PickMe Food, Uber Eats சேவைகளை நம்பி அனைவராலும் வாழ முடியாது – எரிவாயு தட்டுப்பாடு குறித்து அரசாங்கத்திடம் ஹர்ஷா கேள்வி
நாட்டில் தொடரும் சமையல் எரிவாயு தட்டுப்பாடு குறித்து அரசாங்கத்தை விமர்சித்துள்ள ஐக்கிய மக்கள் சக்தியின் நாடாளுமன்ற உறுப்பினர் கலாநிதி ஹர்ஷ டி சில்வா, PickMe Food மற்றும் Uber Eats போன்ற உணவு விநியோக சேவைகளை நம்பி வாழக்கூடிய பொருளாதார வசதி அனைத்து குடும்பங்களுக்கும் இல்லை எனத் தெரிவித்துள்ளார்.
சமையல் எரிவாயு தட்டுப்பாட்டினால் பொதுமக்கள் எதிர்கொள்ளும் சிரமங்கள் குறித்து கருத்துத் தெரிவிக்கும்போதே அவர் இவ்வாறு குறிப்பிட்டுள்ளார்.
குறிப்பாக, லாஃப்ஸ் (Laugfs) எரிவாயு தொடர்ந்து கிடைக்காத நிலைமை தொடர்பில் அரசாங்கம் உரிய நடவடிக்கை எடுக்கத் தவறியுள்ளதாக அவர் குற்றம்சாட்டியுள்ளார்.
இது தொடர்பில் கருத்துத் தெரிவித்த அவர்,
“அனைவராலும் PickMe Food அல்லது Uber Eats மூலம் உணவைப் பெற்றுக்கொள்ள முடியாது. பல குடும்பங்கள் நாளாந்தம் மூன்று வேளை உணவைக்கூட பெற்றுக்கொள்வதில் சிரமங்களை எதிர்கொள்கின்றன. அவர்கள் வீட்டிலேயே உணவு சமைப்பதற்குச் சமையல் எரிவாயுவை நம்பியுள்ளனர். ஆனால் தற்போது எரிவாயு இல்லை” எனத் தெரிவித்துள்ளார்.
கோதுமை மா, பாண் மற்றும் எரிபொருள் விலைகள் அதிகரித்துள்ள நிலையில், சமையல் எரிவாயு தட்டுப்பாடும் குடும்பங்களின் பொருளாதாரச் சுமையை மேலும் அதிகரித்துள்ளதாக அவர் சுட்டிக்காட்டியுள்ளார்.
தனது சொந்த அனுபவத்தையும் பகிர்ந்துகொண்ட அவர், லாஃப்ஸ் எரிவாயு சிலிண்டரைப் பெற்றுக்கொள்ள முடியாத நிலை ஏற்பட்டுள்ளதாகவும், தன்னிடம் லிட்ரோ (Litro) எரிவாயு சிலிண்டர் இருப்பதால் சமாளிக்க முடிவதாகவும் குறிப்பிட்டுள்ளார்.
ஈரான் நாட்டின் எரிசக்திப் பொருட்கள் தொடர்பான கொடுக்கல் வாங்கல்கள் குறித்த குற்றச்சாட்டுகளைத் தொடர்ந்து, லாஃப்ஸ் நிறுவனத்தின் டுபாயைத் தளமாகக் கொண்ட துணை நிறுவனமொன்று அமெரிக்காவின் தடைகளுக்கு உள்ளாகியுள்ளதாக வெளியாகியுள்ள தகவல்களையும் அவர் இதன்போது சுட்டிக்காட்டியுள்ளார்.
எனினும், லாஃப்ஸ் எரிவாயு விநியோகப் பிரச்சினைக்குத் தீர்வுகாண்பதில் அரசாங்கம் ஏன் இதுவரை வெற்றிபெறவில்லை என அவர் கேள்வி எழுப்பியுள்ளார். சாதாரண மக்களின் அன்றாட வாழ்க்கையைப் பாதிக்கும் இந்தப் பிரச்சினைக்கு இலகுவான தீர்வொன்றைக் கண்டறிய முடியும் என்றும் அவர் தெரிவித்துள்ளார்.
மேலும், இதேபோன்றதொரு நிலைமை தமது கட்சி ஆட்சியில் இல்லாமல் எதிர்க்கட்சியில் இருந்தபோது ஏற்பட்டிருந்தால், மக்கள் விடுதலை முன்னணி (ஜே.வி.பி.) போராட்டங்களை முன்னெடுத்திருக்கும் என்றும் அவர் விமர்சித்துள்ளார்.
எனவே, அதிகரித்துவரும் வாழ்க்கைச் செலவினால் ஏற்கனவே பாதிக்கப்பட்டுள்ள குடும்பங்கள் தமது அன்றாட உணவைத் தயாரிப்பதற்குக்கூட சிரமங்களை எதிர்கொள்ளும் நிலையைத் தவிர்க்கும் வகையில், சமையல் எரிவாயு விநியோகப் பிரச்சினைக்கு அரசாங்கமும் பொறுப்பான அமைச்சரும் உடனடியாகத் தீர்வுகாண வேண்டும் என ஹர்ஷ டி சில்வா வலியுறுத்தியுள்ளார்.
