திருகோணமலை கொள்ளைச் சம்பவம்: இருவர் ஒரு மணி நேரத்திற்குள் கைது

திருகோணமலை, அனுராதபுர சந்தைக்கு அருகிலுள்ள மதுபானச்சாலையொன்றில் நேற்றிரவு (18) இடம்பெற்ற ஆயுதமேந்திய கொள்ளைச் சம்பவத்துடன் தொடர்புடைய இரு சந்தேகநபர்களை, சம்பவம் இடம்பெற்று ஒரு மணித்தியாலத்திற்குள் காவல்துறை அதிகாரிகள் கைது செய்துள்ளனர். 

நேற்றிரவு 9:45 மணியளவில் குறித்த மதுபானச்சாலைக்குள் புகுந்த இரு நபர்கள், டி-56 (T-56) ரக துப்பாக்கியைக் காட்டி ஊழியர்களை அச்சுறுத்தி பணத்தைக் கொள்ளையடித்ததுடன், மோட்டார் சைக்கிளில் தப்பிச் சென்றுள்ளனர். இச்சம்பவம் தொடர்பாக திருகோணமலை காவல்துறை நிலையத்திற்கு தொலைபேசி வாயிலாக தகவல் வழங்கப்பட்டதை அடுத்து, உடனடியாகச் செயற்பட்ட காவல் துறையினர், உப்பவெளி காவல்துறை பிரிவிற்குட்பட்ட தற்காலிக தங்குமிடம் ஒன்றில் வைத்து சந்தேகநபர்களை சுற்றிவளைத்து கைது செய்துள்ளனர்.

கைது செய்யப்பட்ட சந்தேகநபர்களில் ஒருவர் கிளிப்புஞ்சிமலையிலுள்ள வெடிபொருள் சேமிப்புக் கிடங்கில் கடமையாற்றும் உப்பவெளி காவல்துறை நிலையத்தைச் சேர்ந்த காவல்துறை சார்ஜன்ட்  ஒருவர் என உறுதிப்படுத்தப்பட்டுள்ளது. 

54 மற்றும் 61 வயதுடைய ஹக்மன பிரதேசத்தைச் சேர்ந்த இவ்விரு சந்தேகநபர்களிடமிருந்தும் கொள்ளையடிக்கப்பட்ட 11,500 ரூபாய் பணம், குற்றச் செயலுக்குப் பயன்படுத்தப்பட்ட மோட்டார் சைக்கிள், டி-56 ரக துப்பாக்கி மற்றும் 29 தோட்டாக்கள் அடங்கிய தோட்டாக் கூடு (Magazine) என்பன காவல்துறையினரால் கைப்பற்றப்பட்டுள்ளன. இச்சம்பவம் தொடர்பில் திருகோணமலை காவல்துறையினர் மேலதிக விசாரணைகளை முன்னெடுத்து வருகின்றனர்.