நாமல் ராஜபக்சவின் தனிப்பட்ட செயலாளர் இலஞ்ச ஊழல் விசாரணை ஆணைக்குழுவால் கைது!
இலங்கை பொதுஜன பெரமுனவின் (SLPP) தேசிய அமைப்பாளரும் நாடாளுமன்ற உறுப்பினருமான நாமல் ராஜபக்சவின் தனிப்பட்ட செயலாளர் சஞ்சய சமரசிங்க, இலஞ்சம் அல்லது ஊழல் குற்றச்சாட்டுகளை விசாரிக்கும் ஆணைக்குழுவினால் கைது செய்யப்பட்டுள்ளார்.
இன்று திங்கட்கிழமை (19) இலஞ்ச ஊழல் விசாரணை ஆணைக்குழுவில் முன்னிலையானதைத் தொடர்ந்து அவர் கைது செய்யப்பட்டதாகத் தெரிவிக்கப்படுகிறது.
இதற்கு முன்னதாக, கடந்த ஒக்டோபர் 17ஆம் திகதி, கல்கிசை – மவுண்ட் லவீனியாவில் அமைந்துள்ள சஞ்சய சமரசிங்கவின் இல்லத்தில் இலஞ்ச ஊழல் விசாரணை ஆணைக்குழு அதிகாரிகள் சோதனை நடவடிக்கையை முன்னெடுத்திருந்தனர்.
இதன்போது, அவரது வீட்டில் காணப்பட்ட பாதுகாப்புப் பெட்டகமொன்று அதிகாரிகளால் கைப்பற்றப்பட்டதாகத் தெரிவிக்கப்பட்டுள்ளது.
எனினும், சஞ்சய சமரசிங்க கைது செய்யப்பட்டமைக்கான குறிப்பிட்ட குற்றச்சாட்டுகள் தொடர்பில் இதுவரை மேலதிக விபரங்கள் எதுவும் அதிகாரபூர்வமாக வெளியிடப்படவில்லை.
