செயற்கை நுண்ணறிவு விரிவாக்கத்திற்காக 3,500 கோடி டொலர் பங்கு வெளியீடு – மெட்டா அறிவிப்பு

செயற்கை நுண்ணறிவுத் (AI) தொழில்நுட்ப மேம்பாட்டிற்கான முதலீடுகளை அதிகரிக்கும் நோக்கில், சுமார் 35 பில்லியன் அமெரிக்க டொலர் பெறுமதியான சாதாரண பங்குகள் மற்றும் மாற்றத்தக்க முன்னுரிமைப் பங்குகளை வெளியிடும் நடவடிக்கையை மெட்டா நிறுவனம் திங்கட்கிழமை ஆரம்பித்துள்ளது.

ஃபேஸ்புக்கின் தாய் நிறுவனமான மெட்டா, செயற்கை நுண்ணறிவுத் துறையில் தனது விரிவாக்க நடவடிக்கைகளுக்குத் தேவையான நிதியைத் திரட்டும் நோக்கில் இந்த நடவடிக்கையை முன்னெடுத்துள்ளது.

மேலும், புதிய வாக்களிக்கும் உரிமையற்ற 'Class C' பங்குகள் பங்குச் சந்தையில் வர்த்தகம் செய்யத் தொடங்கிய பின்னர், சந்தை வழியாக மேலும் 60 பில்லியன் அமெரிக்க டொலர் வரை பங்குகளை விற்பனை செய்யும் தனியான திட்டத்தையும் ஆரம்பிக்கவுள்ளதாக நிறுவனம் தெரிவித்துள்ளது.

இந்தப் புதிய பங்குகள் 2027ஆம் ஆண்டின் முதல் காலாண்டில் வர்த்தகத்திற்கு வரும் என எதிர்பார்க்கப்படுகிறது.

செயற்கை நுண்ணறிவுத் துறையில் போட்டியிடும் OpenAI மற்றும் Anthropic போன்ற நிறுவனங்களுக்கு ஈடுகொடுக்கும் வகையில், தரவு மையங்கள், கணினி செயலாக்கத் திறன் மற்றும் செயற்கை நுண்ணறிவுத் தயாரிப்புகள் ஆகியவற்றில் மெட்டா தனது முதலீடுகளைத் தீவிரப்படுத்தி வருகின்றது.

கடந்த செப்டெம்பர் 30ஆம் திகதிய நிலவரப்படி, மெட்டா நிறுவனத்திடம் 82.45 பில்லியன் அமெரிக்க டொலர் பெறுமதியான பணம், பணத்திற்குச் சமமான சொத்துகள் மற்றும் சந்தைப்படுத்தக்கூடிய பத்திரங்கள் இருந்ததாக, கடந்த வாரம் வெளியிடப்பட்ட காலாண்டு அறிக்கையில் தெரிவிக்கப்பட்டுள்ளது.

அதேவேளை, நிறுவனத்தின் நீண்டகாலக் கடன் 80.92 பில்லியன் அமெரிக்க டொலராகப் பதிவாகியுள்ளது.

மேலும், எதிர்காலத்தில் சுமார் 825 பில்லியன் அமெரிக்க டொலர் செலவினங்களை மேற்கொள்ள நிறுவனம் உறுதிபூண்டுள்ளது. குறிப்பாக, தரவு மையங்கள், செயற்கை நுண்ணறிவுடன் தொடர்புடைய உட்கட்டமைப்புகள் மற்றும் மேகக் கணினிச் சேவைகளுக்கான செயலாக்கத் திறன் ஆகியவற்றில் அதிகரித்து வரும் முதலீடுகளே இந்தச் செலவினங்களுக்கான முக்கிய காரணங்களாகக் குறிப்பிடப்படுகின்றன.

செயற்கை நுண்ணறிவுத் துறையில் தனது நிலையை வலுப்படுத்த மெட்டா பாரிய முதலீடுகளை மேற்கொண்டு வரும் நிலையில், இந்தப் புதிய பங்கு வெளியீடுகள் நிறுவனத்தின் நிதித் திரட்டல் நடவடிக்கைகளில் முக்கியத்துவம் பெற்றுள்ளன.