வெலிகம துப்பாக்கிச்சூடு: தேசபந்து தென்னகோன் உள்ளிட்ட 9 பேருக்கு குற்றப்பத்திரிகை கையளிப்பு

வெலிகம பகுதியில் உள்ள விடுதியொன்றில் கடந்த 2023 ஆம் ஆண்டு டிசம்பர் மாதம் இடம்பெற்ற துப்பாக்கிச்சூட்டுச் சம்பவம் தொடர்பாக, முன்னாள் பொலிஸ் மா அதிபர் தேசபந்து தென்னகோன் உள்ளிட்ட ஒன்பது பொலிஸ் அதிகாரிகளுக்கு இன்று (07) குற்றப்பத்திரிகைகள் கையளிக்கப்பட்டன.

மாத்தறை மேல் நீதிமன்ற நீதிபதி நந்தன அமரசிங்க முன்னிலையில் வழக்கு விசாரணைக்கு எடுத்துக்கொள்ளப்பட்டபோதே, சட்டமா அதிபரினால் (Attorney General) தாக்கல் செய்யப்பட்ட குற்றப்பத்திரிகைகள் குற்றம் சாட்டப்பட்ட ஒன்பது பேருக்கும் வாசித்துக் காண்பிக்கப்பட்டன.

குற்றப்பத்திரிகைகள் கையளிக்கப்பட்டதைத் தொடர்ந்து, குற்றம் சாட்டப்பட்ட ஒன்பது பேரையும் பிணையில் (Bail) விடுவிக்குமாறு மேல் நீதிமன்றம் உத்தரவிட்டது.

கடந்த 2023 ஆம் ஆண்டு டிசம்பர் மாத இறுதியில் கொழும்பு குற்றத்தடுப்புப் பிரிவைச் சேர்ந்த எட்டு பொலிஸ் அதிகாரிகள் அடங்கிய குழுவொன்றினால் வெலிகம பகுதியில் மேற்கொள்ளப்பட்ட நடவடிக்கையின்போதே இச்சம்பவம் இடம்பெற்றிருந்தது.

இந்தச் சம்பவத்தின் போது, வெலிகம பொலிஸ் நிலைய அதிகாரிகளால் மேற்கொள்ளப்பட்ட துப்பாக்கிச்சூட்டில், கொழும்பு குற்றத்தடுப்புப் பிரிவைச் சேர்ந்த பொலிஸ் சார்ஜன்ட் (Police Sergeant) ஒருவர் உயிரிழந்திருந்தார்.

இச்சம்பவம் தொடர்பான மேலதிக விசாரணைகளை குற்றப்புலனாய்வுத் திணைக்களம் மேற்கொண்டு வருகின்றது.

அத்துடன், இவ்வழக்கின் அடுத்தகட்ட விசாரணை எதிர்வரும் நவம்பர் மாதம் 27 ஆம் திகதிக்கு ஒத்திவைக்கப்பட்டுள்ளது.