ரியாத் சர்வதேச விமான நிலையத் தாக்குதல்: சவூதியா விமான நிறுவனத்தின் விமானி பலி

சவூதி அரேபியாவின் தேசிய விமான சேவை நிறுவனமான 'சவூதியா' (Saudia) விமான நிறுவனத்தைச் சேர்ந்த மூத்த விமானி ஒருவர், ரியாத் கிங் காலித் சர்வதேச விமான நிலையத்தில்  இடம்பெற்ற அசம்பாவிதத்தில் உயிரிழந்துள்ளதாக அதிகாரப்பூர்வமாக அறிவிக்கப்பட்டுள்ளது.

கடந்த ஒக்டோபர் 8ஆம் திகதி வியாழக்கிழமை இடம்பெற்ற இச்சம்பவத்தில் உயிரிழந்தவர், கப்டன் ஹமூத் அலி அல்கல்தாமி என அடையாளப்படுத்தப்பட்டுள்ளார். இவரின் மறைவு தொடர்பில் ஆழ்ந்த இரங்கலைத் தெரிவித்து சவூதியா நிறுவனம் வெளியிட்டுள்ள செய்திக் குறிப்பில், தேசிய விமான சேவையில் அவரது அர்ப்பணிப்புமிக்க சேவையையும் பங்களிப்பையும் நன்றியுடன் நினைவு கூர்ந்துள்ளதுடன், அவரது குடும்பத்தினருக்கும் சக ஊழியர்களுக்கும் இரங்கலையும் தெரிவித்துக் கொண்டுள்ளது.

இதேவேளை, கடந்த ஒக்டோபர் 8ஆம் திகதி கிங் காலித் சர்வதேச விமான நிலையத்தைக் இலக்கு வைத்து இரண்டு தாக்குதல்கள் நடத்தப்பட்டதாக சவூதி அரேபியாவின் சிவில் விமானப் போக்குவரத்து பொது அதிகாரம் உறுதிப்படுத்தியுள்ளது. இத்தாக்குதல்களில் சவூதி பிரஜைகள் மூவர் உயிரிழந்துள்ளதுடன், மேலும் பலர் காயமடைந்துள்ளனர்.

விமான நிலையத்தின் முக்கிய உள்கட்டமைப்பு பகுதிகளை இலக்கு வைத்து ஒரு தாக்குதலும், அங்கு நிறுத்தப்பட்டிருந்த சவூதியா நிறுவனத்திற்குச் சொந்தமான பயணிகள் விமானம் ஒன்றை இலக்கு வைத்து மற்றொரு தாக்குதலும் நடத்தப்பட்டுள்ளன. இதில் முனையத்தில் நிறுத்தப்பட்டிருந்த பயணிகள் விமானம் தீப்பற்றிப் பலத்த சேதமடைந்துள்ளதாக சர்வதேச செய்திச் சேவையான ரொய்ட்டர்ஸ் தெரிவித்துள்ளது. எனினும், சம்பவத்தின் போது விமானத்தினுள் பயணிகள் எவரும் இருக்கவில்லை என நம்பப்படுகிறது.

யேமனின் ஹூதி (Houthi) கிளர்ச்சியாளர்கள் பாலிஸ்டிக் ஏவுகணை மூலம் இந்தத் தாக்குதலை நடத்தியதாகப் பொறுப்பேற்றுள்ளனர். இருப்பினும், விமானி கப்டன் அல்கல்தாமியின் உயிரிழப்பிற்கான துல்லியமான பின்னணி மற்றும் காரணங்கள் குறித்த முழுமையான தகவல்கள் இதுவரை வெளியிடப்படவில்லை.