ரணில் பாதுகாப்பு அதிகாரி மீது தாக்குதல்: ஒளிப்பதிவாளர் பொலிஸ் பிணையில் விடுதலை

முன்னாள் ஜனாதிபதி ரணில் விக்கிரமசிங்கவின் பாதுகாப்பு அதிகாரி மீது தாக்குதல் நடத்தியதாகக் கூறப்படும் குற்றச்சாட்டில் கைதுசெய்யப்பட்ட தனியார் ஊடக நிறுவனத்தின் ஒளிப்பதிவாளர் பொலிஸ் பிணையில் விடுவிக்கப்பட்டுள்ளார்.

கொழும்பு கோட்டை நீதவான் நீதிமன்ற வளாகத்திற்கு வெளியில் நேற்று முன்தினம் (30) இச்சம்பவம் இடம்பெற்றுள்ளது. முன்னாள் ஜனாதிபதியுடன் வருகை தந்த பொலிஸ் பிரமுகர் பாதுகாப்புப் பிரிவைச் சேர்ந்த பாதுகாப்பு அதிகாரி ஒருவர் கடமையில் ஈடுபட்டிருந்தபோது, அவர் மீது இத்தாக்குதல் நடத்தப்பட்டதாகக் கூறப்படுகிறது.

ஊடகவியலாளர்களால் பதிவுசெய்யப்பட்ட காணொளிகளில், குறித்த ஒளிப்பதிவாளர் தனது கேமராவினால் (Camera) பாதுகாப்பு அதிகாரியைத் தாக்கும் காட்சிகள் பதிவாகியுள்ளன. இந்தக் காணொளி சமூக வலைத்தளங்களில் (Social media) பரவலாகப் பகிரப்பட்டு வந்தது.

இதனையடுத்து, வழங்கப்பட்ட அழைப்பாணைக்கு அமைய, சட்டத்தரணி ஒருவருடன் கொம்பனித்தெரு பொலிஸ் நிலையத்திற்கு வாக்குமூலம் அளிப்பதற்காக இன்று (01) வருகை தந்தபோதே குறித்த ஒளிப்பதிவாளர் பொலிஸாரால் கைதுசெய்யப்பட்டார். அதன் பின்னரே அவர் பொலிஸ் பிணையில் விடுவிக்கப்பட்டதாக பொலிஸார் தெரிவித்தனர்.

இதேவேளை, இச்சம்பவத்தில் காயமடைந்த பாதுகாப்பு அதிகாரி நாரஹேன்பிட்டியிலுள்ள பொலிஸ் வைத்தியசாலையில் அனுமதிக்கப்பட்டு சிகிச்சைப் பெற்று வருகின்றார்.