TIN சான்றிதழ் பெறுவதில் தொடரும் நெரிசல் – நாடளாவிய ரீதியில் வருமான வரித் திணைக்கள அலுவலகங்களில் மக்கள் அவதி

இலங்கையின் பல்வேறு பகுதிகளிலும் உள்ள உள்நாட்டு இறைவரித் திணைக்கள அலுவலகங்களில் இன்று (03) வரி செலுத்துவோர் அடையாள இலக்கமான (TIN) சான்றிதழைப் பெற்றுக்கொள்வதற்காகப் பொதுமக்கள் நீண்ட வரிசைகளில் காத்திருந்தனர்.

குறிப்பாக, களுத்துறை பிராந்திய உள்நாட்டு இறைவரித் திணைக்கள அலுவலகத்தில் அதிகளவான மக்கள் திரண்டிருந்ததுடன், TIN சான்றிதழைப் பெற்றுக்கொள்வதில் தாமதங்களும் பல்வேறு சிரமங்களும் நிலவுவதாகப் பொதுமக்கள் குற்றம்சாட்டியுள்ளனர்.

சிலர் இன்று காலை முதல் வரிசையில் காத்திருப்பதாகவும், மேலும் சிலர் கடந்த பல நாட்களாகத் தொடர்ச்சியாக அலுவலகத்துக்குச் சென்றும் தங்களால் விண்ணப்பச் செயல்முறையைப் பூர்த்தி செய்ய முடியவில்லை என்றும் தெரிவித்துள்ளனர்.

நேற்றைய தினம் பல மணிநேரம் காத்திருந்த போதிலும், கணினி கட்டமைப்பில் ஏற்பட்ட கோளாறு காரணமாக TIN சான்றிதழைப் பெற்றுக்கொள்ள முடியவில்லை எனச் சிலர் குற்றம்சாட்டியுள்ளனர்.

அத்துடன், அலுவலகத்துக்குச் செல்வதற்காகத் தொழில் செய்யும் இடங்களில் விடுமுறை பெற்றுச் சென்ற போதிலும், மேலதிக ஆவணங்களைக் கொண்டுவருமாறும் அல்லது மற்றொரு நாளில் வருமாறும் அதிகாரிகள் அறிவுறுத்துவதாகப் பொதுமக்கள் விசனம் தெரிவித்துள்ளனர்.

மழையுடனான காலநிலையிலும் நீண்ட நேரம் வரிசைகளில் காத்திருக்க வேண்டிய நிலை ஏற்பட்டுள்ளதாகத் தெரிவித்த மக்கள், இந்தப் பிரச்சினைக்குத் தீர்வுகாண அதிகாரிகள் உடனடியாக நடவடிக்கை எடுக்க வேண்டும் எனக் கோரிக்கை விடுத்துள்ளனர்.

TIN சான்றிதழைப் பெற்றுக்கொள்வதில் ஏற்படும் தாமதங்கள் காரணமாக சாரதி அனுமதிப்பத்திரம் மற்றும் வாகன வருமான அனுமதிப்பத்திரம் உள்ளிட்ட வாகனம் தொடர்பான நடவடிக்கைகளை மேற்கொள்ள முடியாத நிலை ஏற்பட்டுள்ளதாகவும் சிலர் சுட்டிக்காட்டியுள்ளனர்.

இதேவேளை, அரசாங்கத்துக்கு வாக்களித்த மக்கள் தற்போது நிர்வாகத் தாமதங்களால் பெரும் சிரமங்களை எதிர்கொள்வதாகத் தெரிவித்த ஒருவர், ஜனாதிபதி அநுரகுமார திஸாநாயக்க இந்த விடயத்தில் நேரடியாகத் தலையிட்டு உரிய தீர்வைப் பெற்றுத்தர வேண்டும் எனக் கோரிக்கை விடுத்துள்ளார்.

பொதுமக்களுக்கு தொடர்ச்சியாக இவ்வாறான அசௌகரியங்கள் ஏற்படுத்தப்படுவது அரசாங்கத்தின் மீதான அதிருப்தியை அதிகரிக்கக்கூடும் எனவும் சிலர் எச்சரித்துள்ளனர்.

இலங்கையின் வரி விதிமுறைகளின்படி, 2023 டிசம்பர் 31ஆம் திகதிக்கு முன்னர் 18 வயதைப் பூர்த்தி செய்த அனைத்து வதிவிடப் பிரஜைகளும், 2024 ஜனவரி முதலாம் திகதி அல்லது அதற்குப் பின்னர் 18 வயதைப் பூர்த்தி செய்பவர்களும் TIN இலக்கத்தைப் பெற்றுக்கொள்வது கட்டாயமாக்கப்பட்டுள்ளது.

இந்நிலையில், 2026 நவம்பர் முதலாம் திகதி முதல் நிதி, வர்த்தகம் மற்றும் நிர்வாகம் சார்ந்த எட்டு வகையான பரிவர்த்தனைகளுக்கு TIN சான்றிதழ் கட்டாயமாக்கப்பட்டுள்ளதையடுத்து, அதனைப் பெற்றுக்கொள்வதற்கான விண்ணப்பங்கள் அதிகரித்துள்ளமை குறிப்பிடத்தக்கது.