மறைந்த சிரேஷ்ட சட்டத்தரணி லால் விஜேநாயக்கவுக்கு ஜனநாயகத்துக்கான சட்டத்தரணிகள் அஞ்சலி

இலங்கையில் ஜனநாயகம், மனித உரிமைகள் மற்றும் சட்டத்தின் ஆட்சி ஆகியவற்றைப் பாதுகாப்பதில் நீண்டகாலப் பங்களிப்பை வழங்கிய சிரேஷ்ட சட்டத்தரணி லால் விஜேநாயக்கவின் மறைவுக்கு ஜனநாயகத்துக்கான சட்டத்தரணிகள் அமைப்பு (Lawyers for Democracy) ஆழ்ந்த இரங்கலைத் தெரிவித்துள்ளது.

நவம்பர் 2ஆம் திகதி வெளியிட்ட அறிக்கையிலேயே அந்த அமைப்பு தனது இரங்கலைத் தெரிவித்துள்ளது.

கண்டியில் சட்டத்தரணியாகப் பணியாற்றிய லால் விஜேநாயக்க, குறித்த அமைப்பின் சிரேஷ்ட உறுப்பினராகவும் இணை ஒருங்கிணைப்பாளர்களில் ஒருவராகவும் செயற்பட்டவர் என அந்த அறிக்கையில் குறிப்பிடப்பட்டுள்ளது.

ஜனநாயக விழுமியங்களை உறுதியாக ஆதரித்த அவர், சர்வாதிகாரப் போக்குகளுக்கு எதிராகத் தொடர்ச்சியாகக் குரல் கொடுத்து வந்ததாகவும் அமைப்பு தெரிவித்துள்ளது.

தற்போதைய ஆளும் நிர்வாகத்தின் கொள்கை வகுக்கும் அமைப்பில் உறுப்பினராக இருந்தபோதிலும், அரசியலமைப்பின் 22ஆவது திருத்தத்துக்கு அவர் உறுதியாக எதிர்ப்புத் தெரிவித்தமை, அவரது அரசியல் சுயாதீனத் தன்மையை வெளிப்படுத்தியதாகவும் சுட்டிக்காட்டப்பட்டுள்ளது.

2012ஆம் ஆண்டு ஜூலை மாதம் மன்னார் நீதவான் நீதிமன்றத்தின் மீது நடத்தப்பட்ட தாக்குதலைத் தொடர்ந்து உருவாக்கப்பட்ட ஜனநாயகத்துக்கான சட்டத்தரணிகள் அமைப்பின் ஸ்தாபக உறுப்பினர்களில் ஒருவராகவும் லால் விஜேநாயக்க விளங்கியுள்ளார்.

நீதித்துறையின் சுதந்திரத்தையும் சட்டத்தின் ஆட்சியையும் பாதுகாப்பதற்காக சட்டத்தரணிகள், தொழிற்சங்கங்கள், சிவில் சமூக அமைப்புகள் உள்ளிட்ட பல்வேறு தரப்பினரை ஒன்றிணைப்பதில் அவர் முக்கிய பங்காற்றியதாகவும் அந்த அமைப்பு நினைவுகூர்ந்துள்ளது.

2013ஆம் ஆண்டு ஜனவரி மாதம் முன்னாள் பிரதம நீதியரசர் ஷிராணி பண்டாரநாயக்கவுக்கு எதிராக முன்னெடுக்கப்பட்ட பதவி நீக்க நடவடிக்கைக்கு எதிரான போராட்டங்களிலும் அவர் தீவிரமாகப் பங்கேற்றுள்ளார்.

ஜனநாயகத்துக்கான சட்டத்தரணிகள் அமைப்பு மற்றும் இலங்கை சட்டத்தரணிகள் சங்கத்தின் ஏனைய உறுப்பினர்களுடன் இணைந்து ஆர்ப்பாட்டங்கள், கூட்டங்கள் மற்றும் பொதுமக்கள் விழிப்புணர்வு நிகழ்ச்சிகளை ஏற்பாடு செய்வதிலும் அவர் பங்களித்ததாகத் தெரிவிக்கப்பட்டுள்ளது.

அத்துடன், குடியுரிமைச் சுதந்திரம், சமத்துவமான அணுகுமுறை, இன நல்லிணக்கம் மற்றும் நல்லிணக்க முயற்சிகள் ஆகியவற்றிலும் அவர் கொண்டிருந்த அர்ப்பணிப்பை அந்த அமைப்பு பாராட்டியுள்ளது.

அமைப்பின் செயற்பாடுகள் ஆரம்பிக்கப்பட்ட காலம் முதல் லால் விஜேநாயக்க வழங்கிய தலைமைத்துவம், வழிகாட்டுதல் மற்றும் ஜனநாயகக் கொள்கைகள் மீதான அர்ப்பணிப்பு ஆகியவை மிகுந்த முக்கியத்துவம் வாய்ந்தவை எனவும் தெரிவிக்கப்பட்டுள்ளது.

இலங்கைச் சமூகத்துக்கும் சட்டத்துறைக்கும் அவர் ஆற்றிய பங்களிப்புகள் பல தலைமுறைகளுக்கும் நினைவுகூரப்படும் என ஜனநாயகத்துக்கான சட்டத்தரணிகள் அமைப்பு தனது இரங்கல் அறிக்கையில் மேலும் குறிப்பிட்டுள்ளது.