தொழிற்கல்வியை வலுப்படுத்த ஆசிய - பசிபிக் அமைப்புடன் இலங்கை புதிய ஒப்பந்தம்
இலங்கையின் தொழில்நுட்ப மற்றும் தொழிற்கல்வி, பயிற்சித்துறையை மேலும் மேம்படுத்தும் நோக்கில், ஆசிய - பசிபிக் அங்கீகார மற்றும் சான்றளிப்பு ஆணைக்குழுவுடன் புதிதாக ஒப்பந்தம் ஒன்றைச் செய்துகொள்வதற்கு அரசாங்கம் தீர்மானித்துள்ளது.
கல்வி, உயர்கல்வி மற்றும் தொழிற்கல்வி அமைச்சரும் பிரதமருமான கலாநிதி ஹரிணி அமரசூரிய சமர்ப்பித்த யோசனைக்கே அமைச்சரவை அனுமதி வழங்கியுள்ளது.
இலங்கையின் மூன்றாம் நிலை மற்றும் தொழிற்கல்வி ஆணைக்குழுவிற்கும் பிலிப்பைன்ஸை தளமாகக் கொண்டு இயங்கும் ஆசிய - பசிபிக் அங்கீகார மற்றும் சான்றளிப்பு ஆணைக்குழுவிற்கும் இடையே, உள்நாட்டு தொழிற்கல்வித்துறையின் சான்றளிப்புத் தரங்களை உயர்த்தும் பொருட்டு முன்னர் ஐந்து ஆண்டுகளுக்கான ஒப்பந்தமொன்று கைச்சாத்திடப்பட்டிருந்தது.
எனினும், அந்த ஒப்பந்தத்தின் செல்லுபடியாகும் காலம் நிறைவடைந்துள்ளதை அடுத்து, இரு நிறுவனங்களுக்கும் இடையிலான கூட்டுறவை மேலும் தொடரவும் விரிவுபடுத்தவும் புதிய ஒப்பந்தம் ஒன்றை மேற்கொள்வதற்கு முன்மொழியப்பட்டுள்ளது.
தொழிற்கல்வித்துறையில் பிராந்திய ஒத்துழைப்பை வலுப்படுத்துதல் மற்றும் இலங்கையின் தொழிற்கல்வித் தரத்தை உயர்த்துவதற்கு தேவையான தொழில்நுட்ப உதவிகளைப் பெற்றுக்கொள்ளுதல் ஆகியவற்றை முக்கிய நோக்கமாகக் கொண்டு இந்த புதிய ஒப்பந்தம் அமையவுள்ளது.
அத்துடன், தொழிற்பயிற்சிகளை வழங்கும் நிறுவனங்களுக்கு சர்வதேச ரீதியிலான அங்கீகாரத்தைப் பெற்றுக்கொடுப்பதுடன், இலங்கையின் தேசிய தொழற்தகுதி சட்டகத்தை (NVQ) மேலும் வலுப்படுத்தவும் இதன் மூலம் எதிர்பார்க்கப்படுகின்றது.
மேலும், இலங்கையில் அங்கீகாரப் பணிகளுக்கான தேசிய ஒருங்கிணைப்பாளர் ஒருவரை நியமிப்பதற்கும், ஆசிய - பசிபிக் அமைப்பின் வழிகாட்டல்களுக்கு அமைவாக எதிர்கால அங்கீகார நடவடிக்கைகளை முன்னெடுப்பதற்காக உள்நாட்டு மதிப்பீட்டாளர்களை அடையாளம் கண்டு அவர்களுக்கு உரிய பயிற்சிகளை வழங்குவதற்கும் இந்த ஒப்பந்தத்தில் வழிவகை செய்யப்பட்டுள்ளது.
இதற்கமைய, முன்மொழியப்பட்டுள்ள புதிய ஒப்பந்தத்தில் இரு நிறுவனங்களும் கையொப்பமிடுவதற்கு அமைச்சரவை தனது பூரண அனுமதியை வழங்கியுள்ளது.
