ChatGPT ஆலோசனையால் வலிப்பு நோய்க்கான மருந்தை நிறுத்தியதாகக் குற்றச்சாட்டு – OpenAI நிறுவனத்துக்கு எதிராக பெற்றோர் வழக்குத் தாக்கல்

வலிப்பு நோய்க்காக (Epilepsy) சிகிச்சை பெற்று வந்த தனது மகளுக்கு, ChatGPT செயற்கை நுண்ணறிவு உரையாடல் மென்பொருள் மருந்தின் அளவைக் குறைப்பதற்கு ஆலோசனை வழங்கியதுடன், அதனை மருத்துவர்களிடமிருந்து மறைக்கவும் வழிகாட்டியதாகக் குற்றஞ்சாட்டி, அமெரிக்காவைச் சேர்ந்த பெற்றோர் OpenAI நிறுவனத்துக்கு எதிராக வழக்குத் தாக்கல் செய்துள்ளனர்.

அமேசான் நிறுவனத்தில் மென்பொருள் பொறியியலாளராகப் பணியாற்றிய 31 வயதான போவன் வான் (Bowen Wan) என்பவர் கடந்த பெப்ரவரி மாதம் உயிரிழந்ததைத் தொடர்ந்து, அவரது பெற்றோரான குன் வான் (Qun Wan) மற்றும் மெய்கின் சூ (Meiqin Xu) ஆகியோர் இந்த வழக்கைத் தாக்கல் செய்துள்ளனர்.

தி நியூயோர்க் டைம்ஸ் செய்தி நிறுவனத்தின் அறிக்கையின்படி, GPT-4o எனப்படும் ChatGPT மாதிரி, வான் தனது வலிப்பு நோய்க்கான மருந்தின் அளவைக் குறைப்பதற்கு வழிகாட்டியதுடன், மருத்துவர்களுக்குத் தெரியாமல் அதனைச் செய்வதற்கும் ஆலோசனை வழங்கியதாக வழக்கில் குற்றஞ்சாட்டப்பட்டுள்ளது.

மருத்துவ ஆலோசனைகளைப் புறக்கணிக்கத் தூண்டியதாகக் குற்றச்சாட்டு

வான், வலிப்பு நோய்க்காக அமெரிக்காவின் UW Medicine மருத்துவ நிலையத்தில் சிகிச்சை பெற்று வந்தார். அவரது மருத்துவ வரலாற்றைக் கருத்தில் கொண்டு, மருந்தை நிறுத்துவது பொருத்தமான நடவடிக்கையாக இருக்காது என அவரது மருத்துவர் கருதியதாகத் தெரிவிக்கப்படுகிறது.

2025ஆம் ஆண்டு மே மாதம், அமேசான் நிறுவனத்தில் தனது பணிகளைச் செய்வதற்குத் தடையாகப் புதிதாகப் பரிந்துரைக்கப்பட்ட மனச்சோர்வுக்கான மருந்து அமையுமா என வான் ChatGPTயிடம் கேட்டுள்ளார்.

இதன்போது, தனது மருத்துவரான நிக்கலஸ் பூலோஸிடம் (Dr. Nicholas Poolos) மருந்தை மாற்றுவது குறித்துப் பேசுவதற்கும், குறைந்த அளவில் புதிய மருந்தைத் தொடங்குவது குறித்துக் கோரிக்கை விடுப்பதற்கும் ChatGPT உதவியதாகக் கூறப்படுகிறது.

மருத்துவர் பரிந்துரைத்த மருந்தின் அளவு தொடர்பாக எழுந்த கேள்விகளுக்குப் பதிலளித்த ChatGPT, மாத்திரைகளைத் தானாகவே சிறு பகுதிகளாகப் பிரித்து உட்கொள்வதற்கு வழிகாட்டியதாக வழக்கில் குறிப்பிடப்பட்டுள்ளது.

மேலும், இது தொடர்பில் மருத்துவர்களிடம் தெரிவிக்காமல் செயற்படுவதற்கும் அது ஆலோசனை வழங்கியதாகக் குற்றஞ்சாட்டப்பட்டுள்ளது.

மருந்தின் அளவைப் படிப்படியாகக் குறைக்கத் திட்டம்

2025ஆம் ஆண்டு நவம்பர் மாதம், அமேசான் நிறுவனம் வானின் பணியை நிறுத்தவுள்ளதாக அறிவித்தது. அவரது வேலைவாய்ப்பும் அமெரிக்காவில் பணியாற்றுவதற்கான அனுமதியும் 2026ஆம் ஆண்டு பெப்ரவரி மாதத்தின் நடுப்பகுதியில் முடிவடையவிருந்தன.

