புதிய TIN நடைமுறை: இனி வருமான வரித் திணைக்களத்திற்குச் செல்ல வேண்டிய அவசியமில்லை!

வரி செலுத்துவோர் அடையாள இலக்கத்தை (TIN) பெற்றுக்கொள்வதற்காக பொதுமக்கள் இனி உள்நாட்டு இறைவரித் திணைக்கள அலுவலகங்களுக்குச் செல்ல வேண்டிய அவசியமில்லை எனப் பொருளாதார அபிவிருத்தி பிரதி அமைச்சர் நிஷாந்த ஜயவீர தெரிவித்துள்ளார்.

TIN சான்றிதழைப் பெற்றுக்கொள்வதற்காக நாடளாவிய ரீதியில் உள்நாட்டு இறைவரித் திணைக்கள அலுவலகங்களில் பொதுமக்கள் நீண்ட வரிசைகளில் காத்திருப்பது தொடர்பில் கருத்துத் தெரிவிக்கும்போதே அவர் இதனைக் குறிப்பிட்டுள்ளார்.

இன்று (03) நாடாளுமன்றத்தில் உரையாற்றிய பிரதி அமைச்சர், TIN சான்றிதழைப் பெற்றுக்கொள்ள வேண்டும் என்ற கட்டாயம் தொடர்பில் பொதுமக்கள் தேவையற்ற அச்சமடைய வேண்டாம் என்றும், இது தொடர்பில் பதற்றமடையத் தேவையில்லை என்றும் கேட்டுக்கொண்டார்.

சாரதி அனுமதிப்பத்திரம், வாகன வருமான வரி அனுமதிப்பத்திரம் மற்றும் வங்கிக் கணக்குகளைத் திறத்தல் உள்ளிட்ட சேவைகளைப் பெற்றுக்கொள்வதற்காக TIN சான்றிதழ் தேவைப்படும் நிலையில், அதனைப் பெற்றுக்கொள்வதற்கான புதிய நடைமுறை விரைவில் அறிமுகப்படுத்தப்படவுள்ளதாக அவர் தெரிவித்தார்.

இதன்படி, இதுவரை TIN இலக்கத்தைப் பெற்றுக்கொள்ளாதவர்கள் தமது தேசிய அடையாள அட்டையின் (NIC) பிரதியொன்று, செயற்பாட்டிலுள்ள கையடக்கத் தொலைபேசி இலக்கம் மற்றும் மின்னஞ்சல் முகவரி ஆகியவற்றைத் தாம் சேவையைப் பெற்றுக்கொள்ளும் நிறுவனத்திடம் சமர்ப்பித்தால் போதுமானது.

குறித்த நிறுவனம், விண்ணப்பதாரரின் விபரங்களை உள்நாட்டு இறைவரித் திணைக்களத்திற்கு அனுப்பி, தேவையான நடவடிக்கைகளை முன்னெடுக்கும். இதனூடாக விண்ணப்பதாரருக்கான TIN அல்லது வருமான வரி இலக்கம் வழங்கப்பட்டு, அவர் சமர்ப்பித்த மின்னஞ்சல் முகவரிக்கு அனுப்பி வைக்கப்படும் எனப் பிரதி அமைச்சர் விளக்கமளித்தார்.

மேலும், தேசிய அடையாள அட்டை இலக்கம் மற்றும் பதிவு செய்யப்பட்ட மின்னஞ்சல் முகவரியைப் பயன்படுத்தி உள்நாட்டு இறைவரித் திணைக்களத்தின் இணையவழி முறைமையின் ஊடாகவும் TIN மற்றும் வருமான வரிச் சான்றிதழ்களைப் பெற்றுக்கொள்ள முடியும் என அவர் குறிப்பிட்டார்.

ஏற்கனவே TIN இலக்கத்தைப் பெற்றுக்கொண்டவர்கள் மற்றும் இதுவரை பெற்றுக்கொள்ளாதவர்கள் என இரு தரப்பினருக்கும் இந்தப் புதிய நடைமுறை பொருந்தும் என்றும் அவர் தெரிவித்தார்.

நவம்பர் 1ஆம் திகதி முதல் பல்வேறு அரச மற்றும் நிதிச் சேவைகளைப் பெற்றுக்கொள்வதற்கு TIN இலக்கம் கட்டாயமாக்கப்பட்டுள்ள நிலையில், அதனைப் பெற்றுக்கொள்வதற்காக நாடளாவிய ரீதியில் உள்நாட்டு இறைவரித் திணைக்கள அலுவலகங்களில் நீண்ட வரிசைகள் காணப்படுகின்றன.

இதனால் பொதுமக்கள் எதிர்கொள்ளும் சிரமங்கள் மற்றும் தாமதங்கள் தொடர்பில் பல்வேறு முறைப்பாடுகள் முன்வைக்கப்பட்டு வரும் பின்னணியிலேயே, புதிய நடைமுறை தொடர்பான அறிவிப்பை பிரதி அமைச்சர் வெளியிட்டுள்ளார்.