ரணிலின் பாதுகாப்பு அதிகாரி மீது தாக்குதல்: தனியார் ஊடக ஒளிப்பதிவாளர் கைது!
முன்னாள் ஜனாதிபதி ரணில் விக்கிரமசிங்கவின் பாதுகாப்புப் பிரிவு அதிகாரி மீது தாக்குதல் நடத்தியதாகக் கூறப்படும் சம்பவம் தொடர்பில் தனியார் ஊடக நிறுவனம் ஒன்றின் ஒளிப்பதிவாளர் ஒருவர் கைது செய்யப்பட்டுள்ளார்.
கொழும்பு கோட்டை நீதவான் நீதிமன்ற வளாகத்திற்கு வெளியே நேற்று (செப்டம்பர் 30) இடம்பெற்ற நீதிமன்ற விவகாரங்களின்போது இச்சம்பவம் பதிவாகியுள்ளது. இச்சம்பவம் தொடர்பில் வாக்குமூலம் அளிப்பதற்காக நேற்று விடுக்கப்பட்ட அழைப்பானைக்கமைய (Summons), வழக்கறிஞர் ஒருவருடன் இன்று (அக்டோபர் 01) கொம்பனித்தெரு பொலிஸ் நிலையத்திற்கு வருகை தந்தபோதே குறித்த ஒளிப்பதிவாளர் பொலிஸாரால் கைது செய்யப்பட்டுள்ளார்.
அங்கு கூடியிருந்த ஊடகவியலாளர்களால் பதிவு செய்யப்பட்ட காணொளியில், பொலிஸ் பிரமுகர் பாதுகாப்புப் பிரிவைச் சேர்ந்த அதிகாரி ஒருவரை குறித்த ஒளிப்பதிவாளர் தனது கேமராவால் தாக்கும் காட்சிகள் இடம்பெற்றுள்ளதாகத் தெரிவிக்கப்படுகிறது. இக்காணொளி சமூக வலைத்தளங்களிலும் பரவலாகப் பகிரப்பட்டு வருகின்றது.
இச்சம்பவத்தில் காயமடைந்த பாதுகாப்புப் பிரிவு அதிகாரி நாரஹேன்பிட்டியிலுள்ள பொலிஸ் மருத்துவமனையில் அனுமதிக்கப்பட்டு சிகிச்சை பெற்று வருகின்றமை குறிப்பிடத்தக்கது.
