காங்கேசன்துறையில் 187 ஏக்கர் காணி விடுவிப்பு: மாவட்டச் செயலகத்திடம் ஆவணங்கள் ஒப்படைப்பு!
யாழ்ப்பாணம், காங்கேசன்துறை பகுதியில் இலங்கை சீமெந்து கூட்டுத்தாபனத்திற்குச் சொந்தமான 187.56 ஏக்கர் காணி, பாதுகாப்புப் படையினரால் உத்தியோகபூர்வமாக விடுவிக்கப்பட்டு யாழ்ப்பாண மாவட்டச் செயலகத்திடம் கையளிக்கப்பட்டுள்ளது.
இதற்கான உத்தியோகபூர்வ ஆவணங்கள், பலாலி பாதுகாப்புப் படைகளின் சிவில் விவகாரங்களுக்கான சிரேஷ்ட அதிகாரி கேர்ணல் டபிள்யூ.எம்.ஏ.எம். நிசங்கவினால், யாழ்ப்பாண மாவட்ட அரசாங்க அதிபர் மருதலிங்கம் பிரதீபனிடம் யாழ். மாவட்டச் செயலகத்தில் வைத்து உத்தியோகபூர்வமாகக் கையளிக்கப்பட்டன.
காங்கேசன்துறைப் பகுதியில் புதிதாக அமைக்கப்படவுள்ள முதலீட்டு வலயத்திற்காக , ஜனாதிபதியின் அங்கீகாரத்துடன் 351.23 ஏக்கர் அரச காணி ஒதுக்கீடு செய்யப்பட்டு, அதற்கான முதற்கட்ட நடவடிக்கைகள் தற்பொழுது தீவிரமாக முன்னெடுக்கப்பட்டு வருகின்றன.
அவ்வாறு முதலீட்டு வலயத்திற்காகப் அடையாளப்படுத்தப்பட்டுள்ள நிலப்பரப்பிற்குள்ளேயே, பாதுகாப்புப் படையினரால் தற்போது விடுவிக்கப்பட்ட இந்த 187.56 ஏக்கர் காணியும் உள்ளடங்குகின்றமை குறிப்பிடத்தக்கது.
இந்நிகழ்வில் யாழ்ப்பாண மேலதிக அரசாங்க அதிபர் (காணி) பா. ஜெயகரன் மற்றும் இராணுவத்தின் மேஜர் டபிள்யூ.எம்.கே.கே. வீரக்கோன் உள்ளிட்ட உயர் அதிகாரிகளும் கலந்துகொண்டனர்.
