முள்ளம்பன்றி இறைச்சி, சட்டவிரோத துப்பாக்கிகளுடன் நால்வர் கைது!

மதுரு ஓயா தேசிய பூங்காவிற்குட்பட்ட பகுதியில் மேற்கொள்ளப்பட்ட சுற்றிவளைப்புகளின்போது, முள்ளம்பன்றி இறைச்சி மற்றும் சட்டவிரோத துப்பாக்கிகளுடன் நால்வர் உட்பட பல சந்தேகநபர்கள் வனவிலங்கு அதிகாரிகளால் கைது செய்யப்பட்டுள்ளனர்.

மதுரு ஓயா தேசிய பூங்காவுடன் இணைந்த கண்டேகம வனவிலங்கு அலுவலக அதிகாரிகள் மேற்கொண்ட ரோந்து நடவடிக்கைகளின்போதே இந்தக் கைதுகள் இடம்பெற்றுள்ளன.

தேசிய பூங்காவிற்குள் வழக்கமான ரோந்து நடவடிக்கைகளில் ஈடுபட்டிருந்த அதிகாரிகள், சந்தேகத்திற்கிடமான சில நபர்களைக் கண்டுள்ளனர். இதனையடுத்து மேற்கொள்ளப்பட்ட துரத்தல் நடவடிக்கையின்போது, வேட்டையாடியதாகச் சந்தேகிக்கப்படும் நால்வர் முள்ளம்பன்றி இறைச்சியுடன் கைது செய்யப்பட்டுள்ளனர்.

தொடர்ந்து மேற்கொள்ளப்பட்ட தேடுதல் நடவடிக்கைகளின்போது, தேசிய பூங்காவிற்குள் சட்டவிரோதமாக நுழைந்த மேலும் இருவர் கைது செய்யப்பட்டதுடன், அவர்களிடமிருந்து உள்நாட்டில் தயாரிக்கப்பட்ட இரண்டு துப்பாக்கிகளும் கைப்பற்றப்பட்டுள்ளன.

அதேநாளில், தேசிய பூங்காவிற்குள் சட்டவிரோத வேட்டையில் ஈடுபட்டதாகச் சந்தேகிக்கப்படும் மற்றுமொருவரும் கைது செய்யப்பட்டுள்ளார். அவரிடமிருந்து வேட்டையாடப்பட்ட நிலையில் இருந்த மரை ஒன்றும் மீட்கப்பட்டுள்ளது.

கைது செய்யப்பட்ட சந்தேகநபர்கள் அனைவரும் தெஹியத்தகண்டிய நீதவான் நீதிமன்றத்தில் ஆஜர்படுத்தப்பட்டுள்ளனர்.

இதன்போது, ஒவ்வொரு சந்தேகநபருக்கும் தலா ஒரு இலட்சம் ரூபாய் பெறுமதியான தனிப்பட்ட பிணை வழங்கி விடுவிக்க நீதிமன்றம் உத்தரவிட்டுள்ளது.

இந்த வழக்கு எதிர்வரும் நவம்பர் 13ஆம் திகதி மீண்டும் விசாரணைக்கு எடுத்துக்கொள்ளப்படவுள்ளது.