மைக்ரோசொப்ட் சேவைகளில் உலகளாவிய முடக்கம் – ஒரே தொழில்நுட்ப நிறுவனத்தைச் சார்ந்திருப்பதன் அபாயம் அம்பலம்

மைக்ரோசொப்ட் நிறுவனத்தின் சேவைகளில் ஏற்பட்ட உலகளாவிய தொழில்நுட்பக் கோளாறு காரணமாக, மின்னஞ்சல் உள்ளிட்ட அலுவலகப் பயன்பாட்டுக் கருவிகள் பாதிக்கப்பட்டுள்ளதுடன், அத்தியாவசிய சேவைகளுக்கு ஒரே தொழில்நுட்ப நிறுவனத்தைச் சார்ந்திருப்பதால் ஏற்படக்கூடிய அபாயங்களும் வெளிச்சத்துக்கு வந்துள்ளன.

மைக்ரோசொப்ட் 365 சேவைகளான Outlook, Microsoft Teams மற்றும் செயற்கை நுண்ணறிவு உதவியாளரான Copilot ஆகியவற்றின் செயல்பாடுகள் இந்தக் கோளாறினால் பாதிக்கப்பட்டன.

வியாழக்கிழமை அமெரிக்காவில் ஆரம்பமான இந்தப் பாதிப்பு, உலகின் பல்வேறு நாடுகளுக்கும் பரவியது. ஒரு மணி நேரத்திற்குள் 74 நாடுகள் மற்றும் பிரதேசங்களில் இருந்து சேவை முடக்கம் தொடர்பான முறைப்பாடுகள் கிடைத்ததாக இணையச் சேவை முடக்கங்களைக் கண்காணிக்கும் Downdetector நிறுவனம் தெரிவித்துள்ளது.

இந்தக் கோளாறு இரண்டாவது நாளாக வெள்ளிக்கிழமையும் தொடர்ந்த நிலையில், சேவைகளை வழமைக்குக் கொண்டுவருவதில் முன்னேற்றம் ஏற்பட்டுள்ளதாக மைக்ரோசொப்ட் அறிவித்தது. எனினும், சில பயனர்கள் மின்னஞ்சல்களைப் பெறுவதிலும் அனுப்புவதிலும் தாமதம் அல்லது இடையிடையே சேவைகளை அணுகுவதில் சிக்கல்களை எதிர்கொள்ளக்கூடும் என்றும் நிறுவனம் எச்சரித்தது.

தனது சேவைகளை நம்பியிருக்கும் வாடிக்கையாளர்கள் அன்றாடம் முக்கியமான பணிகளை முன்னெடுப்பதைத் தாம் அறிந்துள்ளதாகவும், இந்தச் சேவை முடக்கங்களால் ஏற்பட்ட பாதிப்புகளுக்கு வருந்துவதாகவும் மைக்ரோசொப்ட் சமூக ஊடகப் பதிவு ஒன்றில் தெரிவித்தது.

இதேவேளை, உலகளாவிய தகவல் தொடர்பு மற்றும் தொழில்நுட்பக் கட்டமைப்புகள் சில முக்கிய நிறுவனங்களின் சேவைகளிலேயே அதிகளவில் தங்கியிருப்பதால், ஒரு நிறுவனத்தில் ஏற்படும் தொழில்நுட்பக் கோளாறு பல்வேறு துறைகளிலும் தொடர் பாதிப்புகளை ஏற்படுத்தக்கூடும் என்ற கவலை எழுந்துள்ளது.

இது தொடர்பாக கருத்துத் தெரிவித்த கிளாஸ்கோ பல்கலைக்கழகத்தின் கணினி அறிவியல் துறைப் பேராசிரியர் ஜெரமி சிங்கர், மின்னஞ்சல்களை அனுப்பவும் பெறவும் முடியாத நிலையில், பல அலுவலகப் பணியாளர்கள் வேலைக்குச் செல்ல முடியாத விடுமுறை நாள் போன்ற சூழலை எதிர்கொண்டதாகக் குறிப்பிட்டார்.

மேலும், ஒரே நிறுவனத்தின் டிஜிட்டல் கட்டமைப்பைச் சார்ந்திருக்கும் நிலைமை குறித்து இந்தச் சம்பவம் மீண்டும் சிந்திக்க வைத்துள்ளதாகவும், தகவல் தொழில்நுட்பக் கட்டமைப்புகளில் மாற்று ஏற்பாடுகளையும் அதிக மீள்திறனையும் உருவாக்க வேண்டியதன் அவசியத்தை இது உணர்த்துவதாகவும் அவர் தெரிவித்தார்.

இதற்கிடையில், அமெரிக்காவைச் சேர்ந்த தொழில்நுட்ப நிறுவனங்கள் மீது அதிகளவில் தங்கியிருப்பதால் ஏற்படும் விளைவுகள் குறித்தும் அமெரிக்காவுக்கு வெளியேயுள்ள சில நாடுகளின் சட்டமியற்றுபவர்கள் கேள்வி எழுப்பியுள்ளனர்.

இந்தச் சேவை முடக்கத்துக்குக் காரணம் அண்மையில் மேற்கொள்ளப்பட்ட வலையமைப்பு மாற்றத்தைத் தொடர்ந்து இடம்பெற்ற மேம்படுத்தல் நடவடிக்கையின்போது ஏற்பட்ட தொழில்நுட்பக் கோளாறு என மைக்ரோசொப்ட் விளக்கமளித்துள்ளது.

மேலும், இந்தச் சம்பவம் சைபர் தாக்குதல் அல்லது செயற்கை நுண்ணறிவு முகவர்களால் ஏற்பட்டதற்கான எந்தவொரு அறிகுறியும் இல்லை என்றும் நிறுவனம் தெளிவுபடுத்தியுள்ளது.

Exchange Online மின்னஞ்சல் சேவைகளில் ஏற்பட்ட பாதிப்பின்போது, தானியங்கி சோதனைகளின் போது நிறுவனத்தின் சில சேவையகங்கள் எதிர்பாராத விதமாகச் செயலிழந்ததாகவும் மைக்ரோசொப்ட் முன்னதாகத் தெரிவித்திருந்தது.

Outlook பயனர்களில் பலர் தங்களால் மின்னஞ்சல்களை அனுப்பவோ பெறவோ முடியவில்லை என்றும், சிலருக்கு மின்னஞ்சல் பெட்டிகளையே திறக்க முடியவில்லை என்றும் முறைப்பாடு செய்திருந்தனர்.

வெள்ளிக்கிழமை காலை அமெரிக்க நேரப்படி, மின்னஞ்சல் அனுப்புவதற்காகக் காத்திருந்த தகவல்களின் எண்ணிக்கை கணிசமாகக் குறைந்துள்ளதாகவும், சேவை வழமைக்குத் திரும்பும் நிலையை எட்டியுள்ளதாகவும் மைக்ரோசொப்ட் அறிவித்தது.

Microsoft Teams சேவையும் வட அமெரிக்காவில் மீளமைக்கப்பட்டுள்ளதாக நிறுவனம் தெரிவித்த போதிலும், சில பயனர்கள் தொடர்ந்து இணைப்புச் சிக்கல்களை எதிர்கொண்டதாகக் கூறப்படுகிறது.

மைக்ரோசொப்ட் 365 சேவைகளில் 450 மில்லியனுக்கும் அதிகமான கட்டண வணிகச் சந்தாக்கள் இருப்பதாக அந்த நிறுவனம் கடந்த ஜனவரி மாதம் தெரிவித்திருந்தமை குறிப்பிடத்தக்கது.