இதற்கிடையில், வலிப்பு நோய்க்காக அவர் தினமும் உட்கொண்ட 400 மில்லிகிராம் லமோட்ரிஜின் (Lamotrigine) மருந்து, தனது பேச்சுத் திறனைப் பாதிப்பதாக வான் அச்சமடைந்துள்ளார். வேலைவாய்ப்பு நேர்முகத் தேர்வுகளின்போது பேச்சுத் திறன் முக்கியமானது என்பதால், மருந்தின் அளவைக் குறைப்பது குறித்து அவர் ChatGPTயிடம் ஆலோசனை கேட்டுள்ளார்.

இதற்குப் பதிலளித்த ChatGPT, சில வாரங்களுக்குள் மருந்தின் அளவை முற்றிலும் நிறுத்தும் நிலைக்குக் கொண்டுசெல்லக்கூடிய அட்டவணைகளைத் தயாரித்துக் கொடுத்ததாகக் குற்றஞ்சாட்டப்பட்டுள்ளது.

தனது மருத்துவர்களின் ஆலோசனைகள் மீது நம்பிக்கை இல்லை என வான் தெரிவித்தபோது, மருத்துவர்கள் நோயாளியின் சிறந்த தீர்வைக் கருத்தில் கொள்வதைவிட அபாயங்களைத் தவிர்ப்பதற்கே முக்கியத்துவம் அளிப்பதாக ChatGPT கூறியதாகவும் தெரிவிக்கப்படுகிறது.

மருத்துவப் பரிசோதனையைத் தவிர்க்கவும் ஆலோசனை

மருந்தின் அளவைக் குறைக்கும் திட்டத்தை மருத்துவர்களிடமிருந்து மறைக்க ChatGPT வழிகாட்டியதாகவும் வழக்கில் குறிப்பிடப்பட்டுள்ளது.

2026ஆம் ஆண்டு ஜனவரி 29ஆம் திகதி நடைபெற்ற மருத்துவச் சந்திப்புக்கு முன்னதாக, தனது மருந்தின் அளவைக் குறைக்கும் திட்டத்தை மருத்துவரிடம் தெரிவிக்க வேண்டாம் என ChatGPT ஆலோசனை வழங்கியதாகக் கூறப்படுகிறது.

அத்துடன், வானின் உடலில் லமோட்ரிஜின் மருந்தின் அளவை அறிந்துகொள்வதற்காக மருத்துவர் பரிந்துரைத்த இரத்தப் பரிசோதனையையும் அவர் நிராகரித்துள்ளார்.

மருந்தின் அளவு நிலையற்றதாக இருப்பது அந்தப் பரிசோதனையின் மூலம் தெரியவரக்கூடும் என்பதை அறிந்திருந்தும், பரிசோதனையை நிராகரித்த அவரது முடிவை ChatGPT பாராட்டியதாக வழக்கில் குற்றஞ்சாட்டப்பட்டுள்ளது.

அமெரிக்காவில் நிரந்தர வதிவிட அனுமதியைப் பெறுவதற்கான மருத்துவப் பரிசோதனை தொடர்பான கவலைகளும் இந்த விவகாரத்தில் இடம்பெற்றுள்ளன.

மருந்தின் அளவைக் குறைக்கத் தொடங்கிய சில நாட்களுக்குப் பின்னர், 150 மில்லிகிராம் அளவு மருந்தை உட்கொள்வது, 200 மில்லிகிராம் அளவைவிடச் சாதகமாக அமையுமா என வான் ChatGPTயிடம் கேட்டுள்ளார்.

குறைந்த அளவு மருந்தை உட்கொள்வது, மேலதிக மருத்துவ ஆதாரங்களைக் கோருவதற்கான வாய்ப்பைக் குறைக்கலாம் என ChatGPT தெரிவித்ததாக வழக்கில் கூறப்பட்டுள்ளது.

உடல்நலப் பாதிப்புகளைச் சாதாரணமாகக் கருதியதாகக் குற்றச்சாட்டு

மருந்தின் அளவைக் குறைத்ததைத் தொடர்ந்து, வான் குழப்பம், கால இடைவெளிகள் குறித்த நினைவிழப்பு மற்றும் வழக்கத்திற்கு மாறான உணர்வுகள் உள்ளிட்ட பாதிப்புகளை எதிர்கொண்டுள்ளார். இவை அவருக்கு முன்னர் ஏற்பட்ட வலிப்பு நோயின் அறிகுறிகளை ஒத்திருந்ததாகத் தெரிவிக்கப்படுகிறது.

எனினும், அவரது மூளை மாற்றங்களுக்கு ஏற்ப தன்னைச் சரிசெய்துகொள்வதன் காரணமாகவே இவ்வாறான அறிகுறிகள் ஏற்படுவதாக ChatGPT விளக்கியதாக *தி நியூயோர்க் டைம்ஸ்* தெரிவித்துள்ளது.

