ஞானசார தேரரின் சிறை ஆடை விவகாரம்: கம்மன்பிலவின் குற்றச்சாட்டுகளை சிறைச்சாலைகள் திணைக்களம் மறுப்பு

வெலிக்கடை சிறைச்சாலையில் தடுப்புக் காவலில் வைக்கப்பட்டுள்ள வணக்கத்திற்குரிய கலகொடஅத்தே ஞானசார தேரருக்கு வலுக்கட்டாயமாகச் சிறை ஆடை அணிவிக்கப்பட்டதாக முன்னாள் அமைச்சர் உதய கம்மன்பில சுமத்திய குற்றச்சாட்டுகளைச் சிறைச்சாலை அதிகாரிகளால் முற்றாக மறுக்கப்பட்டுள்ளது.

கடந்த அக்டோபர் 12-ஆம் திகதி கொழும்பில் நடைபெற்ற ஊடகவியலாளர் சந்திப்பொன்றில் உரையாற்றிய உதய கம்மன்பில, ஞானசார தேரர் மற்றும் சிறைச்சாலை அதிகாரிகளின் எதிர்ப்பையும் மீறி, தேரருக்கு வலுக்கட்டாயமாகச் சிறை ஆடை அணிவிக்கப்பட்டதாகக் குற்றம்சாட்டியிருந்தார்.

இக்குற்றச்சாட்டுகள் தொடர்பில் ஊடகவியலாளர்கள் எழுப்பிய கேள்விகளுக்குப் பதிலளித்த சிறைச்சாலைகள் ஆணையாளரும் ஊடகப் பேச்சாளருமான சேனக்க பள்ளேத்தன்ன, இச்சம்பவம் குறித்துச் சிறைச்சாலைகள் திணைக்களத்திற்கு இதுவரை எவ்வித முறைப்பாடுகளும் கிடைக்கப்பெறவில்லை எனத் தெரிவித்தார்.

இவ்வாறானதொரு சம்பவம் குறித்துத் தாம் அறியவில்லை எனக் குறிப்பிட்ட அவர், சிறைச்சாலை அதிகாரிகளால் நடைமுறையிலுள்ள சிறைச்சாலை விதிகளுக்கு அமையவே நடவடிக்கைகள் முன்னெடுக்கப்பட்டு வருகின்றன என்றும் சுட்டிக்காட்டினார்.

"இக்குற்றச்சாட்டு தொடர்பில் எமக்கு எந்தவொரு முறைப்பாடும் கிடைக்கவில்லை. இவ்வாறானதொரு சம்பவம் நடந்ததாக நாங்கள் அறியவில்லை. நாங்கள் சிறைச்சாலை விதிகளையே கண்டிப்பைப் பின்பற்றுவதால், இதுபோன்றதொரு சம்பவம் நடப்பதற்கான சாத்தியக்கூறுகள் ஏதுமில்லை" என அவர் மேலும் தெரிவித்துள்ளார்.

இதேவேளை, சிறையில் அடைக்கப்படும் மதத் தலைவர்களின் சிறை ஆடை தொடர்பான விதிகளை மறுபரிசீலனை செய்வதற்காக நியமிக்கப்பட்டுள்ள குழு குறித்துக் கருத்துத் தெரிவித்த பள்ளேத்தன்ன, சிறைச்சாலைகள் ஆணையாளர் கஜநாயக்க அக்குழுவின் உறுப்பினராக நியமிக்கப்பட்டுள்ளதாகக் கூறினார்.

அக்குழு தனது பரிந்துரைகள் அடங்கிய அறிக்கையை இந்த வாரத்திலோ அல்லது அடுத்த வாரத்திலோ சமர்ப்பிக்கும் எனத் தாம் நம்புவதாகவும் அவர் நம்பிக்கை வெளியிட்டார்.

சிறைச்சாலைச் சட்டங்களின் கீழ் நடைமுறையிலுள்ள வழிமுறைகளில் தன்னிச்சையாக மாற்றங்களைச் செய்ய முடியாது எனச் சுட்டிக்காட்டிய பள்ளேத்தன்ன, குழுவின் பரிந்துரைகளின் அடிப்படையில் சிறைச்சாலைகள் திணைக்களம் அடுத்தகட்ட நடவடிக்கைகளை எடுக்கும் என்றும் தெரிவித்தார்.