ஓய்வுபெறும் முப்படையினருக்கு புதிய தொழில் வாய்ப்புகளை ஏற்படுத்த திட்டம்

இலங்கை முப்படைகளிலிருந்து ஓய்வுபெறும் இராணுவத்தினருக்கு தொழில்சார் தகைமைகளை வழங்குவதுடன், உள்நாட்டிலும் வெளிநாடுகளிலும் வேலைவாய்ப்புகளை ஏற்படுத்தும் புதிய வேலைத்திட்டமொன்றை பாதுகாப்பு அமைச்சு முன்னெடுக்கத் திட்டமிட்டுள்ளது.

ஓய்வுபெறும் இராணுவத்தினர் நிலையான வருமானத்தைப் பெற்றுக்கொள்ளும் வகையில், அங்கீகரிக்கப்பட்ட தொழிற்பயிற்சிகளையும் தொழில்சார் தகைமைகளையும் வழங்குவது தொடர்பான கலந்துரையாடல், கடந்த ஒக்டோபர் 29ஆம் திகதி பாதுகாப்பு பிரதி அமைச்சர் ஓய்வுபெற்ற மேஜர் ஜெனரல் அருண ஜயசேகர தலைமையில் நடைபெற்றது.

இராணுவ சேவையிலிருந்து ஓய்வுபெற்ற பின்னர் முன்னாள் படைவீரர்கள் எதிர்கொள்ளும் தொழில் மற்றும் பொருளாதார சவால்களுக்குத் தீர்வுகாண்பதே இந்த வேலைத்திட்டத்தின் முக்கிய நோக்கமாகும். குறிப்பாக, தொழில்நுட்பம் சாராத பணிகளில் ஈடுபட்டிருந்த படையினருக்கு புதிய தொழில் வாய்ப்புகளை ஏற்படுத்துவதில் விசேட கவனம் செலுத்தப்படவுள்ளது.

இதற்கமைய, தேசிய தொழில்சார் தகைமைச் சான்றிதழ் (NVQ) உள்ளிட்ட அங்கீகரிக்கப்பட்ட தகைமைகளை வழங்கி, உள்நாட்டு மற்றும் சர்வதேச வேலைவாய்ப்புச் சந்தையில் அவர்கள் இணைவதற்கான வாய்ப்புகளை ஏற்படுத்தத் திட்டமிடப்பட்டுள்ளது.

இதன் கீழ், மின்சார வாகனத் தொழில்நுட்பம், வாகனப் பொறியியல், ஹோட்டல் முகாமைத்துவம், பேக்கரி மற்றும் உணவுத் தயாரிப்பு, பராமரிப்புப் பணிகள், பாலர் பாடசாலை ஆசிரியர் பயிற்சி, மெகாட்ரோனிக்ஸ், இலத்திரனியல், ரோபோட்டிக்ஸ், தீயணைப்புப் பயிற்சி, தனியார் பாதுகாப்புச் சேவைகள், விவசாயம் மற்றும் அழகுக்கலை உள்ளிட்ட பல்வேறு துறைகளில் பயிற்சிகளை வழங்குவது குறித்து ஆராயப்பட்டுள்ளது.

அத்துடன், சர்வதேச வேலைவாய்ப்புகள் மற்றும் கடல்சார் துறைகளில் உள்ள தொழில் வாய்ப்புகளுக்கும் முன்னுரிமை வழங்கப்படவுள்ளது.

இராணுவ சேவைக் காலத்தில் படையினர் பெற்றுக்கொண்ட நடைமுறை அனுபவங்கள் மற்றும் தொழில்சார் திறன்களை NVQ அல்லது டிப்ளோமா மட்டத்திலான தகைமைகளாக அங்கீகரிப்பதற்கான வழிமுறைகள் குறித்தும் இதன்போது கலந்துரையாடப்பட்டுள்ளது.

இதற்காக, முப்படைகளில் ஏற்கனவே நடைமுறையில் உள்ள பயிற்சித் திட்டங்களை 'ரணவிரு வள நிலையம்' மற்றும் தொழிற்பயிற்சி அதிகாரசபை (VTA) ஆகியவற்றின் பயிற்சிப் பாடநெறிகளுடன் ஒருங்கிணைப்பது தொடர்பிலும் யோசனைகள் முன்வைக்கப்பட்டுள்ளன.

மேலும், படையினர் ஓய்வுபெறுவதற்கு முன்னரே தொழிற்பயிற்சிகளை வழங்குவதுடன், நாடளாவிய ரீதியில் அமைந்துள்ள தொழிற்பயிற்சி அதிகாரசபையின் மாவட்ட நிலையங்களை இதற்குப் பயன்படுத்துவது குறித்தும் ஆராயப்பட்டுள்ளது.

இந்த வேலைத்திட்டத்தை நடைமுறைப்படுத்துவதற்குத் தேவையான நிதி ஒதுக்கீடுகள் உள்ளிட்ட செயற்திட்டமொன்றைத் தயாரிப்பது குறித்தும் கவனம் செலுத்தப்பட்டுள்ளதாக பாதுகாப்பு அமைச்சு தெரிவித்துள்ளது.

இக்கலந்துரையாடலில் பாதுகாப்பு அமைச்சின் சிரேஷ்ட அதிகாரிகள், தொழிற்பயிற்சி அதிகாரசபையின் பிரதிநிதிகள் மற்றும் முப்படைகளின் அதிகாரிகள் கலந்துகொண்டனர்.

எனினும், இந்த வேலைத்திட்டம் தற்போது திட்டமிடல் நிலையிலேயே உள்ளதுடன், அதனை நடைமுறைப்படுத்துவதற்கான ஏற்பாடுகள் இன்னும் இறுதி செய்யப்படவில்லை.