சவூதி மரண தண்டனை வழக்கு: பிரதமர் மோடியின் உதவியைக் கோருமாறு மனோ கணேசன் வேண்டுகோள்

சவூதி அரேபியாவில் மரண தண்டனை விதிக்கப்பட்டுள்ள இலங்கைத் தமிழ் வாலிபரான அனோஜன் சிவராசாவின் விவகாரத்தில், இந்தியப் பிரதமர் நரேந்திர மோடியின்  உதவியைப் பெறுமாறு தமிழ் முற்போக்குக் கூட்டணியின் (TPA) தலைவரும் நாடாளுமன்ற உறுப்பினருமான மனோ கணேசன், ஜனாதிபதி அனுர குமார திசாநாயக்கவிடம் அவசர வேண்டுகோள் விடுத்துள்ளார்.

இது தொடர்பாகத் தனது எக்ஸ் (X) சமூக வலைத்தளப் பக்கத்தில் பதிவொன்றை வெளியிட்டுள்ள மனோ கணேசன், சவூதி அரேபியாவின் கிரீட இளவரசர் முஹம்மது பின் சல்மானுடன் இந்தியப் பிரதமர் மோடி மிக நெருங்கிய நட்புறவைக் கொண்டிருப்பதைச் சுட்டிக்காட்டியுள்ளார். அத்துடன், இலங்கையின் மிக உயரிய விருதான 'ஸ்ரீ லங்கா ரத்னா' (Sri Lanka Rathna) கௌரவத்தைப் பெற்றுக்கொண்ட பிரதமர் மோடி, நாட்டின் நீண்டகால நண்பர் என்பதையும் அவர் நினைவுகூர்ந்துள்ளார்.

"ஜனாதிபதி அனுர குமார திசாநாயக்க அவர்களே, அனோஜன் சிவராசாவின் இந்த ஆபத்தான நிலையை, உங்களின் நண்பரும் 'ஸ்ரீ லங்கா ரத்னா' விருதை வென்றவருமான இந்தியப் பிரதமர் நரேந்திர மோடியின் கவனத்திற்கு உடனடியாகக் கொண்டு செல்லுங்கள். இப் பிரச்சினைக்கு மனிதநேய அடிப்படையில் ஒரு தீர்வைப் பெற்றுத் தரும் வகையில், சவூதி கிரீட இளவரசர் சல்மானுடன் தனிப்பட்ட முறையில் தலையிடுமாறு பிரதமர் மோடியிடம் கோரிக்கை விடுக்க வேண்டும்" என அவர் கேட்டுக்கொண்டுள்ளார்.

சவூதி அரேபியாவில் பணிபுரிந்து வந்த அனோஜன் சிவராசா, சமூக வலைத்தளத்தில் வெளியிட்ட கருத்தொன்று இஸ்லாம் மார்க்கத்தையும் முஹம்மது நபியையும் இழிவுபடுத்தும் வகையில் அமைந்திருந்ததாகக் கூறப்படும் குற்றச்சாட்டே இந்த வழக்கின் பின்னணியாகும். இலங்கையிலுள்ள மதச் சமூகங்களுக்கு இடையே இடம்பெற்ற இணையவழி விவாதத்தின் போதே இந்தக் கருத்துப் பரிமாற்றம் இடம்பெற்றதாக அவரது குடும்பத்தினர் தெரிவித்துள்ளனர்.

இக் குற்றச்சாட்டின் அடிப்படையில், கடந்த ஜூலை 15 ஆம் திகதி சவூதி நீதிமன்றம் அவருக்கு ஐந்து ஆண்டுகள் சிறைத்தண்டனையும், 3 மில்லியன் சவூதி ரியாஃபாத் அபராதமும் விதித்துத் தீர்ப்பளித்தது. தண்டனையைக் குறைக்குமாறு கோரி, இலங்கை வெளிநாட்டு அலுவல்கள் அமைச்சின் ஆதரவுடன் அவரது சட்டத்தரணி மேன்முறையீடு செய்தார்.

எனினும், அந்த மேன்முறையீட்டின் போது தண்டனை அதிகரிக்கப்பட்டு, அவருக்கு மரண தண்டனை விதிக்கப்பட்டுள்ளதாகத் தமக்கு அறியத்தரப்பட்டுள்ளதாக அவரது குடும்பத்தினர் தெரிவித்துள்ளனர்.

இலங்கை அரசாங்கம் அனோஜனுக்கு உதவுவதற்காக சட்ட ரீதியான மற்றும் இராஜதந்திர வழிகளை முன்னெடுத்து வரும் நிலையிலேயே, நாடாளுமன்ற உறுப்பினர் மனோ கணேசன் இந்தக் கோரிக்கையை முன்வைத்துள்ளார்.