வேரஹரவில் போலி ஓட்டுநர் உரிமக் கடத்தல்: தம்பதி கைது!
வேரஹர பிரதேசத்தில் போலி தற்காலிக ஓட்டுநர் உரிமங்களை (driving licence) தயாரித்து விற்பனை செய்யும் சட்டவிரோத கடத்தலில் ஈடுபட்டு வந்த தம்பதியர் இருவர் பொலிஸாரால் கைது செய்யப்பட்டுள்ளனர்.
வேரஹர, ஜனதா மாவத்தை பகுதியைச் சேர்ந்த 49 வயதுடைய கணவரும், அவரது 43 வயதுடைய மனைவியுமே இவ்வாறு கடந்த ஞாயிற்றுக்கிழமை (04) கல்கிஸ்ஸ குற்றப் புலனாய்வுப் பிரிவின் அதிகாரிகளால் கைது செய்யப்பட்டவர்களாவர்.
போலி தற்காலிக ஓட்டுநர் உரிமத்தை வைத்திருந்த நபர் ஒருவர் குறித்து மேற்கொள்ளப்பட்ட விசாரணைகளைத் தொடர்ந்து, இந்த தம்பதியர் கைது செய்யப்பட்டுள்ளனர்.
வேரஹர, ஜனதா மாவத்தை பகுதியில் முன்னெடுக்கப்பட்ட இந்நடவடிக்கையின் போது, சந்தேகநபர்களிடமிருந்து போலி தற்காலிக ஓட்டுநர் உரிமம் ஒன்றும் பொலிஸாரால் கைப்பற்றப்பட்டுள்ளது.
கைது செய்யப்பட்ட சந்தேகநபர்கள் இருவரும் கடந்த ஒன்றரை வருட காலமாக இத்தகைய போலி தற்காலிக ஓட்டுநர் உரிமங்களை தயாரித்து, பணம் பெற்றுக்கொண்டு விற்பனை செய்து வந்துள்ளமை முதற்கட்ட விசாரணைகளில் தெரியவந்துள்ளது.
கைது செய்யப்பட்ட தம்பதியர் மேலதிக விசாரணைகளுக்காக கல்கிஸ்ஸ பொலிஸ் நிலையத்தில் ஒப்படைக்கப்பட்டுள்ளதாக பொலிஸார் தெரிவித்தனர்.
