அனோஜனைக் காப்பாற்ற உயர்மட்ட தூதுக்குழு: முஜிபுர் ரஹ்மான் கோரிக்கை!

சவூதி அரேபியாவில் மரண தண்டனை விதிக்கப்பட்டுள்ள இலங்கை இளைஞரான அனோஜன் சிவராசாவின் உயிரைக் காப்பாற்றுவதற்காக, ஜனாதிபதி அனுர குமார திசாநாயக்க , பிரதமர் ஹரிணி அமரசூரிய அல்லது குறைந்தபட்சம் வெளிவிவகார அமைச்சர் விஜித ஹேரத் தலைமையிலான உயர்மட்ட தூதுக்குழுவொன்று சவூதி அரேபிய அதிகாரிகளுடன் பேச்சுவார்த்தை நடத்த வேண்டும் என எதிர்க்கட்சி பாராளுமன்ற உறுப்பினர் முஜிபுர் ரஹ்மான் வலியுறுத்தியுள்ளார்.

இன்று (23) பாராளுமன்றத்தில் உரையாற்றியபோதே அவர் இந்தக் கோரிக்கையை முன்வைத்துள்ளார்.

அரசாங்கத்தினால் அறிவிக்கப்பட்டுள்ளவாறு, பிரதி சபாநாயகர் ரிஸ்வி சாலிஹ் தலைமையிலான குழுவொன்றினால் மாத்திரம் கையாண்டு முடித்துவிடக்கூடிய எளிய விடயம் இதுவல்ல எனச் சுட்டிக்காட்டிய அவர், மிக உயர்மட்டத்திலான இராஜதந்திர ஈடுபாடே இதற்கு அவசியமானது எனக் குறிப்பிட்டார்.

சவூதி அரேபிய அரசாங்கத்துடன் பேச்சுவார்த்தை நடத்திய அனுபவமிக்க எதிர்க்கட்சிப் பாராளுமன்ற உறுப்பினர்களான முன்னாள் அமைச்சர்களையும், பிரதி சபாநாயகரையும் இந்தத் தூதுக்குழுவில் உள்ளடக்குமாறும் அவர் யோசனை முன்வைத்தார்.

சவூதி மன்னருடன் இராஜதந்திர ரீதியில் பேசியிருக்க வேண்டும்

"இது பிரதி சபாநாயகர் மட்டத்தில் தீர்க்கப்படக்கூடிய விவகாரம் அல்ல. மிகவும் தீவிரமான தொன்றாகும். ஜனாதிபதி மட்டத்திலேயே இந்தப் பேச்சுவார்த்தைகள் இடம்பெறுவது மிகவும் சிறந்தது. ஜனாதிபதியால் அதற்கு இயலாவிட்டால், இந்த இளைஞனின் உயிரைக் காப்பாற்றப் பிரதமரோ அல்லது குறைந்தபட்சம் வெளிவிவகார அமைச்சரோ தூதுக்குழுவை வழிநடத்த வேண்டும்" என முஜிபுர் ரஹ்மான் தெரிவித்துள்ளார்.

அத்துடன், அனோஜன் சிவராசாவின் வழக்கை வெளிவிவகார அமைச்சும் இலங்கை வெளிநாட்டு வேலைவாய்ப்புப் பணியகமும் கையாண்ட விதம் குறித்துக் கேள்வி எழுப்பிய அவர், சட்ட ஆலோசனைகளைப் பெறுவதிலும் ஆரம்பத் தண்டனைக்கு எதிராக மேல்முறையீடு செய்வதிலும் தீவிர தவறுகள் இழைக்கப்பட்டுள்ளதாகக் குற்றம் சாட்டினார்.

தவறான சட்ட ஆலோசனையால் நேர்ந்த விபரீதம்

கடந்த ஜூலை 2 ஆம் திகதி சவூதி அரேபியாவின் இணையக் குற்றவியல் சட்டத்தின் கீழ் கைது செய்யப்பட்ட அனோஜன், ஜூலை 15 ஆம் திகதி குற்றத்தை ஒப்புக்கொண்டதைத் தொடர்ந்து அவருக்குத் தீர்ப்பளிக்கப்பட்டது. ஆரம்பத்தில் அவருக்கு 5 ஆண்டுகள் சிறைத்தண்டனையும் அபராதமும் விதிக்கப்பட்டதுடன், வழக்கு விசாரணைகள் அனைத்தும் சுமார் இரண்டு வாரங்களுக்குள் நிறைவடைந்திருந்தன.

குற்றத்தை ஒப்புக்கொண்டு வழக்கு முடிவுக்கு வந்தபோதிலும், அதற்கு எதிராக மேல்முறையீடு செய்யப்பட்டதாக முஜிபுர் ரஹ்மான் சுட்டிக்காட்டினார்.

