மருத்துவர்களின் கோரிக்கைகளை முன்வைத்து நாடளாவிய ரீதியில் போராட்டம் – முக்கிய வைத்தியசாலைகளில் ஆர்ப்பாட்டம் நடத்த GMOA தீர்மானம்!

மருத்துவர்களின் சம்பளம் மற்றும் கொடுப்பனவு பிரச்சினைகள், சுகாதாரப் பணியாளர்களுக்கான பற்றாக்குறை உள்ளிட்ட பல்வேறு கோரிக்கைகளை முன்வைத்து, எதிர்வரும் சில நாட்களில் நாடளாவிய ரீதியில் உள்ள முக்கிய வைத்தியசாலைகளில் போராட்டங்களை நடத்துவதற்கு அரச மருத்துவ அதிகாரிகள் சங்கம் (GMOA) தீர்மானித்துள்ளது.

மருத்துவர்கள் மற்றும் நாட்டின் இலவச சுகாதாரக் கட்டமைப்பு எதிர்கொண்டுள்ள தீர்க்கப்படாத பிரச்சினைகள் குறித்து அரசாங்கத்தின் கவனத்தை ஈர்க்கும் நோக்கில் இந்தப் போராட்டங்கள் முன்னெடுக்கப்படவுள்ளதாக அச்சங்கம் தெரிவித்துள்ளது.

நாட்டில் ஏற்பட்ட பொருளாதார நெருக்கடியின்போது மருத்துவர்கள் உள்ளிட்ட சுகாதாரப் பணியாளர்கள் பெரும் தியாகங்களைச் செய்துள்ளதாகவும், அப்போதைய அரசாங்கங்களின் பொருளாதார நடவடிக்கைகளுக்கு ஆதரவளிக்கும் வகையில் மேலதிக கடமை மற்றும் விடுமுறை நாட்களுக்கான கொடுப்பனவுகளில் மூன்றில் ஒரு பகுதியைத் தியாகம் செய்துள்ளதாகவும் அரச மருத்துவ அதிகாரிகள் சங்கம் சுட்டிக்காட்டியுள்ளது.

எனினும், நாட்டின் பொருளாதாரம் மீட்சியடைந்து வருவதாக அரசாங்கம் தெரிவித்து வருகின்ற போதிலும், சுகாதாரத் துறையினரின் பிரச்சினைகளுக்குத் தீர்வுகாண உரிய நடவடிக்கைகள் எடுக்கப்படவில்லை என அச்சங்கம் குற்றஞ்சாட்டியுள்ளது.

மருத்துவத்துறையில் நிலவும் பிரச்சினைகள் தொடர்பாக ஜனாதிபதி அநுர குமார திஸாநாயக்க, பிரதமர் ஹரிணி அமரசூரிய மற்றும் சுகாதார அமைச்சர் ஆகியோருடன் கலந்துரையாடுவதற்குப் பலமுறை கோரிக்கை விடுத்துள்ளதாகவும் சங்கம் தெரிவித்துள்ளது.

அத்துடன், 2027ஆம் ஆண்டுக்கான வரவு செலவுத் திட்டத்தில் மருத்துவர்கள் மற்றும் ஏனைய சுகாதாரப் பணியாளர்களின் பிரச்சினைகளுக்குத் தீர்வுகாணும் வகையில் முன்வைக்கப்பட்டுள்ள யோசனைகள் குறித்தும் கலந்துரையாடுவதற்கு கோரிக்கை விடுக்கப்பட்டதாகக் குறிப்பிடப்பட்டுள்ளது.

எனினும், இதுவரை அதிகாரிகளிடமிருந்து சாதகமான பதில் எதுவும் கிடைக்கவில்லை என அரச மருத்துவ அதிகாரிகள் சங்கம் தெரிவித்துள்ளது.

இந்தப் போராட்டங்களின் மூலம் குறைக்கப்பட்ட கொடுப்பனவுகளை மீள வழங்குதல், சுகாதாரப் பணியாளர்களின் சேவைக்கு ஏற்ற நியாயமான சம்பளத்தை வழங்குதல் மற்றும் அவர்கள் தமது கடமைகளைச் சிறப்பாக முன்னெடுப்பதற்குத் தேவையான வசதிகளை ஏற்படுத்திக் கொடுத்தல் உள்ளிட்ட கோரிக்கைகள் முன்வைக்கப்படவுள்ளன.

மேலும், வைத்தியர்கள் மற்றும் ஏனைய சுகாதாரப் பணியாளர்களுக்கான பற்றாக்குறையை நிவர்த்தி செய்ய உடனடியாக ஆட்சேர்ப்புகளை முன்னெடுத்தல், மருந்துப் பொருட்களின் தடையற்ற விநியோகத்தை உறுதிப்படுத்துதல் மற்றும் சுகாதார உட்கட்டமைப்பு வசதிகளை மேம்படுத்துதல் ஆகிய கோரிக்கைகளும் முன்வைக்கப்படவுள்ளன.

இதேவேளை, இலவச சுகாதாரக் கட்டமைப்பு எதிர்கொண்டுள்ள பிரச்சினைகளுக்குத் தீர்வுகாண அரசாங்கம் ஆக்கபூர்வமான பேச்சுவார்த்தைகளில் ஈடுபடுவதுடன், உரிய நடவடிக்கைகளை விரைவாக முன்னெடுக்க வேண்டும் என்பதையும் வலியுறுத்தி இந்தப் போராட்டங்கள் நடத்தப்படவுள்ளதாக அரச மருத்துவ அதிகாரிகள் சங்கம் தெரிவித்துள்ளது.