உலக அரங்கில் பெரும் திருப்பம்: ரஷ்யா - உக்ரைன் போரில் ‘எரிசக்தி போர்நிறுத்தம்’ அறிவித்தார் டொனால்டு ட்ரம்ப்!

ரஷ்யா மற்றும் உக்ரைன் இடையே நீடித்து வரும் உக்கிரமான போரில் , இரு நாடுகளின் அத்தியாவசியமான மின்சார மற்றும் எரிபொருள் கட்டமைப்புகள் மீது தாக்குதல்களை நடத்தக் கூடாது என்ற அடிப்படையில் 'எரிசக்தி போர்நிறுத்தம்' அமலுக்கு வந்துள்ளதாக அமெரிக்க அதிபர் டொனால்டு ட்ரம்ப் அறிவித்துள்ளார். இரு நாடுகளும் இதற்கு முறையான ஒப்புதல் அளித்துள்ளதாக அவர் தனது சமூக வலைதளப் பதிவில் குறிப்பிட்டுள்ளார்.

சர்வதேச சந்தையில் எரிபொருள் விலை தாறுமாறாக உயர்ந்து வரும் தற்போதைய பொருளாதாரச் சூழலைச் சமாளிக்கும் வகையில், ரஷ்யாவிடம் இருந்து டீசல் இறக்குமதி செய்யப்பட உள்ளதாக அமெரிக்கா அண்மையில் அறிவித்திருந்தது. மேலும், சர்வதேச நாடுகளின் சந்தைகளுக்குத் தடையின்றி டீசலை விநியோகம் செய்ய ரஷ்யா சம்மதம் தெரிவித்துள்ளதாகவும் ட்ரம்ப் கூறியிருந்தார். இந்த முக்கிய நகர்வைத் தொடர்ந்து தற்போது எரிசக்தி போர்நிறுத்தம் குறித்த இந்த அறிவிப்பு வெளியாகியுள்ளது.

உக்ரைனின் நிலைப்பாடு என்ன?

அமெரிக்க அதிபரின் இந்த அறிவிப்பு குறித்து கருத்துத் தெரிவித்துள்ள உக்ரைன் அதிபர் ஜெலன்ஸ்கி (Volodymyr Zelenskyy), “அமெரிக்க அதிபர் டொனால்டு ட்ரம்ப் அறிவித்துள்ள இந்த எரிசக்தி போர்நிறுத்தம் குறித்து நாங்கள் விரிவாக விவாதித்தோம். உக்ரைன் இந்த முடிவை முழுமையாக ஆதரிக்கிறது. அதேவேளையில், ரஷ்யாவும் இதற்கு முழுமையான ஆதரவளிக்க வேண்டும்; அதற்கான உறுதிமொழியை அமெரிக்கத் தரப்பு உறுதிப்படுத்த வேண்டும்” என்று தெரிவித்துள்ளார்.

எனினும், இந்த அறிவிப்பு வெளியாகும் வரை எரிசக்தி போர்நிறுத்தம் குறித்து ரஷ்ய அரசு தரப்பிலிருந்து எந்தவித அதிகாரப்பூர்வ தகவலும் வெளியிடப்படவில்லை. இதற்கிடையே, ட்ரம்ப்பின் இந்த அறிவிப்புக்குப் பிறகும் கூட, உக்ரைனின் தலைநகரான கீவ் நகரில் அமைந்துள்ள எரிசக்தி அமைப்பு மீது ரஷ்யா ஆளில்லா வானூர்தி (Drone) மூலம் தாக்குதல் நடத்தியுள்ளதாகத் தகவல்கள் வெளியாகியுள்ளன.

அதிபர் தேர்தல் மற்றும் 60 நாட்கள் காலக்கெடு

முன்னதாக, உக்ரைன் அதிபரை மாற்ற வேண்டிய தருணம் வந்துவிட்டதாகத் தெரிவித்திருந்த டொனால்டு ட்ரம்ப், ரஷ்யா - உக்ரைன் இடையிலான போரை முடிவுக்குக் கொண்டுவருவதற்கான ராஜதந்திர நடவடிக்கைகளை ஜெலன்ஸ்கி திறம்பட மேற்கொள்ளவில்லை என்று பகிரங்கமாகக் குற்றம்சாட்டியிருந்தார்.

இதற்குப் பதிலடி கொடுக்கும் வகையில் பேசிய உக்ரைன் அதிபர் ஜெலன்ஸ்கி, “எங்களுக்குத் தொடர்ச்சியாக இரண்டு மாதங்கள் அதாவது 60 நாட்கள் ஒட்டுமொத்த போர்நிறுத்தச் சூழலை  அமெரிக்கா ஏற்படுத்திக் கொடுத்தால், நாங்கள் உடனடியாக நாட்டில் தேர்தலை நடத்துவோம். அதன் மூலம் உக்ரைன் மக்களின் உண்மையான தேர்வை ஏற்றுக்கொள்வோம். தலைவரைத் தேர்ந்தெடுப்பது என்பது முழுக்க முழுக்க எங்களது நாட்டு மக்களின் ஜனநாயக உரிமையைப் பொறுத்தது” என்று திட்டவட்டமாகத் தெரிவித்தார்.