“3 புதிய வரிகள், 7 வரி அதிகரிப்புகள்” – ஜனாதிபதிக்கு அஜித் பி. பெரேரா சவால்!

2024ஆம் ஆண்டு ஆட்சிக்கு வந்ததன் பின்னர் தமது அரசாங்கம் எந்தவொரு புதிய வரியையும் அறிமுகப்படுத்தவில்லை என ஜனாதிபதி அநுரகுமார திஸாநாயக்க தெரிவித்த கருத்து பொதுமக்களைத் தவறாக வழிநடத்துவதாக எதிர்க்கட்சி நாடாளுமன்ற உறுப்பினர் அஜித் பி. பெரேரா குற்றஞ்சாட்டியுள்ளார்.

நாடாளுமன்றத்தில் உரையாற்றிய அவர், ஜனாதிபதியின் கூற்றுக்கு சவால் விடுத்ததுடன், தற்போதைய அரசாங்கம் மூன்று புதிய வரிகளை அறிமுகப்படுத்தியுள்ளதுடன், ஏற்கனவே நடைமுறையில் இருந்த ஏழு வரிகளையும் அதிகரித்துள்ளதாகத் தெரிவித்தார்.

இதன்படி, சேவை ஏற்றுமதி வருமானத்திற்கு 15 சதவீத வருமான வரி, டிஜிட்டல் சேவைகளுக்கு 18 சதவீத பெறுமதி சேர் வரி (VAT) மற்றும் குறிப்பிட்ட தொழில்முறை சேவைகளுக்கான கொடுப்பனவுகளில் 5 சதவீத நிறுத்திவைக்கும் வரி (Withholding Tax) ஆகியவை புதிய வரி நடவடிக்கைகளாக அறிமுகப்படுத்தப்பட்டுள்ளதாக அவர் சுட்டிக்காட்டினார்.

மேலும், வட்டி வருமானம், மூலதன ஆதாயங்கள், நிதிச் சேவைகள், மதுபானம், புகையிலை மற்றும் பந்தயம், சூதாட்டம் சார்ந்த வர்த்தகங்கள் மீதான வரிகளும் அதிகரிக்கப்பட்டுள்ளதாக அஜித் பி. பெரேரா குறிப்பிட்டார்.

நிதி அமைச்சராகவும் பதவி வகிக்கும் ஜனாதிபதிக்கு இத்தகைய வரி மாற்றங்கள் குறித்துத் தெரியாதா எனக் கேள்வி எழுப்பிய அவர், நாட்டின் மக்கள் பொருளாதார நெருக்கடிகளை எதிர்கொண்டுள்ள நிலையில், வரி விதிப்புகள் தொடர்பில் ஜனாதிபதி தவறான கருத்துகளை வெளியிடுவதாகவும் குற்றஞ்சாட்டினார்.

அத்துடன், அரசாங்கம் பொதுமக்கள் மீதான வரிச்சுமையை அதிகரித்துள்ள போதிலும், அவ்வாறு திரட்டப்படும் வரி வருமானத்தை முழுமையாகப் பயன்படுத்துவதில் தோல்வியடைந்துள்ளதாகவும் அவர் அரசாங்கத்தின் பொருளாதார முகாமைத்துவத்தை விமர்சித்தார்.

இதற்கிடையில், 2024ஆம் ஆண்டு ஆட்சிப் பொறுப்பை ஏற்றுக்கொண்டதிலிருந்து தமது அரசாங்கம் எந்தவொரு புதிய வரியையும் அறிமுகப்படுத்தவில்லை என்றும், ஏற்கனவே நடைமுறையில் இருந்த சில வரிகளைக் கணிசமாகக் குறைத்துள்ளதாகவும் ஜனாதிபதி அநுரகுமார திஸாநாயக்க அண்மையில் தெரிவித்திருந்தார்.

மேலும், எதிர்வரும் வரவு செலவுத் திட்டத்தில் கூடுதல் வரிக் குறைப்புகளை மேற்கொள்ள நடவடிக்கை எடுக்கப்படும் என்றும் அவர் உறுதியளித்திருந்தார்.

எனினும், வெளிநாட்டு மூலங்களிலிருந்து கிடைக்கும் குறிப்பிட்ட வருமானங்களுக்கு 15 சதவீத வரி விதித்தல், வட்டி வருமானத்திற்கான நிறுத்திவைக்கும் வரியை அதிகரித்தல் மற்றும் டிஜிட்டல் சேவைகளுக்கு பெறுமதி சேர் வரியை விரிவுபடுத்துதல் உள்ளிட்ட வரி மாற்றங்கள் மேற்கொள்ளப்பட்டுள்ளதை உத்தியோகபூர்வ பொருளாதார மற்றும் வரி ஆவணங்கள் உறுதிப்படுத்துகின்றன.