2027 முதல் 6ஆம் தர மாணவர்களுக்கு தொழில்முனைவோர் மற்றும் நிதிசார் அறிவூட்டல் பாடநெறி அறிமுகம்!

இலங்கையின் புதிய கல்விச் சீர்திருத்தங்களின் ஒரு அங்கமாக, 2027ஆம் ஆண்டு முதல் 6ஆம் தர மாணவர்களுக்கு தொழில்முனைவோர் மற்றும் நிதிசார் அறிவூட்டல் ஆகிய விடயங்களை உள்ளடக்கிய புதிய பாடநெறி ஒன்று அறிமுகப்படுத்தப்படவுள்ளதாகப் பிரதமர் கலாநிதி ஹரிணி அமரசூரிய அறிவித்துள்ளார்.

நிதிசார் அறிவூட்டலை மேம்படுத்தும் நோக்கில் ஏற்பாடு செய்யப்பட்டிருந்த மணி ஒலிக்கும் நிகழ்வொன்றில் (Bell-ringing ceremony) கலந்துகொண்டு உரையாற்றுகையிலேயே பிரதமர் இதனைக் குறிப்பிட்டார்.

மாணவர்களுக்கான பரந்த அளவிலான கல்விச் சீர்திருத்தங்களின் கீழ், 6ஆம் தரத்திலிருந்து 9ஆம் தர வரையிலான மாணவர்களுக்குத் தொழில்முனைவோர் மற்றும் நிதி மேலாண்மை குறித்த அறிவை வழங்குவதே இதன் முக்கிய நோக்கமாகும் எனக் கூறிய அவர், அதன் முதற்கட்டமாக 2027ஆம் ஆண்டில் அனைத்து 6ஆம் தர மாணவர்களுக்கும் இப் புதிய பாடம் கற்பிக்கப்படும் என்றும் தெரிவித்தார்.

பாடசாலை மாணவர்கள் மற்றும் இளைஞர்கள் சிறுவயதிலிருந்தே தொழில்முனைவு மற்றும் முதலீடுகள் பற்றிய நடைமுறை அனுபவத்தைப் பெறுவதற்காக, பங்குச்சந்தை விளையாட்டுப் போட்டிகள் (Stock Market Game) மற்றும் பாடசாலை மூலதனச் சந்தைச் சங்கங்கள் போன்ற திட்டங்கள் நடைமுறைப்படுத்தப்பட்டு வருவதையும் பிரதமர் இங்கு சுட்டிக்காட்டினார்.

அத்துடன், நிதிசார் அறிவூட்டல் கல்வியானது நன்னெறிகள் மற்றும் பொறுப்புமிக்க நிதி நடத்தை ஆகியவற்றிலும் வலுவான கவனத்தைச் செலுத்த வேண்டும் என அவர் வலியுறுத்தினார்.

மற்றவர்களை ஏமாற்றியோ அல்லது சுரண்டியோ பணம் ஈட்டக் கூடாது என்பதை இளைஞர்கள் கற்றுக்கொள்ள வேண்டும் என்றும், பொறுப்புடனும் அறநெறியுடனும் செயல்படுவதன் முக்கியத்துவத்தை அவர்கள் சிறுவயதிலேயே உணர்ந்துகொள்ள வேண்டும் என்றும் பிரதமர் ஹரிணி அமரசூரிய மேலும் தெரிவித்தார்.