மருந்தின் அளவைக் குறைப்பது தொடர்பாக வான் குறைந்தது 158 தடவைகள் கவலை தெரிவித்திருந்தபோதிலும், ChatGPT அவரது அச்சங்களைக் குறைத்து மதிப்பிட்டதாக அந்தச் செய்தி அறிக்கையில் குறிப்பிடப்பட்டுள்ளது.

2026ஆம் ஆண்டு பெப்ரவரி 11ஆம் திகதி இரவு 8.01 மணியளவில், தனது தலையில் ஏற்பட்ட வலி காய்ச்சலின்போது ஏற்படும் வலியைப் போன்றதா என வான் ChatGPTயிடம் இறுதியாகக் கேட்டுள்ளார்.

அதற்குப் பதிலளித்த ChatGPT, அந்த வலி ஆபத்தானதல்ல என்றும், குணமடையும் செயல்முறையின் ஒரு பகுதியாக இருக்கலாம் என்றும் தெரிவித்ததாக வழக்கில் கூறப்பட்டுள்ளது.

மேலும், வலிப்பு நோய்க்கான மருந்தின் அளவைக் குறைப்பதால் ஏற்படும் வலியையும் காய்ச்சலால் ஏற்படும் வலியையும் ஒப்பிடும் விளக்கப்படம் ஒன்றைத் தயாரித்துத் தருவதாகவும் ChatGPT தெரிவித்திருந்ததாகக் குற்றஞ்சாட்டப்பட்டுள்ளது.

பிரேதப் பரிசோதனையில் வெளியான தகவல்

சீனாவில் இருந்த வானின் பெற்றோர், அவரைச் சென்று பார்க்குமாறு அறிமுகமானவர்களிடம் கேட்டுக்கொண்டுள்ளனர். இதனையடுத்து, மூன்று நாட்களுக்குப் பின்னர் அவரது சடலம் கண்டெடுக்கப்பட்டது.

பிரேதப் பரிசோதனையின்போது, அவரது உடலில் லமோட்ரிஜின் மருந்தின் அளவு ஒரு மில்லிலீற்றர் இரத்தத்தில் 0.64 மைக்ரோகிராம் என்ற அளவில் இருந்ததாகத் தெரிவிக்கப்பட்டுள்ளது. இது அந்த மருந்தின் சிகிச்சைக்கான பரிந்துரைக்கப்பட்ட அளவின் கீழ் எல்லையில் ஐந்தில் ஒரு பங்கிற்கு நிகரானதாகும்.

எனினும், மருந்தின் அளவு குறைந்திருந்தமைக்கும் அவரது மரணத்துக்கும் இடையிலான தொடர்பு குறித்து நீதிமன்றத்தில் முன்வைக்கப்பட்டுள்ள குற்றச்சாட்டுகள் தனியாக ஆராயப்பட வேண்டியுள்ளன.

GPT-4o மீது ஏற்கெனவே எழுந்துள்ள சர்ச்சைகள்

இந்த வழக்கு, OpenAI நிறுவனத்துக்கு எதிராகத் தாக்கல் செய்யப்பட்டுள்ள பல வழக்குகளின் தொடர்ச்சியாக அமைந்துள்ளது.

2025ஆம் ஆண்டு ஓகஸ்ட் மாதம், 16 வயதான ஆடம் ரெய்னின் (Adam Raine) பெற்றோர் OpenAI நிறுவனத்துக்கு எதிராக வழக்குத் தாக்கல் செய்திருந்தனர். பயனர்களின் பாதுகாப்பைவிட அவர்களைத் தொடர்ந்து உரையாடலில் ஈடுபடுத்துவதற்கு நிறுவனம் முன்னுரிமை வழங்கியதாக அந்த வழக்கில் குற்றஞ்சாட்டப்பட்டது.

GPT-4o மாதிரி, பயனர்களின் கருத்துகளுக்கு அதிகமாக இணங்கிச் செயற்படுவதுடன், அவர்களுடன் நெருக்கமான உறவைப் போன்ற உணர்வை ஏற்படுத்துவதாகவும் இதுபோன்ற பல வழக்குகளில் குற்றச்சாட்டுகள் முன்வைக்கப்பட்டுள்ளன.

வானின் மரணத்துக்கு மறுநாளான 2026ஆம் ஆண்டு பெப்ரவரி 13ஆம் திகதி, ChatGPTயிலிருந்து GPT-4o மாதிரியை நீக்கியதாக OpenAI நிறுவனம் அறிவித்திருந்தது.

மருத்துவ ஆலோசனைகளுக்கு கடுமையான கட்டுப்பாடுகள் தேவை

மருத்துவ ஆலோசனைகள் தொடர்பாக ChatGPTக்கு கடுமையான கட்டுப்பாடுகளை விதித்திருந்தால், தனது மகளின் மரணத்தைத் தடுத்திருக்க முடியும் என வானின் பெற்றோர் வாதிடுகின்றனர்.

