நாமல் ராஜபக்ஷவின் விளக்கமறியல் நீடிப்பு: பிணை முடிவுக்கு முன் 3 சந்தேகங்களை கோரியது நீதிமன்றம்

ஸ்ரீலங்கன் எயர்லைன்ஸ் நிறுவனத்தின் 'எயார்பஸ்' (Airbus) விமானக் கொள்வனவு தொடர்பான பணச்சலவை வழக்கு விசாரணைகளில் குற்றம்சாட்டப்பட்டுள்ள ஸ்ரீலங்கா பொதுஜன பெரமுனவின் பாராளுமன்ற உறுப்பினர் நாமல் ராஜபக்ஷவை எதிர்வரும் செப்டம்பர் 30 ஆம் திகதி வரை மீண்டும் விளக்கமறியலில் வைக்குமாறு கொழும்பு கோட்டை நீதவான் நீதிமன்றம் உத்தரவிட்டுள்ளது.

இவ்வழக்கில் நாமல் ராஜபக்ஷ தாக்கல் செய்திருந்த பிணை மனு மீதான கட்டளையை வழங்குவதை ஒத்திவைத்த கோட்டை நீதவான் பசான் அமரசேன, இச்சம்பவம் தொடர்பில் சமாந்தரமாக நடைபெற்று வரும் விசாரணைகள் குறித்து முறைப்பாட்டாளரான சட்டமா அதிபர் திணைக்களத்திடம் இருந்து மூன்று முக்கிய விடயங்களில் தெளிவுபடுத்துமாறு கோரியுள்ளார்.

நீதிமன்றத்தினால் கோரப்பட்ட தெளிவுபடுத்தல்கள் வருமாறு:

பணச்சலவை விசாரணை மற்றும் லஞ்ச ஒழிப்புச் சட்டத்தின் கீழ் மேற்கொள்ளப்படும் விசாரணை ஆகிய இரண்டும் இணைக்கப்பட்ட அடிப்படையில் முன்னெடுக்கப்படுகின்றனவா?

கோட்டை நீதவான் நீதிமன்றத்தில் நிலுவையில் உள்ள வழக்கை கொழும்பு தலைமை நீதவான் நீதிமன்றத்திற்கு மாற்ற வேண்டுமா?

இலஞ்ச அல்லது ஊழல் பற்றிய சாட்டல்களை புலனாய்வு செய்வதற்கான ஆணைக்குழுவின் (CIABOC) பணிப்பாளர் நாயகம், ஊழல் எதிர்ப்புச் சட்டத்தின் 149 ஆம் பிரிவின் கீழ் சான்றிதழ் ஒன்றை கொழும்பு நீதவான் நீதிமன்றத்தில் தாக்கல் செய்துள்ளாரா?

இதன்போது நீதிமன்றத்தில் ஆஜரான மேலதிக சொலிசிட்டர் ஜெனரல் ஜனக பண்டார, கொழும்பு நீதவான் நீதிமன்றத்தில் நிலுவையில் உள்ள வழக்கில் அத்தகைய சான்றிதழ் தாக்கல் செய்யப்பட்டுள்ளதாகத் தெரிவித்தார். அத்துடன், நீதிமன்றினால் எழுப்பப்பட்ட ஏனைய வினாக்கள் தொடர்பில் எழுத்துமூல சமர்ப்பணங்களை வழங்க எதிர்பார்ப்பதாகவும் அவர் குறிப்பிட்டார்.

இதனைத் தொடர்ந்து, கோரப்பட்ட தெளிவுபடுத்தல்களை எதிர்வரும் செப்டம்பர் 30 ஆம் திகதி நீதிமன்றத்தில் சமர்ப்பிக்குமாறு முறைப்பாட்டுத் தரப்பிற்கு உத்தரவிட்ட நீதவான், அன்றைய தினம் பரிசீலனைகளின் பின்னர் நாமல் ராஜபக்ஷவின் பிணை மனு மீதான உத்தரவு பிறப்பிக்கப்படும் என அறிவித்தார்.

ஸ்ரீலங்கன் எயர்லைன்ஸ் நிறுவனத்திற்கு எயார்பஸ் விமானங்களை கொள்வனவு செய்ததில் இடம்பெற்றதாகக் கூறப்படும் நிதி முறைகேடுகள் மற்றும் பணச்சலவை தொடர்பில் கோட்டை நீதவான் நீதிமன்றில் தொடரப்பட்டுள்ள வழக்கில் நாமல் ராஜபக்ஷ நான்காவது சந்தேகநபராகப் பெயரிடப்பட்டுள்ளார்.

இதேவேளை, குறித்த விமானக் கொள்வனவு விவகாரத்தில் 100 மில்லியன் ரூபாவை லஞ்சமாகப் பெற்றுக்கொண்டதாக இலஞ்ச ஊழல் ஆணைக்குழுவினால் முன்னெடுக்கப்படும் விசாரணை தொடர்பில் கொழும்பு தலைமை நீதவான் நீதிமன்றத்திலும் நாமல் ராஜபக்ஷவிற்கு எதிராக வழக்குத் தொடரப்பட்டுள்ளது. இந்த விசாரணைகள் இலஞ்ச ஊழல் ஆணைக்குழு மற்றும் குற்றப்புலனாய்வு திணைக்களம் (CID) ஆகியவற்றினால் இணைந்து நடத்தப்பட்டு வருவதாக முறைப்பாட்டுத் தரப்பு முன்னர் நீதிமன்றத்திற்கு அறிவித்திருந்தமை குறிப்பிடத்தக்கது.