வெளிவிவகார அமைச்சுடன் தொடர்புடைய சட்ட வல்லுநர்கள் மற்றும் சவூதி அரேபியாவிலுள்ள சட்ட நிறுவனம் ஒன்றின் தவறான சட்ட ஆலோசனையின் பேரிலேயே இந்த மேல்முறையீடு தாக்கல் செய்யப்பட்டுள்ளதாக அவர் குற்றம் சாட்டினார்.

இதனைத் தொடர்ந்து, சவூதி தலைமைச் சட்டத்தரணி அலுவலகம் இந்த மேல்முறையீட்டை எதிர்த்து வழக்குத் தொடர்ந்த நிலையில், சவூதி சட்டத்தின் கீழ் அவருக்கு மரண தண்டனை விதித்துத் தீர்ப்பளிக்கப்பட்டதாக அவர் விளக்கமளித்தார்.

ஆரம்ப நீதிமன்றத் தீர்ப்பிற்கு எதிராக மேல்முறையீடு செய்வதற்குப் பதிலாக, தண்டனை விதிக்கப்பட்ட கையோடு இலங்கை அரசாங்கம் சவூதி அரேபிய மன்னருடன் நேரடியாக இராஜதந்திர ரீதியில் பேச்சுவார்த்தை நடத்தியிருக்க வேண்டும் என அவர் வாதிட்டார்.

"அவர்கள் நீதிமன்றத்தில் மேல்முறையீடு செய்திருக்கக் கூடாது. ஆரம்பத் தண்டனையின் பின்னர், அரசாங்கம் இந்த விவகாரத்தை நேரடியாக சவூதி மன்னரிடம் கொண்டு சென்றிருக்க வேண்டும். இளைஞன் குற்றத்தை ஏற்றுக்கொண்ட பின்னரும், யாருடைய ஆலோசனையின் பேரில் மேல்முறையீடு செய்தனர் என்பது தெரியவில்லை. இங்குதான் தவறான நடவடிக்கை எடுக்கப்பட்டுள்ளது" என அவர் சுட்டிக்காட்டினார்.

பெற்றோரிடம் பணம் பெறப்பட்ட விவகாரம்

வழக்குச் செலவுகளுக்காக அனோஜனின் பெற்றோரிடமிருந்து 1.8 மில்லியன் ரூபாய் பெறப்பட்டுள்ளதாகக் குற்றம் சாட்டிய முஜிபுர் ரஹ்மான், வெளிநாட்டு வேலைவாய்ப்புப் பணியகம் (SLBFE) அல்லது காப்பீட்டுத் திட்டங்கள் மூலம் கிடைக்கக்கூடிய நிதியை ஏன் பயன்படுத்தவில்லை எனக் கேள்வி எழுப்பினார். எவ்வாறாயினும், அந்தப் பணம் மீண்டும் வழங்கப்படும் என அரசாங்கம் தற்போது அறிவித்துள்ளதாக அவர் குறிப்பிட்டார்.

முந்தைய சம்பவங்களை ஒப்பிட்டுக் குறிப்பிட்ட அவர், நல்லாட்சி அரசாங்கக் காலத்தில் சவூதி அரேபியாவில் மூன்று இலங்கை பெண்களுக்கு மரண தண்டனை விதிக்கப்பட்டிருந்த போதிலும், வெளிவிவகார அமைச்சின் விரைவான தலையீடு காரணமாக அந்தத் தண்டனைகள் இடைநிறுத்தப்பட்டதாகத் தெரிவித்தார். அந்தப் பெண்கள் நாடு திரும்புவதற்கு முன்னர் சிறைத்தண்டனை அனுபவித்த போதிலும், இறுதியில் அவர்களுக்கு மரண தண்டனை நிறைவேற்றப்படவில்லை என்பதையும் அவர் நினைவுகூர்ந்தார்.

எனவே, அனோஜன் சிவராசாவிற்கு விதிக்கப்பட்ட மரண தண்டனை தொடர்பான நீதிமன்றத் தீர்ப்பை வெளிவிவகார அமைச்சர் பாராளுமன்றத்தில் சமர்ப்பிக்க வேண்டும் என முஜிபுர் ரஹ்மான் கோரிக்கை விடுத்துள்ளார். இதன் மூலம் மேல்முறையீடு மற்றும் அதனைத் தொடர்ந்து எடுக்கப்பட்ட சட்ட நடவடிக்கைகள் குறித்த உண்மை நிலையை பாராளுமன்ற உறுப்பினர்கள் அறிந்துகொள்ள முடியும் என அவர் மேலும் தெரிவித்தார்.