சவுதியில் அனோஜன் சிவராசாவின் மரண தண்டனை ரத்து!

சவுதி அரேபியாவில் மரண தண்டனை விதிக்கப்பட்டிருந்த இலங்கை பிரஜையான அனோஜன் சிவராசாவிற்கு விதிக்கப்பட்ட மரண தண்டனையை, அந்நாட்டின் உச்ச நீதிமன்றம் ரத்து செய்து உத்தரவிட்டுள்ளது. இத்தகவலை இலங்கையின் வெளியுறவுத்துறை பிரதி அமைச்சர் அருண் ஹேமச்சந்திர உறுதிப்படுத்தியுள்ளார்.

இது தொடர்பில் பிரதி அமைச்சர் வெளியிட்டுள்ள சமூக வலைதளப் பதிவில், 2026 அக்டோபர் 13 ஆம் திகதி சவுதி உச்ச நீதிமன்றம் இந்த முக்கிய தீர்ப்பை வழங்கியுள்ளதாகக் குறிப்பிட்டுள்ளார்.

இலங்கை அரசு தொடர்ச்சியாக மேற்கொண்டு வந்த தூதரக ரீதியான மற்றும் சட்ட ரீதியான (legal) தீவிர முயற்சிகளின் பலனாகவே இந்த வெற்றி சாத்தியமாகியுள்ளது என்றும், இது அனோஜன் சிவராசாவுக்கும் அவரது குடும்பத்தினருக்கும் கிடைத்த மிகப்பெரிய நிம்மதி என்றும் அவர் தெரிவித்துள்ளார்.

இந்த விவகாரத்தில் ஒத்துழைப்பு வழங்கி கருணை காட்டிய சவுதி அரேபிய அரசாங்கத்திற்குத் தனது மனமார்ந்த நன்றியைத் தெரிவித்துக் கொண்ட பிரதி அமைச்சர், இலங்கைக்கான சவுதி தூதுவர், வெளியுறவு அமைச்சகத்தின் செயலாளர் மற்றும் அதிகாரிகள், இலங்கை வெளிநாட்டு வேலைவாய்ப்புப் பணியகத்தின் தலைவர் மற்றும் உறுப்பினர்கள், அத்துடன் இரு நாடுகளையும் சேர்ந்த சட்டத்தரணிகள் குழுவிற்கும் தனது பாராட்டுகளைப் பதிவு செய்துள்ளார்.

இருப்பினும், மரண தண்டனை ரத்து செய்யப்பட்டுள்ளதைத் தொடர்ந்து, அவரது சட்ட நிலைமை குறித்த அடுத்தகட்ட நடவடிக்கைகள் மற்றும் தகவல்கள் இன்னும் உத்தியோகபூர்வமாக வெளியிடப்படவில்லை என்பது குறிப்பிடத்தக்கது.