சவூதி மன்னிப்பைச் சுட்டிக்காட்டி நாமல் சாடல்; ஞாணசார தேரருக்கு ஜனாதிபதி மன்னிப்பு வழங்கக் கோரிக்கை

விளக்கமறியலில் வைக்கப்பட்டிருந்த நிலையில் பாராளுமன்றத்திற்கு வருகை தந்த எதிர்க்கட்சி பாராளுமன்ற உறுப்பினர் நாமல் ராஜபக்ஷ, பொதுபல சேனா அமைப்பின் பொதுச்செயலாளர் வணக்கத்திற்குரிய கலகொடஅத்தே ஞாணசார தேரர் நடத்தப்படும் விதம் குறித்து அரசாங்கத்தைக் கடுமையாக விமர்சித்துள்ளார். அத்துடன், அவருக்கு ஜனாதிபதி மன்னிப்பு வழங்குவது குறித்து ஜனாதிபதி அனுர குமார திசாநாயக்க பரிசீலிக்க வேண்டும் என்றும் வலியுறுத்தியுள்ளார்.

சவூதி அரேபியாவில் மரண தண்டனையை எதிர்நோக்கியுள்ள சிவராசா அனோஜன் என்ற இலங்கை பிரஜைக்காக சவூதி அரசாங்கத்திடம் மன்னிப்புக் கோரும் இலங்கை அரசாங்கம், அதேபோன்று ஞாணசார தேரரின் விடயத்தில் நடவடிக்கை எடுக்காதது ஏன் என்று நாமல் ராஜபக்ஷ கேள்வி எழுப்பினார்.

"எமது ஜனாதிபதியால் பிறிதொரு நாட்டின் தலைவரிடம் மன்னிப்புக் கோர முடியுமென்றால், அவர் இங்கு தனது நடவடிக்கைகளின் மூலம் முன்னுதாரணமாகச் செயற்படத் தலைப்பட வேண்டும்" என நாமல் ராஜபக்ஷ தெரிவித்தார்.

அனோஜனின் சார்பில் சட்ட ரீதியான மற்றும் இராஜதந்திர வழிகளைப் பின்பற்றி வரும் அதேவேளையில், அவருக்கு மன்னிப்பு வழங்குமாறு சவூதி அரேபிய மன்னரிடம் அரசாங்கம் உத்தியோகபூர்வ இராஜதந்திர ரீதியிலான கோரிக்கையை முன்வைக்கும் என்று ஜனாதிபதி திசாநாயக்க ஏற்கனவே அறிவித்திருந்த நிலையிலேயே, நாமல் ராஜபக்ஷ இந்தக் கருத்துக்களை வெளியிட்டுள்ளார்.

மேலும், ஞாணசார தேரர் சிறைச்சாடை உடையில் நீதிமன்றத்திற்குக் கொண்டு வரப்பட்ட விதத்தைக் கண்டித்த நாமல் ராஜபக்ஷ, தேரர் நடத்தப்படும் விதம் குறித்து சிரேஷ்ட பௌத்த மகா சங்கத்தினர் எழுப்பிய கவலைகளை அரசாங்கம் புறக்கணித்துள்ளதாகவும் குற்றம் சுமத்தினார்.

எனினும், ஞாணசார தேரர் தண்டனை அனுபவித்து வரும் வேளையில், சிறைச்சாலை விதிமுறைகளே அவருக்குப் பொருந்தும் என அரசாங்கம் தனது நிலைப்பாட்டைத் தெளிவுபடுத்தியுள்ளது.

நீதிமன்ற அவமதிப்புக் குற்றச்சாட்டில் குற்றவாளியாகக் காணப்பட்ட ஞாணசார தேரருக்கு 2018 ஆம் ஆண்டு ஆறு ஆண்டுகள் சிறைத்தண்டனை விதிக்கப்பட்டது. பின்னர் 2019 ஆம் ஆண்டு அப்போதைய ஜனாதிபதி மைத்திரிபால சிறிசேனவினால் வழங்கப்பட்ட ஜனாதிபதி மன்னிப்பின் அடிப்படையில் அவர் விடுவிக்கப்பட்டார். இருப்பினும், அந்த ஜனாதிபதி மன்னிப்பை உயர் நீதிமன்றம் பின்னர் செல்லுபடியற்றதாக்கியதைத் தொடர்ந்து, மீதமுள்ள தண்டனைக் காலத்தை அவர் அனுபவிக்க வேண்டிய நிலை ஏற்பட்டது.

அரசாங்கம் மகா சங்கத்தினரை (Maha Sangha) அவமதிப்பதாகக் குற்றம் சாட்டிய நாமல் ராஜபக்ஷ, பௌத்த மதம் மற்றும் பௌத்த மரபுகள் குறித்த கவலைகளை இனவாதம் எனச் சித்தரிப்பதற்கெதிராகவும் எச்சரிக்கை விடுத்தார்.

எனவே, ஞாணசார தேரரின் விடயத்தில் அரசியலமைப்பு ரீதியிலான தனது மன்னிப்பு வழங்கும் அதிகாரத்தைப் பயன்படுத்துவது குறித்து ஜனாதிபதி பரிசீலிக்க வேண்டும் என்று அவர் கோரிக்கை விடுத்துள்ளார்.