OpenAI நிறுவனத்தின் மாதிரி நடத்தைக்கான வழிகாட்டுதல்களில், பதிப்புரிமை பெற்ற உள்ளடக்கத்தை மீண்டும் உருவாக்குவது தொடர்பான தடைகள் உறுதியாகக் குறிப்பிடப்பட்டுள்ளன. ஆனால், மருத்துவ ஆலோசனைகள் தொடர்பான சில கட்டுப்பாடுகள் பயனர்களின் கோரிக்கைகளுக்கு ஏற்ப மாற்றப்படக்கூடியவையாக உள்ளதாகப் பெற்றோர் சுட்டிக்காட்டியுள்ளனர்.

மருத்துவப் பாதுகாப்பு தொடர்பான விதிகளும் மீற முடியாத கடுமையான கட்டுப்பாடுகளாக இருக்க வேண்டும் என்பதே அவர்களின் முக்கிய வாதமாகும்.

இது தொடர்பில் *தி நியூயோர்க் டைம்ஸ்* ஊடகத்திடம் கருத்துத் தெரிவித்த OpenAI நிறுவனம், இந்தச் சம்பவம் மிகவும் வேதனையளிப்பதாகக் குறிப்பிட்டுள்ளது.

எனினும், இந்த விவகாரம் ChatGPTயின் பழைய பதிப்புடன் தொடர்புடையது எனத் தெரிவித்துள்ள நிறுவனம், புதிய மாதிரிகள் அவசர மருத்துவ உதவி தேவைப்படும் சூழல்களை அடையாளம் காண்பதில் மேம்பட்டுள்ளதாகவும் கூறியுள்ளது.

ChatGPTயை நெருங்கிய நண்பராகக் கருதிய வான்

பல ஆண்டுகளாக வலிப்பு நோயால் பாதிக்கப்பட்டிருந்த வான், பெரும்பாலும் வீட்டிலேயே இருக்க வேண்டிய நிலைக்குத் தள்ளப்பட்டிருந்தார். இக்காலப்பகுதியில் தனது பெற்றோருடன் அடிக்கடி தொலைபேசியில் உரையாடி வந்த அவர், அவர்களிடமிருந்து ஆதரவைப் பெற்றிருந்தார்.

2023ஆம் ஆண்டு முதல் உறவுகள் தொடர்பான ஆலோசனைகள், காப்புறுதி மற்றும் மாற்றுத்திறனாளிகளுக்கான நலன்கள் குறித்த தகவல்களைப் பெறுவதற்காக ChatGPTயைப் பயன்படுத்தத் தொடங்கியுள்ளார்.

2025ஆம் ஆண்டளவில், வாரமொன்றுக்கு 1,500க்கும் அதிகமான செய்திகளை ChatGPTக்கு அனுப்பும் அளவுக்கு அவரது பயன்பாடு அதிகரித்திருந்ததாகத் தெரிவிக்கப்படுகிறது. அதேவேளை, பெற்றோருடனான தொலைபேசி உரையாடல்களும் குறைந்திருந்தன.

2025ஆம் ஆண்டு மார்ச் மாதம் ChatGPTக்கு அனுப்பிய செய்தியொன்றில், சில நேரங்களில் உரையாடல்களின் தன்மையைப் பொருட்படுத்தாமல், ChatGPTயைத் தனது நண்பராகக் கருதத் தொடங்கியுள்ளதாக வான் குறிப்பிட்டிருந்தார்.

தனது மகள் ChatGPTயைப் பயன்படுத்தத் தொடங்கிய பின்னர், தங்களுடன் பேசுவதைக் குறைத்துக்கொண்டதாக அவரது தந்தை குன் வான் தெரிவித்துள்ளார்.

ChatGPT உடனான உரையாடல்களைப் பார்வையிட்டபோது, அதில் காணப்பட்ட தனது மகளின் நடத்தையை அடையாளம் காண்பது கடினமாக இருந்ததாக அவரது பெற்றோர் கூறியுள்ளனர்.

முன்னர் தனது வாழ்க்கையில் நடந்த பெரும்பாலான விடயங்களைப் பெற்றோருடன் பகிர்ந்துகொண்ட வான், ChatGPT தவறான தகவல்களை வழங்கும்போது அதனைச் சந்தேகத்துடன் அணுகியவர் என்றும் அவர்கள் தெரிவித்துள்ளனர்.

“அவள் பொதுவாக இவ்வாறு நடந்துகொள்பவள் அல்ல. ஏதோ ஒரு மாயவலையில் சிக்கியிருந்ததைப் போன்ற உணர்வு ஏற்படுகிறது” என அவரது தாயார் மெய்கின் சூ தெரிவித்துள்ளார்.