இந்த நடவடிக்கை எடுக்கப்பட்டுள்ளது.

இது தொடர்பாக ஸ்பெயினின் இளைஞர் விவகார அமைச்சர் சிரா ரேகோ (Sira Rego), சட்டமா அதிபர் அலுவலகம் மற்றும் தரவு பாதுகாப்பு நிறுவனத்திடம் முறையிட்டுள்ளார்.

ஸ்பெயினில் TikTok தளத்தைத் தனிப்பட்ட முறையில் தடை செய்யும் அதிகாரம் தனது அமைச்சுக்கு இல்லாத நிலையில், குறித்த சமூக வலைத்தளத்திற்கு எதிராக உரிய நடவடிக்கை எடுக்குமாறு அவர் கோரியுள்ளார்.

“சமூக வலைத்தளங்கள் சட்டம் இல்லாத பிரதேசங்களாக இருக்க முடியாது” என அமைச்சர் சிரா ரேகோ தெரிவித்துள்ளார்.

இதற்கு முன்னரும், செயற்கை நுண்ணறிவுத் தொழில்நுட்பம் மூலம் உருவாக்கப்பட்ட குழந்தைகள் மீதான பாலியல் துஷ்பிரயோகப் படங்கள் மற்றும் காணொளிகள் பரப்பப்படுவதாகக் கூறப்படும் குற்றச்சாட்டுகள் தொடர்பில் X, Meta மற்றும் TikTok ஆகிய சமூக வலைத்தளங்களுக்கு எதிராக விசாரணை நடத்துமாறு ஸ்பெயின் அரசாங்கம் கோரியிருந்தது.

இந்நிலையில், ஸ்பெயினைச் சேர்ந்த உண்மைச் சரிபார்ப்பு அமைப்பான Maldita.es திங்கட்கிழமை வெளியிட்ட விசாரணை அறிக்கையில், குழந்தைகள் மீதான பாலியல் துஷ்பிரயோகத்தைச் சித்தரிக்கும் காணொளிகள் TikTok தளத்தில் குறைந்தது 4.8 கோடி தடவைகள் பார்வையிடப்பட்டுள்ளதாகத் தெரிவிக்கப்பட்டுள்ளது.

மேலும், 26,000-க்கும் அதிகமான பயனர் கணக்குகள் குறித்த உள்ளடக்கங்களைப் பகிர்ந்துகொண்டதுடன், அவை தொடர்பில் கருத்துகளையும் பதிவிட்டுள்ளதாக அந்த அமைப்பு சுட்டிக்காட்டியுள்ளது.

இதனைத் தொடர்ந்து, ஸ்பெயினில் இவ்வாறான உள்ளடக்கங்களை அணுகுவதற்குப் பயன்படுத்தப்பட்டதாக விசாரணையில் அடையாளம் காணப்பட்ட இரண்டு தேடல் சொற்களுக்கான அணுகலை TikTok கட்டுப்படுத்தியுள்ளதாக Maldita.es செவ்வாய்க்கிழமை வெளியிட்ட மேலதிக அறிக்கையில் குறிப்பிட்டுள்ளது.

எனினும், ஏனைய ஐரோப்பிய நாடுகளில் இருந்து மேற்கொள்ளப்படும் தேடல்களின் ஊடாக அதே வகையான சட்டவிரோத உள்ளடக்கங்களைத் தொடர்ந்து அணுக முடிவதாகவும் அந்த அமைப்பு தெரிவித்துள்ளது.

இந்த விவகாரம் தொடர்பில் Reuters செய்தி நிறுவனத்தின் கருத்துக் கோரிக்கைக்கு TikTok உடனடியாகப் பதிலளிக்கவில்லை.