கெக்கிராவையில் சட்டவிரோத துப்பாக்கிகள், வனவிலங்கு பொருட்களுடன் மூவர் கைது!
கெக்கிராவை பகுதியில் வனவிலங்கு அதிகாரிகளும் இலங்கை இராணுவத்தினரும் இணைந்து முன்னெடுத்த சுற்றிவளைப்புகளின்போது பெண் ஒருவரும் உள்ளிட்ட மூவர் கைது செய்யப்பட்டுள்ளனர்.
வனவிலங்குகளுக்கு எதிராகப் பயன்படுத்தப்படும் சட்டவிரோத துப்பாக்கிகள், வெடிபொருட்கள் மற்றும் பொறிகளை ஒழிக்கும் தேசிய வேலைத்திட்டத்தின் இரண்டாம் கட்டத்தின் கீழ் இந்த நடவடிக்கைகள் முன்னெடுக்கப்பட்டுள்ளன.
இதன்போது, கெக்கிராவை பிரதேச செயலகப் பிரிவின் மீகிரியாவ பகுதியில் மேற்கொள்ளப்பட்ட கூட்டு சுற்றிவளைப்பில், சட்டவிரோத துப்பாக்கி ஒன்று, பொறித் துப்பாக்கி ஒன்று, ஈயத் தோட்டாக்கள், மான்களின் கொம்புகளால் செய்யப்பட்ட ஐந்து பொருட்கள், மான்கொம்புகளால் தயாரிக்கப்பட்ட கத்திகள் மற்றும் வாள் ஒன்றும் கைப்பற்றப்பட்டுள்ளன.
இந்தப் பொருட்களுடன் தொடர்புடைய ஆண் ஒருவரும் பெண் ஒருவரும் கைது செய்யப்பட்டுள்ளனர்.
இதேவேளை, கஹல்ல-பல்லேகல சரணாலயத்திற்கு உட்பட்ட நீகினியாவ பகுதியில் மேற்கொள்ளப்பட்ட மற்றுமொரு சுற்றிவளைப்பில், துப்பாக்கியைப் பயன்படுத்தி முயல் ஒன்றைக் கொன்றதாகக் கூறப்படும் சந்தேகநபர் ஒருவர் கைது செய்யப்பட்டுள்ளார்.
அவரிடமிருந்து பொறித் துப்பாக்கி ஒன்றும் ஏழு தோட்டாக்களும் மீட்கப்பட்டுள்ளன.
மேலும், சந்தேகநபரிடம் அனுமதிப்பத்திரத்துடன் கூடிய துப்பாக்கி ஒன்றும் காணப்பட்டுள்ளதுடன், அதன் குழாயின் நீளம் உள்ளிட்ட பகுதிகளில் மாற்றங்கள் செய்யப்பட்டிருந்ததாக அதிகாரிகள் தெரிவித்துள்ளனர்.
கைது செய்யப்பட்ட மூன்று சந்தேகநபர்களும் கைப்பற்றப்பட்ட பொருட்களுடன் கெக்கிராவை நீதவான் நீதிமன்றத்தில் ஆஜர்படுத்தப்படவுள்ளனர்.
கல்கமுவ பகுதியில் ஆரம்பிக்கப்பட்ட இந்த தேசிய நடவடிக்கை, வனவிலங்குகளுக்குப் பாதிப்பை ஏற்படுத்தும் சட்டவிரோத துப்பாக்கிகள் மற்றும் பொறிகளைக் கைப்பற்றும் நோக்கில் நாடளாவிய ரீதியில் தொடர்ந்து முன்னெடுக்கப்படவுள்ளதாக அதிகாரிகள் தெரிவித்துள்ளனர்.
