மாத்தறை, நுவரெலியா, இரத்தினபுரி மாவட்டங்களுக்கு மண்சரிவு அபாய எச்சரிக்கை!

இலங்கையின் ஏழு மாவட்டங்களில் உள்ள பல பிரதேச செயலகப் பிரிவுகளுக்கு மண்சரிவு அபாயம் தொடர்பான முன்னெச்சரிக்கை அறிவிப்பை தேசிய கட்டிட ஆராய்ச்சி நிறுவனம் (NBRI) வெளியிட்டுள்ளது.

இந்த எச்சரிக்கை 2026 நவம்பர் 5ஆம் திகதி பிற்பகல் 4 மணி வரை அமுலில் இருக்கும் என அறிவிக்கப்பட்டுள்ளது.

இதன்படி, இரண்டாம் நிலை (Amber) எச்சரிக்கை மாத்தறை மாவட்டத்தின் கொடபொல, நுவரெலியா மாவட்டத்தின் நில்தண்டாஹின்ன மற்றும் இரத்தினபுரி மாவட்டத்தின் கலவான, கொடகவெல ஆகிய பிரதேச செயலகப் பிரிவுகளுக்கு விடுக்கப்பட்டுள்ளது.

அதேவேளை, முதலாம் நிலை (Yellow) எச்சரிக்கை பதுளை, கண்டி, கேகாலை, மாத்தளை, நுவரெலியா மற்றும் இரத்தினபுரி ஆகிய மாவட்டங்களின் பல பிரதேச செயலகப் பிரிவுகளுக்கு விடுக்கப்பட்டுள்ளது.

இதன்படி, பதுளை மாவட்டத்தின் வெலிமடை, பசறை, கந்தகெட்டிய, மீகஹகிவுல ஆகிய பகுதிகளுக்கும், கண்டி மாவட்டத்தின் யட்டிநுவர, மினிப்பே, ஹதரலியத்த, தும்பனே, தொலுவ, மெததும்பர ஆகிய பகுதிகளுக்கும் எச்சரிக்கை விடுக்கப்பட்டுள்ளது.

மேலும், கேகாலை மாவட்டத்தின் ரம்புக்கனை, ருவன்வெல்ல, அரநாயக்க, யட்டியாந்தோட்டை, புலத்கொஹுபிட்டிய, கேகாலை, மாவனெல்ல ஆகிய பகுதிகளுக்கும், மாத்தளை மாவட்டத்தின் பல்லேபொல பகுதிக்கும் இந்த எச்சரிக்கை பொருந்தும்.

நுவரெலியா மாவட்டத்தின் அம்பகமுவ, நோர்வூட், வலப்பனை, ஹங்குராங்கெத்த, கொத்மலை மேற்கு ஆகிய பகுதிகளுக்கும், இரத்தினபுரி மாவட்டத்தின் காவத்தை மற்றும் பெல்மடுல்ல ஆகிய பகுதிகளுக்கும் முதலாம் நிலை எச்சரிக்கை புதிதாக அறிவிக்கப்பட்டுள்ளது.

இதற்கிடையில், பதுளை மாவட்டத்தின் ஹப்புத்தளை, எல்ல மற்றும் ஹல்துமுல்ல ஆகிய பகுதிகளிலும், கண்டி மாவட்டத்தின் உடுநுவர மற்றும் உடுதும்பர ஆகிய பகுதிகளிலும் ஏற்கனவே விடுக்கப்பட்டிருந்த எச்சரிக்கை ஒரு நிலை குறைக்கப்பட்டுள்ளது.

தேசிய கட்டிட ஆராய்ச்சி நிறுவனத்தின் மண்சரிவு ஆய்வு மற்றும் இடர் முகாமைத்துவப் பிரிவினால் நவம்பர் 4ஆம் திகதி பிற்பகல் 4 மணிக்கு வெளியிடப்பட்ட இந்த அறிவிப்பு, ஒட்டுமொத்த மழைவீழ்ச்சி மற்றும் வளிமண்டலவியல் திணைக்களத்தின் வானிலை முன்னறிவிப்புகளை அடிப்படையாகக் கொண்டு தயாரிக்கப்பட்டுள்ளது.

செங்குத்தான மலைச்சரிவுகள், பள்ளத்தாக்குகள், மனிதர்களால் வெட்டப்பட்ட மலைச்சரிவுகள் மற்றும் மண்சரிவு அபாயமுள்ள வீதிப் பகுதிகளுக்கு அருகில் வசிப்பவர்கள் மிகுந்த அவதானத்துடன் இருக்குமாறு அறிவுறுத்தப்பட்டுள்ளனர்.

குறிப்பாக, நிலத்தில் வெடிப்புகள் ஏற்படுதல், மரங்கள் அல்லது மின்கம்பங்கள் சாய்தல், கட்டடச் சுவர்களில் விரிசல்கள் தோன்றுதல், நீரூற்றுகள் திடீரென உருவாகுதல் அல்லது அவற்றின் நீரோட்டம் தடைப்படுதல் போன்ற அறிகுறிகள் தென்பட்டால் உடனடியாக அவதானம் செலுத்த வேண்டும் எனத் தெரிவிக்கப்பட்டுள்ளது.

இவ்வாறான மண்சரிவுக்கு முந்தைய அறிகுறிகள் தென்படும் பகுதிகளில் வசிப்பவர்கள் உடனடியாக பாதுகாப்பான இடங்களுக்கு வெளியேற வேண்டும் என்றும், தேசிய கட்டிட ஆராய்ச்சி நிறுவனம் மற்றும் அனர்த்த முகாமைத்துவ நிலையம் வழங்கும் அறிவுறுத்தல்களைத் தவறாது பின்பற்ற வேண்டும் என்றும் பொதுமக்களிடம் கேட்டுக்கொள்ளப்பட்டுள்ளது.