அனோஜனின் மரண தண்டனை நீக்கம்: சவூதி அரேபியாவுக்கு ஜனாதிபதி நன்றி!
சவூதி அரேபிய உச்ச நீதிமன்றத்தினால் இலங்கைப் பிரஜையான அனோஜன் சிவராசாவுக்கு விதிக்கப்பட்டிருந்த மரண தண்டனை இரத்துச் செய்யப்பட்டுள்ளமைக்கு ஜனாதிபதி அநுர குமார திஸாநாயக்க வரவேற்புத் தெரிவித்துள்ளார்.
இது தொடர்பில் அறிக்கையொன்றை வெளியிட்டுள்ள ஜனாதிபதி, இந்தத் தீர்மானம் அனோஜன் சிவராசா, அவரது குடும்பத்தினர் மற்றும் இந்த வழக்கின் முன்னேற்றத்தைக் கவலையுடன் அவதானித்து வந்த இலங்கை மக்களுக்கு பெரும் நிம்மதியை அளித்துள்ளதாகக் குறிப்பிட்டுள்ளார்.
பொறுமையான இராஜதந்திர அணுகுமுறை, நட்பு நாடொன்றின் சட்ட நடைமுறைகளுக்கு மதிப்பளித்தல் மற்றும் இலங்கைப் பிரஜைக்கு ஆதரவாகப் பல்வேறு தரப்பினரும் மேற்கொண்ட இடைவிடாத முயற்சிகள் ஆகியவற்றின் முக்கியத்துவத்தை இந்தத் தீர்மானம் வெளிப்படுத்துவதாகவும் அவர் தெரிவித்துள்ளார்.
இந்தத் தீர்மானத்தை எடுத்த சவூதி அரேபிய அரசாங்கத்துக்கு ஜனாதிபதி தனது நன்றியைத் தெரிவித்துள்ளதுடன், இதற்குப் பங்களிப்பு வழங்கிய சவூதி அரேபிய மற்றும் இலங்கை இராஜதந்திரிகள், அரச அதிகாரிகள் மற்றும் சட்டத்தரணிகள் குழுவினருக்கும் பாராட்டுகளைத் தெரிவித்துள்ளார்.
மேலும், எஞ்சியுள்ள சட்ட நடவடிக்கைகள் நிறைவடையும் வரை அனோஜன் சிவராசாவுக்கும் அவரது குடும்பத்தினருக்கும் தேவையான அனைத்து உதவிகளையும் இலங்கை அரசாங்கம் தொடர்ந்து வழங்கும் எனவும் ஜனாதிபதி உறுதியளித்துள்ளார்.
“வாழ்வாதாரத்தைத் தேடி நாட்டை விட்டுச் செல்லும் எந்தவொரு இலங்கையரும் தாங்கள் தனித்து விடப்பட்டுள்ளதாக ஒருபோதும் உணரக்கூடாது” என ஜனாதிபதி தெரிவித்துள்ளார்.
வெளிநாடுகளில் பல்வேறு சிரமங்களை எதிர்கொள்ளும் இலங்கைப் பிரஜைகளுக்கு ஆதரவளிப்பதில் அரசாங்கம் தொடர்ந்தும் அர்ப்பணிப்புடன் செயற்படும் என்றும் அவர் மீண்டும் உறுதிப்படுத்தியுள்ளார்.
