காலி முகத்திடல் சிறுமி துஷ்பிரயோகம்: சந்தேகநபரை கைது செய்ய உதவி கோரல்

கொழும்பு , காலி முகத்திடலில் 13 வயதுடைய சிறுமி ஒருவர் கடத்தப்பட்டு கடுமையான பாலியல் துஷ்பிரயோகத்திற்கு உட்படுத்தப்பட்ட சம்பவம் தொடர்பில் தேடப்பட்டு வரும் சந்தேகநபரை அடையாளம் காணவும் கைது செய்யவும் பொலிஸார் பொதுமக்களின் உதவியை நாடியுள்ளனர்.

கடந்த 2026 ஆம் ஆண்டு ஜனவரி மாதம் 23 ஆம் திகதி கோட்டை பொலிஸ் பிரிவிற்குட்பட்ட பகுதியில் இச்சம்பவம் இடம்பெற்றுள்ளதாக தெரிவிக்கப்படுகின்றது.

சிறுமியின் கடத்தல் மற்றும் கடுமையான பாலியல் துஷ்பிரயோகம் தொடர்பில் கிடைக்கப்பெற்ற முறைப்பாட்டையடுத்து கோட்டை பொலிஸார் விசாரணைகளை ஆரம்பித்ததுடன், சந்தேகநபரை கைது செய்வதற்கான தீவிர நடவடிக்கைகளை முன்னெடுத்து வருகின்றனர்.

இதனையடுத்து, தேடப்பட்டு வரும் சந்தேகநபரின் மாதிரி வரைபடம் ஒன்றை பொலிஸார் வெளியிட்டுள்ளதுடன், அவரை அடையாளம் காணவும் இருக்கும் இடத்தை கண்டறியவும் உதவுமாறு பொதுமக்களிடம் கேட்டுக்கொண்டுள்ளனர்.

குறித்த சந்தேகநபர் தொடர்பாக ஏதேனும் தகவல்கள் தெரியவரின், கோட்டை பொலிஸ் நிலையப் பொறுப்பதிகாரியை 071-8591560 என்ற தொலைபேசி இலக்கத்திலோ அல்லது கோட்டை பொலிஸ் நிலையத்தை 011-2432635 என்ற இலக்கத்திலோ தொடர்புகொண்டு அறிவிக்குமாறு கோரப்பட்டுள்ளனர்.