மின்சாரக் கட்டண நிவாரணத்திற்காக 1,720 கோடி ரூபாய்க்கு பாராளுமன்றம் அனுமதி!

மின்சாரக் கட்டணங்கள் தொடர்பில் மக்களுக்கு நிவாரணம் வழங்குவதற்காக 17.213 பில்லியன் (1,720 கோடிக்கும் அதிகமான) ரூபாய் நிதியுதவியை வழங்குவதற்கான 2026 ஆம் ஆண்டின் 05 ஆம் இலக்க குறைநிரப்பு மதிப்பீட்டிற்கு பாராளுமன்றம் இன்று (23) ஒப்புதல் அளித்துள்ளது.

எரிசக்தி அமைச்சுடன் தொடர்புடைய இந்த குறைநிரப்பு மதிப்பீடு, சபையில் இடம்பெற்ற விவாதத்தைத் தொடர்ந்து நிறைவேற்றப்பட்டதாக பாராளுமன்றம் வெளியிட்டுள்ள அறிக்கையில் தெரிவிக்கப்பட்டுள்ளது.

இந்த நிவாரண நடவடிக்கைக்குத் தேவையான 17,213 மில்லியன் ரூபாயானது, 2026 ஆம் ஆண்டிற்காக அமைச்சுக்களுக்கு ஒதுக்கப்பட்ட நிதியில் நடப்பு ஆண்டின் இறுதிக்குள் பயன்படுத்தப்படமாட்டாது என அடையாளம் காணப்பட்ட நிதியிலிருந்தே பெற்றுக்கொள்ளப்படவுள்ளது.

எனவே, இந்த நிதி மாற்றமானது 2025 ஆம் ஆண்டின் 23 ஆம் இலக்க ஒதுக்கீட்டுச் சட்டத்தின் (Appropriation Act) கீழ் அங்கீகரிக்கப்பட்ட மொத்த செலவின உச்சவரம்பை பாதிக்காத வகையில் மேற்கொள்ளப்படும் என்று பாராளுமன்றம் சுட்டிக்காட்டியுள்ளது. அத்துடன், இந்த நிதி மறுஒதுக்கீடானது அரசாங்கத்தின் அதிகபட்ச கடன் பெறும் எல்லையிலும் எவ்வித தாக்கத்தையும் ஏற்படுத்தாது என்றும் தெரிவிக்கப்பட்டுள்ளது.

நேற்றைய தினம் அரசாங்க நிதி பற்றிய குழுவில் பரிசீலிக்கப்பட்ட இந்த குறைநிரப்பு மதிப்பீட்டிற்கு அக்குழுவின் அனுமதி கிடைத்த நிலையிலேயே, இன்று பாராளுமன்றத்தில் விவாதத்திற்கு எடுத்துக்கொள்ளப்பட்டது.

ஏற்றுமதி விவசாய மேம்பாட்டுத் திருத்தச் சட்டமூலமும் நிறைவேற்றம்

இதேவேளை, ஏற்றுமதி விவசாய மேம்பாட்டு (திருத்த) சட்டமூலமும் எவ்வித திருத்தங்களுமின்றி பாராளுமன்றத்தில் இன்று விவாதத்தின் பின்னர் நிறைவேற்றப்பட்டது.

ஏற்றுமதி விவசாயத் திணைக்களத்தின் நிறுவனக் கட்டமைப்பிற்குள் ஏற்பட்டுள்ள மாற்றங்களைப் பிரதிபலிக்கும் வகையிலும், ஏற்றுமதி விவசாயப் பயிர்கள் தொடர்பான சரத்துக்களை புதுப்பிக்கும் வகையிலும் 1992 ஆம் ஆண்டின் 46 ஆம் இலக்க ஏற்றுமதி விவசாய மேம்பாட்டுச் சட்டத்தில் திருத்தங்களை மேற்கொள்வதையே இச்சட்டமூலம் நோக்கமாகக் கொண்டுள்ளது.

திணைக்களத்தின் மறுசீரமைப்பு காரணமாக புதிய பதவிகள் உருவாக்கப்பட்டமையினாலும், நிலவும் பதவிகள் தரம் உயர்த்தப்பட்டமையினாலும் "பணிப்பாளர்" என்ற பதவிப்பெயர் "பணிப்பாளர் நாயகம்" என மாற்றம் பெற்றிருந்தது. எனினும், பழைய சட்டத்தில் இதற்குரிய திருத்தங்கள் மேற்கொள்ளப்படாமல் இருந்த நிலையில், இப்புதிய சட்டமூலத்தின் ஊடாகத் தேவையான திருத்தங்கள் முன்வைக்கப்பட்டுள்ளன.

மேலும், தற்போதைய சட்டத்தில் உள்ள ஏற்றுமதி விவசாயப் பயிர்களுக்கான வரைவிலக்கணம் தற்போதைய உற்பத்தி மற்றும் சந்தை நிலைமைகளுக்குப் பொருத்தமற்றதாகக் காணப்பட்டதால், நாட்டின் தற்போதைய மற்றும் எதிர்கால ஏற்றுமதி விவசாயத் துறையின் தேவைகளைப் பிரதிபலிக்கும் வகையில் அவ்வரைவிலக்கணம் திருத்தப்பட்டுள்ளது.

இத்திருத்தத்தின் கீழ், உள்ளூர் நுகர்வுக்கு மேலதிகமாக ஏற்றுமதி சாத்தியக்கூறுகளைக் கொண்ட பயிர்களாக அடையாளம் காணப்பட்டு, அமைச்சரினால் "அறிவிக்கப்பட்ட விவசாயப் பயிராக" பிரகடனப்படுத்தப்படும் பயிர்கள் ஏற்றுமதி விவசாயப் பயிர்களாகக் கருதப்படும். எனினும், நெல், காய்கறிகள், பழங்கள், கிழங்கு வகைகள் மற்றும் மேலதிக உணவுப் பயிர்கள் ஆகியவை இந்த வரைவிலக்கணத்திலிருந்து விலக்களிக்கப்பட்டுள்ளதுடன், பெருந்தோட்டப் பயிர்களாக அடையாளம் காணப்பட்ட பயிர்களும் இதில் அடங்கமாட்டா என்பது குறிப்பிடத்தக்கது.