ஷிராந்தி ராஜபக்ஷ அக்டோபர் 13 ஆம் திகதி வரை விளக்கமறியலில்!
முன்னாள் முதன்மைப் பெண்மணி (First Lady) ஷிராந்தி ராஜபக்ஷ, லஞ்ச ஊழல் விசாரணை ஆணைக்குழுவினால் (CIABOC) கைது செய்யப்பட்டு கொழும்பு நீதிவான் நீதிமன்றத்தில் ஆஜர்படுத்தப்பட்டதை அடுத்து, எதிர்வரும் அக்டோபர் 13 ஆம் திகதி வரை விளக்கமறியலில் வைக்க உத்தரவிடப்பட்டுள்ளார்.
இன்று புதன்கிழமை (07) காலை கொழும்பிலுள்ள அவரது இல்லத்தில் வைத்து லஞ்ச ஊழல் விசாரணை ஆணைக்குழுவின் அதிகாரிகளால் வாக்குமூலம் பெறப்பட்ட பின்னரே ஷிராந்தி ராஜபக்ஷ கைது செய்யப்பட்டார்.
அரசுக்குச் சொந்தமான வங்கியொன்றிலிருந்து 10 மில்லியன் ரூபாவை பெற்றுக்கொண்டமை, பொதுச் சொத்துச் சட்டம் மற்றும் ஊழல் தடுப்புச் சட்ட விதிகளின் கீழ் அப் பணத்தை துஷ்பிரயோகம் செய்தமை தொடர்பில் அவர் மீது சுமத்தப்பட்டுள்ள குற்றச்சாட்டுகள் குறித்தே இந்த நடவடிக்கை எடுக்கப்பட்டுள்ளதாக லஞ்ச ஊழல் விசாரணை ஆணைக்குழு தெரிவித்துள்ளது.
இந்த விசாரணையானது, ஷிராந்தி ராஜபக்ஷ தலைவராகச் செயற்பட்ட 'சிரிலிய சவிய' அமைப்பின் நிதிச் செயற்பாடுகள் மற்றும் பரிவர்த்தனைகளுடன் தொடர்புடையது என சுட்டிக்காட்டப்பட்டுள்ளது.
வெளிநாட்டுப் பயணத்தை முடித்துக்கொண்டு இவ்வாரத் தொடக்கத்தில் இலங்கை திரும்பிய ஷிராந்தி ராஜபக்ஷ, 'சிரிலிய சவிய' அமைப்பின் நிதி விவகாரங்கள் தொடர்பில் நிதிப் குற்றப் புலனாய்வுப் பிரிவின் முன்னர் எதிர்வரும் அக்டோபர் 13 ஆம் திகதி ஆஜராகவிருந்த நிலையிலேயே இந்நடவடிக்கை மேற்கொள்ளப்பட்டுள்ளமை குறிப்பிடத்தக்கது.
