முக்கிய மதத்தலங்களுக்கு வெடிகுண்டு மிரட்டல்: 21 வயது இளைஞர் விளக்கமறியலில்!
இலங்கையின் முக்கிய மதத்தலங்கள் மீது வெடிகுண்டு தாக்குதல்கள் நடத்தப்போவதாக வாட்ஸ்அப் (WhatsApp) செயலியில் அச்சுறுத்தல் விடுத்த குற்றச்சாட்டின் பேரில், இப்பாகமுவ பகுதியைச் சேர்ந்த 21 வயதுடைய இளைஞர் ஒருவர் கைது செய்யப்பட்டு விளக்கமறியலில் வைக்கப்பட்டுள்ளார்.
ரங்கிரி தம்புள்ளை குகை விகாரையின் விகாராதிபதி வணக்கத்திற்குரிய கலாநிதி தானிகம ஆனந்த தேரர், குற்றப்புலனாய்வுத் துறையினரிடம் (CID) அளித்த எழுத்துப்பூர்வ முறைப்பாட்டையடுத்தே இந்த விசாரணைகள் ஆரம்பிக்கப்பட்டன.
குறித்த முறைப்பாட்டின்படி, வாட்ஸ்அப் குழுவொன்றில் பகிரப்பட்ட செய்திகளில் புத்த பெருமானை இழிவுபடுத்தும் வகையிலான கருத்துக்களும், ஸ்ரீ தலதா மாளிகை , ஜய ஸ்ரீ மகா போதி , தூபாராமய மற்றும் தம்புள்ளை குகை விகாரை உள்ளிட்ட பல முக்கிய மதத்தலங்களை இலக்கு வைத்து வெடிகுண்டு தாக்குதல்களை நடத்துவதற்கான அச்சுறுத்தல்களும் அடங்கியிருந்ததாகத் தெரிவிக்கப்பட்டுள்ளது.
குற்றப்புலனாய்வுத் துறையின் கணினி குற்றப் புலனாய்வுப் பிரிவினர் மேற்கொண்ட தீவிர விசாரணைகளின் மூலம், இந்த செய்திகளை அனுப்பியவர் இப்பாகமுவ பகுதியைச் சேர்ந்த 21 வயதுடைய இளைஞர் என்பது கண்டறியப்பட்டு அவர் கைது செய்யப்பட்டார்.
சந்தேகநபரின் கைபேசியை சோதனையிட்டபோது, புத்த பெருமானின் உருவத்தை விபரீதமாக சித்தரிக்கும் பல புகைப்படங்களும் கண்டெடுக்கப்பட்டதாக பொலிஸார் தெரிவித்தனர்.
விசாரணைகளின் போது, பொழுதுபோக்கிற்காகவே தான் இவற்றை வாட்ஸ்அப் குழுவில் பகிர்ந்ததாக சந்தேகநபர் வாக்குமூலம் அளித்துள்ளார்.
கைது செய்யப்பட்ட சந்தேகநபர் கொழும்பு நீதவான் நீதிமன்றத்தில் ஆஜர்படுத்தப்பட்டதை அடுத்து, வரும் அக்டோபர் 10 ஆம் திகதி வரை விளக்கமறியலில் வைக்க நீதிமன்றம் உத்தரவிட்டுள்ளது.
