2026ஆம் ஆண்டில் ஓகஸ்ட் 30ஆம் திகதி வரை இலங்கையின் கறுவாத் தொழில்துறை மூலம் 185 மில்லியன் டொலர் வருமானம்
இலங்கையின் கறுவாத் தொழில்துறை மூலம் 2026ஆம் ஆண்டு ஓகஸ்ட் 30ஆம் திகதி வரை 185 மில்லியன் அமெரிக்க டொலர் (சுமார் 60 பில்லியன் ரூபாய்) வருமானம் ஈட்டப்பட்டுள்ளதாக விவசாயம், கால்நடை வளங்கள், காணி மற்றும் நீர்ப்பாசன அமைச்சு தெரிவித்துள்ளது.
2026ஆம் ஆண்டு இறுதிக்குள் கறுவாத் தொழில்துறை மூலம் 100 பில்லியன் ரூபாய் வருமானத்தை ஈட்டுவதற்கு அரசாங்கம் இலக்கு நிர்ணயித்துள்ளதாகவும் அமைச்சு குறிப்பிட்டுள்ளது.
இந்த இலக்கை அடைவதற்காக விவசாய அமைச்சின் ஊடாக கறுவா அபிவிருத்தித் திணைக்களத்திற்கு 365 மில்லியன் ரூபாய் நிதி ஒதுக்கீடு செய்யப்பட்டுள்ளது.
இந்த நிதியின் மூலம், பாரம்பரியமாக கறுவா பயிரிடப்படாத பகுதிகளில் புதிதாக 2,500 ஏக்கர் நிலப்பரப்பில் கறுவா பயிர்ச்செய்கையை ஆரம்பிக்கத் திட்டமிடப்பட்டுள்ளது.
அத்துடன், பெறுமதி சேர்க்கப்பட்ட கறுவா உற்பத்திப் பொருட்களைத் தயாரிக்கும் கைத்தொழில்களை ஊக்குவித்தல், கறுவாத் தொழில்துறைக்கு சர்வதேச அங்கீகாரம் பெற்ற தரச் சான்றிதழ்களைப் பெற்றுக்கொள்ளுதல் மற்றும் இத்துறையில் தொழில்முனைவோரை உருவாக்குதல் ஆகிய நடவடிக்கைகளுக்கும் இந்த நிதி பயன்படுத்தப்படவுள்ளது.
இலங்கையின் கறுவாத் தொழில்துறையை மேலும் மேம்படுத்தி, சர்வதேச சந்தையில் அதன் போட்டித்தன்மையை அதிகரிப்பதுடன், 2026ஆம் ஆண்டுக்கான வருமான இலக்கை அடைவதே இந்தத் திட்டங்களின் பிரதான நோக்கம் என அமைச்சு தெரிவித்துள்ளது.
