2027இல் 15 இலட்சம் மாணவர்களுக்கு ரூ. 6,000 பாடசாலை உபகரணக் கொடை!

2025ஆம் ஆண்டில் ஆரம்பிக்கப்பட்ட பாடசாலை உபகரண உதவித் திட்டத்தின் கீழ், வரும் 2027ஆம் கல்வி ஆண்டுக்காக 15 இலட்சம் பாடசாலை மாணவர்களுக்கு தலா 6,000 ரூபா பெறுமதியான பாடசாலை உபகரணக் கொடையை வழங்க அரசாங்கம் தீர்மானித்துள்ளது.

நிதியமைச்சர் என்ற வகையில் ஜனாதிபதி அநுர குமார திசாநாயக்க சமர்ப்பித்த யோசனைக்கு அமைச்சரவை தனது ஒப்புதலை வழங்கியுள்ளது.

இந்த அமைச்சரவைத் தீர்மானத்தின்படி, அஸ்வெசும நலன்புரித் திட்டத்தில் பதிவு செய்யப்பட்டுள்ள குடும்பங்களைச் சேர்ந்த 10 இலட்சம் பாடசாலை மாணவர்களின் வங்கிக் கணக்குகளுக்கு நேரடியாக இந்த 6,000 ரூபா கொடுப்பனி வரவு வைக்கப்படவுள்ளது.

இதற்கிடையில், கல்வி, உயர்கல்வி மற்றும் தொழிற்கல்வி அமைச்சினால் அடையாளம் காணப்பட்டுள்ள மேலும் 5 இலட்சம் மாணவர்கள், பாடசாலை உபகரணங்களை கொள்வனவு செய்வதற்காக 6,000 ரூபா பெறுமதியான பற்றுச்சீட்டுகளைப் பெற்றுக்கொள்வர்.

கல்வித் தேவைகளைக் கொண்டுள்ள மாணவர்களுக்கு உதவும் ஒரு நடவடிக்கையாக, இந்த பாடசாலை உபகரணக் கொடைத் திட்டம் 2025ஆம் ஆண்டு முதல் தொடர்ச்சியாக நடைமுறைப்படுத்தப்பட்டு வருகின்றது.

நேரடி நிதியுதவி மற்றும் பற்றுச்சீட்டுகள் ஊடாக மொத்தம் 15 இலட்சம் மாணவர்களை உள்ளடக்கிய இத்திட்டத்தை 2027ஆம் ஆண்டும் தொடர்வதற்குத் தேவையான அனைத்து நடவடிக்கைகளும் முன்னெடுக்கப்படும் என ஜனாதிபதி அமைச்சரவைக்கு அறிவித்துள்ளார்.