அனோஜன் சிவராசாவின் மரண தண்டனைக்கு எதிராக சவூதி உச்ச நீதிமன்றத்தில் மேன்முறையீடு தாக்கல்!

அனோஜன் சிவராசாவின் மரண தண்டனைக்கு எதிராக சவூதி உச்ச நீதிமன்றத்தில் மேன்முறையீடு தாக்கல்!

இலங்கை பிரஜையான அனோஜன் சிவராசாவுக்கு விதிக்கப்பட்ட மரண தண்டனைக்கு எதிராக, இலங்கை மற்றும் சவூதி சட்டக் குழுக்களின் ஒருங்கிணைந்த முயற்சிகளைத் தொடர்ந்து சவூதி அரேபியாவின் உச்ச நீதிமன்றத்தில் இன்று ஞாயிற்றுக்கிழமை (அக்டோபர் 11) மேன்முறையீடு ஒன்று தாக்கல் செய்யப்பட்டுள்ளது.

சவூதிக்கான இலங்கை தூதுவர் ஓ.எல். அமீர் அஜ்வாட்டின் ஒருங்கிணைப்புடன், இலங்கை சட்ட நிபுணர்களின் சிறப்புக் குழுவிற்கும் சவூதி தரப்பு வழக்கறிஞர்களுக்கும் இடையே பல கட்ட ஆலோசனைகள் நடத்தப்பட்டதை அடுத்து இந்த மேன்முறையீடு தயாரிக்கப்பட்டுள்ளது. இச்சட்ட நடவடிக்கைகள் ரியாத்தில் உள்ள இலங்கை தூதரகம் மூலம் ஒருங்கிணைக்கப்பட்டன.

வழக்கின் பின்னணி:

• மரண தண்டனைத் தீர்ப்பு: நபிகள் நாயக அவமதிப்பு எனக் கருதப்பட்ட சமூக வலைப்பதிவு ஒன்று தொடர்பில், சவூதி மேல்முறையீட்டு நீதிமன்றத்தினால் அனோஜன் சிவராசாவுக்கு மரண தண்டனை விதிக்கப்பட்டிருந்தது.

• அடிப்படை நீதிமன்றத் தீர்ப்பு: ஆரம்பத்தில் அடிப்படை நீதிமன்றம் அவருக்கு ஐந்து ஆண்டுகள் சிறைத்தண்டனை விதித்திருந்தது. எனினும், செய்யப்பட்ட மேன்முறையீட்டை அடுத்து, அந்தத் தீர்ப்பு மாற்றப்பட்டு மேன்முறையீட்டு நீதிமன்றத்தால் மரண தண்டனை விதிக்கப்பட்டது.

• சட்டக் குழுவின் பயணம்: இந்த மேன்முறையீட்டைத் தயாரிப்பதற்கு உதவுவதற்காக இலங்கையிலிருந்து சிறப்புக் சட்டக் குழுவொன்று சவூதி அரேபியாவுக்குப் பயணம் மேற்கொண்டிருந்தது.

இலங்கைக் சட்டக் குழுவில் மேலதிக சொலிசிட்டர் ஜெனரல் மற்றும் ஜனாதிபதி சட்டத்தரணி அசாத் நவாவி, ஜனாதிபதி சட்டத்தரணி பைஸர் முஸ்தபா, ஜனாதிபதி சட்டத்தரணி உபுல் குமாரப்பெரும மற்றும் சட்டத்தரணி ஹஃபீல் ஃபாரிஸ் ஆகியோர் இடம்பெற்றிருந்தனர். மேலும், தூதுவர் அமீர் அஜ்வாத், ஜெட்டாவிற்கான இலங்கையின் கொன்சல் ஜெனரல் நீதிபதி முஹம்மத் லபீர் மற்றும் சில்மி ரிஆஸ்தீன் ஆகியோரும் இச்சட்ட முயற்சிகளை ஒருங்கிணைப்பதில் பங்காற்றினர்.

இதற்கிடையில், சவூதி தலைநகரில் இடம்பெற்ற தாக்குதல்கள் காரணமாக, இலங்கை சட்டக் குழுவினர் நாடு திரும்புவதற்காகத் திட்டமிடப்பட்டிருந்த விமானச் சேவை ரத்துச் செய்யப்பட்டதால் அவர்கள் தற்போது ரியாத்தில் தவிக்க நேர்ந்துள்ளது. சவூதி உச்ச நீதிமன்றமானது நாட்டின் உயர் நீதித்துறை அதிகார பீடமாகும், இது முதன்மையாக கீழமை நீதிமன்றங்களின் முடிவுகளைச் சட்ட மற்றும் நடைமுறை அடிப்படைகளில் மறுபரிசீலனை செய்கிறது.